Premisa nagusia, goebbels-tarra, errefusaezina: 3 + 3 = 5. 3 ematen didazu, eta abako hutsezinak erraten diguna: 2 gelditzen zaizu.
Pentsamoldeak
Jende kontsekuente
Kontsekuente ez den jendez beterik dugu mundua, onerako ala txarrerako. Txarra bai, behintzat, nork bere inkontsekuentziekin kontsekuente izateari eusteko grina.
Aurre-iritsiak
Aurreiritziak, judizioa baino lehen gure burura iritsitako usteak.
Lekurik ezean
Topiko atopikoak, are ektopikoak ere, non nahi.
“Bien-pensant”ak
Ongi pentsatzera deliberaturik, zenbat pentsamendu onbera ez ote nuen errefusatu behar!
Zalditik erorikoak.
Jainko kristauaren bideak, atzemanezinak, omen. Damaskokoak, aldiz, haluzinagarriak.
Katoliko egon
Ez dakit erlijio eta sekta guztiek ez ote duten oso katoliko izan nahi.
Utopikoa
Utopikoa bere ez-leku bila beti eta ez dagokion tokian maiz.
Aniztasunaren ikuskerak
Aniztasun ikuskera anitz: aniztasunari uko egitetik hasi eta aniztasun ideia bakarreraino. Bien arteko aukera sorta zabalean ez ote dagoen aniztasuna susmoa dut.
Kreazionismoa
Ez jainko batek, Parmenidesek sortu zuen mundua: baita ezerezari ere eman zion bere zera.