Lotsagabekerian adituak

Egoeraren aldakuntzaren beldur, zenbat arlotako zenbat aditu ez ote den prest ikerketa barregarrietan ere aditu agertzeko!

Oker emankorrak

Abilezia berezia berea, zuzen-zuzen okerretara jotzeko, baina ia beti emankor itzultzeko.

Hau kea, idazten jarrita: bi ideia lotzeko, zigarrotxo bat! Zerbaiti uztekotan, zer sanoago, erretzeari ala ideien loturei uztea?

Dirua airean lurrindu eta mago maisuen kontu-kaieretako digituetan berragertu, arabesko ezin liluragarriagoak irudi.

Kukuak habi ezjakinetan txitatzen omen ditu bere arrautzak; holaxe sinesmen erosoak hautatu ere jakineza bere beldarrak goxo babesteko.

Jende horiek, antza denez sendo sinetsirik daudenak ‘teoria’ eta ‘teologia’ hitzek erro nagusi berbera dutelakoan.

Ikerketa itxuraz zientifiko horiek, edozeren morrontzak derrigortuak rigor mortis-eraino.

Gizarte paktua, giza patua mantsotzeko presa hori.

Ametsen errutinan erori, haren mihisean goxo-goxo bildu, eta zertarako gero ametsak bete?

Bazekien ‘O’ hizkia egiten, laguntza tresna gisa tutu biribila ekarri zioten arte: orduan hasi zen aztoratzen.