Joseba Sarrionandiaren testuaren zerbitzura Lierni Altuberen ilustrazioek ematen diote mikro-ipuin bilduma honi haur literatura hutsaren itxura. Baina testuen irakurketak laster kokatzen gaitu helduok haurren begiradapean eta haurren harriduren aurrean, gonbit gisa gure mundu fosildua bertze era batean ikustera. Beheko iruzkin hau egin nion atzoko Berrian liburuari.

Δ Δ Δ

Gaurko hau fintasun osoz diseinaturiko liburu bat dugu. Lehen begiradan, haur literaturako produktu baten aurrean gaudela ematen du. Mikro-ipuinetan murgiltzerakoan, haurrak ikusiko ditugu protagonista ia istorio guztietan. Haurren bihurrikeriak, ametsak, jolasak, begiak, birjintasun lainoa ikusiko ditugu, baina haurren harridurak ere, haurren galderak, ikuspuntuak… helduok sarri zer pentsatu, nola interpretatu, zer erantzun ez jakin jartzen gaituzten horiek.