Jakintsu plantak

Jakinezak mutuarena egiten ez badu, mintzoaren teknikak jakintsuarena egin dezake.

Garaipenik garaiena.

Garaituen garaile-kontzientzia da garaileen garaipenik garaiena.

Gauza anitz egin dezakegu gratis et amore, bakar bat izan ezik agian: bizitzea alegia.

Ene ausardia bakarra, ausarkeriarik ez bada: koldar naizela aitortu izana.

Nori inporta katuaren koloreak, katuak saguak harrapatzen dituen artean? Baietz inporta izan katuari, bere kolorea higatu ahala!

Zure ondorioko baieztapenarekin guztiz ados. Zure silogismoko ondorioa, aldiz, guztiz arbuiagarri.

Euren ausardiarekin sinesten duten ausartak egon badaude. Ausardia zer den ezjakin, arruntean.

Herri urratsak:

oinatzak bihotzetan,

oin-hotsak kantan.

Txolarre aldra zalapartarietan txori bakoitza bere apetazko arabeskoei ekiten: gregario, baina zein bere aise dantzan eta txioka.

Ezkertiar zaharren azerikeria inozo hura, hasiberrien eskarmenturik ezaren ikasbide? Hau modu hau, atzeruntz aurrera egoki joateko!