Botere adarrak

Diktadura konstituziodunetan, hiru adar autonomo omen ditu botereak, herritarrei adarjotzeko bere aise.

Atzo eta gaur berdin

Justizia, berdintzaile ofizioz eta benefizioz: alde batekoentzat ofizioz, bertzekoentzat benefizioz.

Eskuindar izan gaitezke kontzientzia-karga gehiegirik gabe, ezjakinak adimen-karga gutxiko jende izan daitezkeen bezala.

Estatu eta erakundeak, zeintzuen inguruko berriak, zenbat eta irudikaezinago, hainbat eta sinesgarriagoak diren.

Etsaiaren aholkua zakarrontzira, gordailura etsaiaren ikasbideak.

Oinarririk izan ohi dute topikoek, igeltsero plomuaren falta, ordea, altxaeran.

Barre egin nuen navarrrrista haien usteen lepotik, eta asaldatu zitzaizkidan Nafarroari egin niolakoan barre. Horixe barregarri!

Prebarikazioa justizia-prozeduren parte denean, gorrotoa mesede-trukea diru-egarria dituzte curriculumeko baremoaren aberasbide jujeek.

Hain hipokrita zintzo tolesgabea, non xalo ergeltzat jo zuten hipokritek.

Zenbatetan guztiok, nork bere opilari su hurbildu nahi surik izan gabe?