Heroiak izanen balira, Carlylerenak, Historiara pasatu direnak, ala Brechtenak, haiek pasatu direneko Historia anonimoki egiten dutenak?
Historia
Eskubide historikoak.
Eskubide guztiak, historiko: Historiaren Urrobin agertu/desagertzen dira. Horrexegatik egon behar adi errekaren agorraldiei.
Gurpilduna.
Gurpilduna da ahanztura: iragana, zenbat eta ahaztuago, hainbat eta errepikakorrago.
Iraganaren profetak
Historia filosofo gehienak profeta bokaziodun.
Moderniaren orgiak eta gero hau
Posmodernia: moderniak eraginiko bestondoa.
Mugarriak
Mugarri historikoak, historiko. Hots, auskalo zer den izanen geroko historia. Baina mugarri ere badira. Hots, ez ikusiarena egiten duenak haiekin oztopatuko da. Historikoki.
Historizismo bakoitzaren historia
Historia jakineza, historizismoen haztegi emankorrena, ia hutsezin; historia ezagutza haien aurkako botikarik onena, ez beti hutsezin.
Euskal Herri mitikoa
Euskal Herriak gerra guztiak galdu ditu 1054ko Atapuercakotik hona, gerra karlistak izan ezik.
Historia berdaderoa
Nork bere Historia, gezur berdaderoa. Eta guztion etorkizun ezbaikoa.
Negazionistak artazuriketan.
Neketsuegia euren krimen-zuriketa. Berau artazuriketako elezahar bihurtuz egiten diote uko, beraz, krimenik egin izanari.