Engainu dontsua.

Auto-engainurik gabe, zorionik ez. Baina merezi du zoriona, auto-engainuaren jakinean egonik betiere: bertzela, zoriontsu gaixoa zu!

Izan gauza!

Gauza zaren neurrian baizik ez zaituzte balioesten: gizakia, gauzaki.

Jakietako arrasto fekalek gorozki sanoak sortuko balituzte, ustelkeriaren sanotasuna frogatuko lukete.

Jainkorik gabe, etikarik ez? Ala, horrela diotenentzat, Jainko batekin, zertarako giza etikarik?

Lehen iraultzaileena omen zen katastrofismoa neoliberalek dute gaur ikurtzat: hondamendietan irekitzen zaizkielakoan aukerarik onenak.

Ez bilatu ni ezerezean: deskuiduz, hor ikus nintzakezu.

Gazteak autoritarismoan hezi nahi dituztenak hezitzaile zintzoenen aginpide morala irrigarri uzten hasten dira.

Ederra sagarra, zenbaki garden huts bihurturik! Zein itsusia, aldiz, Ebak murtxikaturik! Holaxe ekonomia hutsaren estetika.

Neoliberalen ekonomia jasangarria: bai kontsumitzaile bai langile gisa jasanezin suertatzen zaizkienak ahuleriaz hiltzen uztea.

Zure bizitza ezin izan baduzu zeure modura eraiki, eraiki ezazu zure memoria.