Plastikozko artea?

Plastiko artea akats gramatikala baizik ez delakoan nengoen, baina artelan plastiko batzuk ikusirik, ez dakit jada zer pentsa.

Ez-legezko legeak

Zilegi izanen ez balitz hainbat lege haustea, zilegi izanen litzateke oraindik ere esklabotza.

Oi, Armstrongen oxigeno zama handia hara bidali zutenean! Alta, betidanik ohitura izan du gizakiak ilargian egoteko oxigenoa hartzen.

Immigrazio debekuen logika: zenbat eta papergabe gehiago, hainbat eta paper gutxiago bete behar eskulana merkatzeko.

Ad hominem argumentuak aurkitu zituenari ezta bururatu ere ez zitzaion ad mulierem argumenturik egon litekeenik.

Gure amesgaiztoetako protagonista diren ameslari horiek.

Onartu beharko da gizarte zibil deiturikoa dezente ez-zibilizatua dela hainbat aldetan.

Amebak bezain sinpleak diren pentsamoldeak, amebak bezain forma aldakorreko eta gure erraiei atxikigarriak.

Ez da nahikoa arrazoi izatea, inork onartu behar dizu: hots, ezinbertzekoa zaizu azaltzea, arrazoi izanen baduzu.

Badaude nartzisistak, zeinek agian gehiagotan jarri beharko luketen euren burua ispiluaren aurrean.