Azaleko demokrazia

Hau dermokrazia gurea! Zimurrak sakondu baizik egiten ez duten ukenduen saltzaile txerpolariei begira eta adi herritarrok.

Legediaren diktadura

Gaitz erdi demokrazia herriak eginiko legediaren diktadura izanen balitz, guztiei berdin aplikaturik betiere!

Banku kaudimenduna: bezeroentzat Caudiumeko urkamendiduna, ote?

Ez dakit izena duen orok existitzen duen, baina begi bistakoa da izendaezin gehiegik existitzen duela.

Hau nazka, euren hankarteko organo intelektualei hazka eta askatasunen kontrako askan bazka egiten duten sabelandi horiek!

Farmaziagintza-jaunentzat, prebentziozko medikuntza prebentziozko gerraren pare: badaezpadan pilulazko misilez erasoka soinari.

Ez zuen txapela janzten, baina erosi egin zuen azken buruan kultura-hizkuntzetako intelektual hantusteen aurrean erantzi ahal izateko.

Orgasmozko demokrazia gure hau, antza, demokrazia organikoaren nostalgikoentzat.

Logikari ostikadek ez dute zerikusirik paradoxekin: bien nahasketa arrunt arrunta da, ordea, demokrata autoritarioengan.

Ai ene, poeta izan behar nukeen! Baina bizitzak bertze neurtitzetara eraman nau, prosaikotasunean ene hitzak nekez neurtzera.