Neoliberalen moldegintza

Gure aurreikuspenen arabera moldatu behar ditugunez helburuak, molda ditzagun aurreikuspenak geure helburuen arabera.

Zientziaren fruitua

Sagarra, zientziarekin estuen loturiko fruta, Ebari eta Newtoni esker. Bati begiak, bertzeari burua ireki omen zizkien.

Hain bihozbera elkarrekin beti, non bihozmin huts bihurtu zuten elkarbizitza.

Ideia estimagarriak izan ohi zituen, baina aski zen berak erratea arbuioak sorrarazteko. Eta bentrilokuo egin zen.

Marrantak gaztetua ni: atzera ere mukizu bihurtu nau.

Aforismogileon tentazio eutsiezinenetako bat: atzoko aforismoarekiko kontraerranak izorra ez biezat gaurko biribil hau.

Nostalgia, morboso ez izateko, etorkizun esperantzaz ondu behar.

Zein erraz suertatzen diren melenga maitasun poemak. Batere ez, ordea, maitasun bizipenak. Iraun artean, behintzat.

Inpresio malenkoniatsua dut malenkonia norbere bizitzaren engranajeak koipeztatzeko isuria ez ote den. Neurrian, betiere.

Gezurti kaskarrenek baizik ez dute noizean behin egiaren bat gutxienez erraten.