Ipurtargiak (haikua)

Ipurtargiak:

Oi, lur-izarrak

gau minean dirdaika!

Erdipurdiko argiak

Buruargiak baino erdipurdikoak nahiago dituztenak.

Errealitate printzipioaren faltsukeria: errealitateak ez, gutxi batzuek agintzen dute.

Inozo batek ere ezin du inozoarena egin.

Adinak maskurrez betetzen gaitu, gure maskurrak tripaki jangarriago bihurtzen dituen ber gisan.

Autozentsurak kriptikotasuna du kritikotasunaren aterabide bat, askotan zelai zabalagoetara irekitzen dena.

Euskaldun baino lehen, libre; areago, libre naizelako naiz euskaldun. Baina instantzia gehiegitan ezin dut euskaldun libre izan.

Borondate oneko zenbat boto-emaile borondate gaiztoko zenbat boto-eskaleri!

‘H’ hizkia, euskaldunon egoaren altxagarri.

‘Eufemismo’ terminoa bera tabu bihurtzen denean, erregearen biluzia aldarrikatzea bezala da.