Arrazoiak vs. motiboak.

Politikan ere, gehiago agintzen dute motiboek arrazoiek baino.

Errealismoz erranik

Errealitate printzipioaren faltsukeria: errealitateak ez, gutxi batzuek agintzen dute.

Goseak agintzen du mundu zabalean, ez, aldiz, gosetiek, gosetien aurka baizik.

Norbaitek errana mezara omen badoa, nola men egin hari kristau gehienek, bertze erlijioetako guztiek, agnostikoek edota ateook?

Pentsamenduak mintzoan eragiten ez duenean, mintzoak eragiten du pentsamenduan.

Jakiak lapurtzen dituena da agintedun, berak bakarrik bana ditzakeelako jaki apurrak.

Ebazpena behin-behinean eskatu batek, behin betiko bertzeak, eta Salomon jakintsuak behin-behinean behin betiko ebatzi zuen.

Ez, ez dira guztiak berdin. Politikari anitzen erroreak onuragarriak dira. Bertzeenak, kaltegarriak.

Paternalismoak infantilismoaren beharra du, bai “gurasoena”, bai “seme-alabena”.

Ezkerretik zero eduki eta ezkerreko zeroa izan nahi.