Memoria trastetegi bihurtu eta edozein gomutarekin estropezuka.
Month: abendua 2019
Probokazioak.
Sortzez depreziaturik daudenez doako probokazioak, mespretxagarriak dira.
“Poiesis”.
Neurtezinezko hitzekin neurtitzak sortzea, horixe agian garai bateko euskal poiesis.
Urrezko adina?
Denbora urre izanen balitz, ba ote legoke adindun pobrerik?
Ordenaren jainkoa.
Hasiera gabeko betierekotasunaren kaos mortal aspergarriari zaharkitze programatua ezarri zion Kronosek, eta bizitzaren ordena sortu.
Merkea, itsusia
Eder-usteak nahikoa du keinu doan bat itsusi agertzeko. Itsusiak kosmetika garestira jo behar du eder agertuko bada.
Koroadun errepublika
Erradazue, demokrata dotore horiek: diktadore zenduaren izen-mailegariek demokrazia hau ekarri baziguten, nola ez sinetsi errege batek koroadun errepublika ekar diezagukeenik?
HIES ideologikoa.
Teknokrazia, Giza(rte) Immunoeskasiaren Birusa inokulatzen duen ideologia, bera ez bertze guztietan.
Ultramontanoak.
Hedabide espainiar kanonikoetako solaskide gehienei tertuliano izena dagokie hobekien: Tertuliano apologista zaharraren hitz jario distirantarengatik ez preseski, baina bai ultramontanismoaren aldetik.
La traviata proba.
Politikari sasi-zientifiko horiek, uste dutenak proba-eta-kale-proba-eta-kale metodoa La traviata abestu arte tximinoari egurra ematean datzala.