Historia berdaderoa

Nork bere Historia, gezur berdaderoa. Eta guztion etorkizun ezbaikoa.

Topiko-eraikuntza

Oinarririk izan ohi dute topikoek, igeltsero plomuaren falta, ordea, altxaeran.

Gezurti kaskarrenek baizik ez dute noizean behin egiaren bat gutxienez erraten.

Egiantza gutxiko egiak asmatzen dituzten bertsioak, egon, badaude. Horien aterpean gozo dabiltza apopilo gezurrik galantenak.

Bi egia-erdi saldu zidaten eta bi gezur ekarri nuen etxera.

Izan zintzo eta ez ibili gezurretan zure buruarekin: aitor ezazu zein maltzur izan beharko egia betiere errateko.

Egia maitatuenak ditugu askotan geure gezur maitagarrienak.

Egia erratera, ez nauzue edozein egiaren zale. Are gutxiago nornahiren egiaren zale.

Egiazale oso, gorroto zituen gertaeren kontuetan; egia erdiaren zale mokofin, maite zituen gertaerenetan.