Iritzigile kanonikoen metodoa: “Pentsatzen dudalakoan nago; beraz, banaiz”.
Kazetaritza
Egia hutsak.
Hedabide handiek hain dotore jantzitako egia biluzi horiek.
Sinesgarritasun
Mesfidati ni, oso, hedabide handien agenda eta edukiekin. Egunen batean niri interesatzen zaizkidanak zabalduko balituzte, ene usteekin mesfidatzen hasi beharko nuke.
Mika kazetaritza
Erratza pasa gabeko zoruetan politikarien zabor-bitxi distirantak lapurtzen dabilen kazetaritza eredu hori.
Lan-eskaintza iragarkia
Puntako komunikazio-agentziak bulografo bat behar du. Ebaluatuko dena: ausardia, irudimena, gaurkotasun nazional eta nazioartekoa, esperientzia sare sozialetan. Sinesgarritasuna, agentziaren kontura. Eskabideak eta curriculumak, 023104 posta-kutxan.
Inuzenteen eguna
Espainiako hedabide handien ustez, egunak oro abenduaren 28a.
Izpiritu kritiko eraldatzailea
Hedabide handi gezurtari horiek: hain kritiko gertatzen denarekin non zuzen-zuzenean errealitatea eraldatu behar duten.
Hain konfidentziala…
Konfidenteen webgune horretan, konfidente bakoitza ahaleginean nola saldu berak bilduriko zurrumurruak karioago asmatzeko.
Kontserbazionismoa?
Gorroto diet guztion garunak zoldaz betetzeko alimaleki lan egiten duten hedabideei: fauna espainiar eraginkorra, berauek.
Azpijoko semantiko supremazista?
Gorenagoa, ote, “hondamendi humanitarioa” “giza-hondamendia” baino, semantikoki? Ala zurien gorentasunaren adierazpidea, sub limine?