Eskuin-ezker

Eskuinak nahi gintuzten baina ezkerra trebe mugitzeko gomendatu orobat: eskuindar siniestroak nahi gintuzten.

Ez eta ikasten jakin ezean.

Jakineza, biderik zabalena ezta ezjakinek ere nahi ez duten puntura heltzeko. Are, puntu horretara heldurik, deus ez ikasteko ere.

Demokratikoki erabaki demokrazia ez dela euren kontua.

Ustelkeriak baita sudurra ere usteltzen du.

Ezagutu beharreko kontuen ezezagutzaren kulpa, ezagutzen ez dutenei bainoago ezezagutza tresna dutenei leporatu behar.

Izan pazientziadun, baina gutxi fida haien asmoetan pazientzia gutxikoekin: sufritzen jakin ezean, zein asmori eutsiko ote diote?

Erraten duzuna erraten duzula, ez ahaztu aditzen dutela aditzen dutena.

Ez dago nazio genetikorik. Baina nazio guztiek genesi arazoak (izan) dituzte.

Frogatzerik ez duena, edo begi bistakoa da edo zentzugabekeria. Gehienetan, begi bistako zentzugabekeria.

Mugak dira hain zuzen haragokoa erakusten digutenak.