Gorrotagarriak konparazioak oro… sinesgarriak diren heinean. Bertzela, barregarriak.
Eztabaidak
Kritikotasuna, kriptiko.
Autozentsurak kriptikotasuna du kritikotasunaren aterabide bat, askotan zelai zabalagoetara irekitzen dena.
Partekatze eramanezina.
Elkar ikusezina baizik ez omen zuten partekatzen. Ez zen gutxi, gero!
Probokazioak.
Sortzez depreziaturik daudenez doako probokazioak, mespretxagarriak dira.
Hari-haritik
Hari-haritik ekarririko argumentuak, josi ezinak gero.
Polemista
Polemista aparta berau: eztabaidatu bainoago, negoziatu egiten zituen argumentuak.
Desadostasun
Batere ez ados zure azkenarekin, baina ongi idatzi duzu, indartsu eta iradokitzaile. Mila esker, ederki lagundu dit zureen aurkako neure argumentuak fintzen.
Lastozko argudio-kaierak
Lagunaren begiko lasto izpiaren gaineko argudiatze itsuak.
Soraio
Aspalditik hona galtzen joan naiz bertzeren batengandik jasotako irainen aurrean mintzeko gaitasuna. Ez dakit on ala txarra den niretzat. Bai dakidana da txarra dela bertzearentzat.
Nahiko(a) nuke.
Ez nago ados, baina zuk arrazoi izatea nahiko(a) nuke nik: ez izatekotan ere, nik nahiko nukeena zuk berba egitearekin, nahikoa.