Dudazko kartesianismoa

Kartesiano horiek, zeinek, metodikoki, sinetsi nahi ez dituzten gauzak bakarrik jartzen dituzten dudapean.

Anonimatua

“Berdin du nork erran, dioena da kontua”. Hain ziur? Nork dioen topiko hori, inozokeria ala maltzurkeria den jakin dezakegu.

Nork bere Historia, gezur berdaderoa. Eta guztion etorkizun ezbaikoa.

Psikologoarengana eraman dut ene ispilua: hainbat urtetan asmatu gabe zer zuen, eta, hara!, dislexiadun suertatu zait.

Inork ez dakigu inoiz ziur nola, eta askotan ezta zer ere. Eta zer?, zer ez, behintzat, jakinez gero.

Jainkoa dadotan ari ez. Bai, ordea, gizakia, kristorenak asmatu zituen arte: hari atxiki gero, eta bukatu zoriaren ziurgabetasuna.

Itzalik gabeko paisaia eguzkitsua, euskarririk gabeko paisaia mentala, hutsa.

Hezkuntza maieutikorik onena, ikasleari galderez jostea ez, solaskideok dituzuen dudei jaio-bidea irekitzea da.

Agnostiko batzuei ateoi buruzko hainbat diagnostiko irakurrita, ez dakit nik zer diagnostiko eman agnostikoei buruz.

Sakon pentsatzen jarrita den dena koadratzen bazaizu, kontuz zure buru karratu horrekin!