Lege berdintasuna.

Denok berdin legegilearen aurrean, batere ez berdin lege-zaindariaren aurrean.

Diskriminazioa

Neurri indiskriminatuak oro, indiskriminatuki diskriminatzaile.

Lortuko bazenute mundua geldiaraztea, geldiezinean mugituko litzateke nirea.

Heriok berdintzen gaituelakoan al zaude? Alta, askoz gehiago hiltzen da pobrezian aberastasunak itota baino. Baita ehunekoetan ere.

Gizalegeari muzin egiten dioten legeak hobesten dituzte gizaki hainbatek.

Hain garestia, non hura zen haren xarma nagusia: garestitasuna.

Plutokraten jakinduria eskasa aritmetikan: batuketa eta biderketa dibidenduetan ongi, baina kenketa zatitzaileetan baizik ez.

Auto-aginduz goseak oheratzen direnek eta hetero-aginduz goseak kalezuloan lo egin beharrekoek, jaki berdinez amets?

Per capita errenta, errenta handienetako buruek gehien maite duten indizea, euren errentek pobretzen dutelakoan per capita pobrezia.

Badakigu: goian dagoena, hondokoen bekaizti betiere, behekoek ezin dutelakoan erori.