Bihotzak erran dizu
zertxobait idazteko,
ez dizula erran ordea
ez zer ez eta zertaz ere.
Haztamuka hasi zara orduan
zeure buruan,
eta zeure burugabekeriarik
xarmagarriena idatzi duzu,
agian.
Kritikagintza
Irakurketak.
Testu baten irakurketa maltzurrek ez dute zertan izan irakurketa txarrak.
Gaurtik kontatu.
Eleberri historikoak, onak zein kaskarrak, egilearen gaurkotasunetik asmatuak beti, baita geroko irakurle bakoitzarenetik ere.
Erran biribilak
Zure erran biribil horiek, berez errodatzen hasteko gai eta zein sakonunetan amaituko diren ez dakizula.
Oker irakurri.
Idazkera unibokoek bakarrik sor ditzakete irakurketa okerrak.
Hau logura!
Benetan uste al duzu liburu baten arrakastaren gailurra oheburuko liburu bihurtzea dela?
Hitz tiratzaileak
Aforismoen punteria euren ibilbide parabolikoetan datza.
“Poiesis”.
Neurtezinezko hitzekin neurtitzak sortzea, horixe agian garai bateko euskal poiesis.
Orri elitistak
Ez zuen arrunkeriarik idazten, bai ordea jende arruntari begira. Baina ezin saldu, harik eta merkatu zabaleko atezainen eliteak orriak ireki zizkion arte.
Interesa(k)
Interesik batere gabeko idazkiak eta ezin idatzizko interesak.