Bikaina, bakan ezinbertzez?

Bakan izan ohi da bikaintasuna. Bikaintasunaren gainbehera izanen al litzateke berau arruntago bihurtzea?

Gosea eta ametsak

Auto-aginduz goseak oheratzen direnek eta hetero-aginduz goseak kalezuloan lo egin beharrekoek, jaki berdinez amets?

Hitz-joko, sintaxi gabeko hitz edota hots hutsen segida izan dezake oinarri poema ederrak; alta, zirrara baten sintaxia izan behar muinean.

Zerbait ikastea, ona betiere, dena delakoa zure arrazoia; zerbait ez ikasi nahia, ona ere bai agian, zein arrazoiak dituzun buruan.

Ez ditugu zertan ez burkide ez burkokide izan maite ditugun guztiak.

Ezin bizi inor bere kontraerranik gabe. Baina kontuz!, zenbat jende ez ote dute gure kontraerranek hiltzen?

Jatetxe horiek, hain epika edota lirika fina saltzen dutenak euren web orrietako aurkezpenetan!

Gorrotagarria kristautasuna, kristau asko maitagarri dudan arren. Maitagarria matematika, matematikari askori gorroto diodan arren.

Per capita errenta, errenta handienetako buruek gehien maite duten indizea, euren errentek pobretzen dutelakoan per capita pobrezia.

Irabazleen ahoberokeria, horixe “gehiengo isilaren” isilak gutxien adierazten duena.