Zure eskubideen alde? Jakina! Zure eskabideen alde? Aztertu behar.

Hilotzak guztiak hilotz zaizkigu solidariooi, baina batzuek bertzeek baino hotzago uzten gaituzte.

Gorputz judizialak gorpu egina utzi du Justizia.

Poliziak, bere aisiara zuzendurik, delitu sareak baino Zuzenbide Estatu ditxosozkoa desegituratuko du aiseago.

Torturaren funtzioa, bertzeak bertze: torturatuaren mintzoa desegituratzea, haren hitz solteekin gero bere gustuko diskurtsoa eraiki ahal dezan torturatzaileak.

Erran zidaten, aspaldin, Zuzenbide Estatu demokratikoen ezaugarri bat dela polizia judizialaren gorputz bat izatea, gobernu poliziatik aparte, justiziaren erranetara jarria. Berme juridiko halako bat ikusi nuen horretan. Inozoa ni! Gobernu polizia jarri zuten epaileen zerbitzutan, polizia judizial gisa: polizia bera epaile bihurtzeko makila magikotzat hartu zuten kontzeptua.

Justizia auzietan, politikaren eskua, beti hanka.

Gehiegi luzatzen den gerra bake berantaz erdituko da, eta zirt edo zarteko emagina beharko.

Gatazka honetan sugarra behar dugu, baina su eta gerra?…

Onuragarri izan daiteke pobreek politikari ez ahal izatea