Urte bat zaharragoa egutegia, jakina, baina zu ere bai? Gazte edo zahar, saia zaitez jarraitzen urtaldirik onenean bezala!
Month: abendua 2014
Zentzudun eta zentzugabe goiztiarra
Sen onaz beterik txikitatik, eskuzabal oso eskaintzen zion edonori, bere sena: laster xahutu ere.
Abenduak 29
Atzo, behingoz, inozentetzat jo ninduten. Gaur hasi zaizkit berriro beti bezala adarra jotzen.
Geopolitikak asmaturiko orografia
Geopolitika, Historiaren lege horietako bat? Ez uste: geopolitikari bakoitza bere orografian galdu da.
“Por defecto”
Euskarazko ene konfigurazioak erdaldun hari azaldu eta hitzez hitz interpretatu zuen: por defecto ezarri ditudala euskaraz.
Bizimoduen egiak
Hain prestatuak, belaunaldi berriak, non jakin baitakite gure munduaren engainuez eta engainaturik bizitzen nahiago baitute.
Hizkuntzaren garbigarriak
Euskarara itzultzaile automatikoek diotenez, aho osoa garbitzen dute likido batzuek: hortzak, hortz-oiak, aho-hormak, eta are hizkuntza bera ere. Euskaltzale zahar kristau haiek jakin izan balute, eutsi izan zioketen euskararen apologiari?
Metaforarik gabeko metafora
Badaude metaforarik gabeko poemak sortu nahian dabiltzanak. Badute meritu, baina lortzen dutenean poema bera dugu metafora.
Bikainen errutina
Ezohiko lorpen bikainak, eguneroko lan-errutinaren kume.
Zurrunegi
Zurrunegia, ametsetan ere lo zurrun.