Itzalak bere argia du, baina fokuak ematen dio luzera.
Jakinduria
Bi bat
Bi gauza bat egiterik ez, biak bereizi ezean.
Burugabekeria burudun
Hanka sartzea hankek buruari ez obeditzeagatik, malo. Are okerrago, buruari obeditzeagatik denean.
Garaiz kanpo.
Atzo berandu, gaur goizegi, nola bizi garaiz gero?
Gako logikoa
Kontraerranen logika ezkutuan dago gakoa.
Sen arruntaren mailakoa
Haren jakinduria sen arruntaren mailakoa zela-eta, bere burua bertze inor baino jakintsuagotzat jotzen zuela leporatzen zioten.
Hau jakinduria!
Badakit, ongi jakin ere, ni naizela politikan jakitunena. Tamalez, bertzelako pentsaerako milaka mila lagun dabil gure munduan berdin uste duena nork bere buruaz. Tira, norberaren jakinduria mailan behintzat ados guztiok.
Ontsa buru-hiltzeko programa
Zure buruaz bertze benetan egin nahi baduzu eta ongi programatu, ezgai ezazu, hasteko, zeure biziraupen sena. Bertzela, lortu bai agian, baina programaren hutsegiteari esker.
Galbidea
Era anitz dago irabazirikoa galtzeko, eta errazena, galdutzat ematea: baita merkeena ere, hots, karioena gero berreskuratzeko orduan.
Arrainaren jakinduria
Denak ados arrain baten antza mugitzen zelakoan jakindurian: anitzen ustez jakinduriaren ozeanoan, bertzeen ustez jakinduriaren kontinentean.