Errazegi agintzen dutenek erraz egiten dute dena zail.

Barne Ministerioetako goi kargudunak, ezjakin halakoak, berauek jakin nahi duten guztiaz, eta horretaz baizik ez, jakitunaren plantan. Nekez, baina plantaren adar batean planta diezaiekegu urka-bilurra, bertzeok jakitea nahi ez dutena geuk jakinez gero.

Paradisua agintzen digute ideologia guztiek, pasabide-purgatorio batetik bertzaldera. Eliza katolikoak (ideologiadun aurreratuena, antza) purgatorioa kendu zuen. Eta hara non bihurtu diguten ideologia boteredunek purgatorioa infernu.

Premisa irrealetatik, ondorio ezin errealagoak atera, guk pairatu beharrekoak gero.

Askoz politikari gehiago konbertitu dira zaldira igotzean, zalditik erortzean baino.

Pitxerra kirtenetik edukiko ote duzu, baina ez fido: sudurretaraino heldu zaigu zure kirten-lurruna.