Nork bezatu nor?

Urte zaharra berri izan zenean, berak nahi zuen moduan etorri zitzaidan, nik ahal izan dudan neurrian bezatu dut ordea.

Metalezko larruazalak

Amoroski igurtzi zion autoak eskuineko hormari, eta honek, ero maitearen pare, fereka ubeldurak opari egin autoaren larruazalari.

Nork bere eskubidea begiak ixteko,

nork bere eskubidea behaztopa egin, erori

eta izarrak ikusteko,

nork bere eskubidea izar horietako bati heltzeko.

Goseak agintzen du mundu zabalean, ez, aldiz, gosetiek, gosetien aurka baizik.

Gobernuburu horiek, botere exekutiboan ezgai, justiziarenean jartzen dituztenak auzi politikoak. Botoak ala (in)justizia dute xede?

Esperma uso-mokoaren bidez txertatu omen zion birjina bati: merkatu zirrikituez jakinduria, kristoren etekina, ekonomiko eta historikoki, lortzeko!

Torturez galde, gorputzak isilduko ote dira infernu larriagoen beldur, baina gorpuak jada beldur gabe ozen mintzo dira.

Hain arduratsu gezurrik ez errateko, non sarri gezurtitzat jo behar baitzuten.

Kontraerrankorra da bizitza, baina errankor/koherente izan behar hari buruzko diskurtsoek, jai izanen ez badugu. Alta, jai zaleegiak gu.

Zenbat eta muga gehiago, hainbat eta mugagabeagoa kontrabandoa.