Monterrosoren dinosauroa ez al zen potroetaraino jarri ohi gaituzten mandeuli horietako bat izanen?
fikzioa
Gizalegez
Bertute estimagarria da zintzo kudeaturiko hipokrisia.
Agamemnonenak
Urdezainik behar du kontalari onak bere egiak adierazteko. Bertzela, pentsalari ona izanen ote dugu, kontalari eskasa ordea.
Mirail traidorea
Mirailaren traizioa ez datza zimurretan, baizik eta zure ezkerreko atalak eskuineko eta eskuinekoak ezkerreko bihurtze horretan.
Oharra irakurleari
Zu zeu errudun, ene irakurle hori, gertaera edo pertsona errealen kontakizunik/argazkirik antzematen baduzu narrazio honetan.
(Dis)Gustuko historiak
Ezin idatzi historia denon gustura. Baina bai arestiko historia, askoren disgustura: protagonista batzuen gustura bakarrik.
Idazle alferrak?
Trama ehuntzeko lan osoa irakurleei uzten dieten eleberri molde berri horiek.
Fikzio hori
Errealitateak fikzioari gaina hartzen diola diote kazetariek, idazleen mendekuz. Kontsola bitez: hedabideetan dago fikzioa.
“Girigintza”
Jatetxe horiek, hain epika edota lirika fina saltzen dutenak euren web orrietako aurkezpenetan!
Autofikziozko iratzargailua
Esnatzerakoan pizgarriago zaizkit ene kordakoen alarmak berauen txaloak baino.