Elkarrekin zintzo

Zuk eta biok, bale nork bere buruari engaina diezaiola, ez ordea elkarri.

Hobeezina.

Guztiz txar dena bakarrik dugu hobeezin.

Esperientziak baino askoz eskarmentu gutxiago metatu ohi ditugu.

Onberatasunetik onkeriara irristada erraz inozo hori.

Inork bere azken hatsa eta hurbilekoei hats berriak ematerakoan bihurtzen da bera norbait.

Maitatua hiltzen duten amodioak, eta are gehiago ere: maitatuari gorroto diotenak.

Zein fier eusten diogun egunerokotasun hutsalari, jakinik ere hutsaltasunak suntsituko gaituela! Alta, horri esker gaude oraindik ere kalaka ematen.

Euren gorroto gorrotagarriei amoroski eusten dietenak.

Cogito ergo sum: trile jokalariek baizik ez lituzkete lekuz aldatuko bi aditzak.

Eutanasiaren aurkakoentzat, eri hiletsiak oro kontzientziagabeko haur.