Katoliko egon

Ez dakit erlijio eta sekta guztiek ez ote duten oso katoliko izan nahi.

Laiko, arima eta gorputz

Lehen, badaezpadako kristau gisa joaten zen jendea eliz aitorlekuetara; gaur, erlijiosoki joaten gara osasun aitorlekuetara oso katoliko ez gaudela.

Esperma uso-mokoaren bidez txertatu omen zion birjina bati: merkatu zirrikituez jakinduria, kristoren etekina, ekonomiko eta historikoki, lortzeko!

Fede-egien frogarik ez, baina zenbat fede-proba ez ote duten otzan jasan behar fededunegiek!

Gaizki-pentsatzaileak bakarrik saia daitezke Jainkoaren existentzia frogatzen.

Zenduen eguna ez, Eliza baten saindu guztiena jaiegun agintzen duen estatu laiko bat.

Ama birjinen nazioarteko eguna, gaur?

Jainkoa dadotan ari ez. Bai, ordea, gizakia, kristorenak asmatu zituen arte: hari atxiki gero, eta bukatu zoriaren ziurgabetasuna.

Errege-erreginen gibel-erraiak, euren kuttuneko santutegiei opari: mokadu gozoa elizjendearentzat, alafede!

Existitu, existitzen du Jainkoak: tautologia gisa.