Inuzenteen eguna

Espainiako hedabide handien ustez, egunak oro abenduaren 28a.

Jibaroen paradisua

Buru jibarizatuak, non ideia bakar bat sartzen den, iritzi-guruek inokulatua.

Hedabide handi gezurtari horiek: hain kritiko gertatzen denarekin non zuzen-zuzenean errealitatea eraldatu behar duten.

Gerrazalekerian kokatu da kazetaritza espainiar kanonikoa. Baina hauxe haren arazoa: nola irabazi bataila bat gerrarik ezean?

Oi, nazionalismo espainiarraren doktrinatzea eskolan eta ikasleei baizik ez balitzaie eginen!

Gorroto diet guztion garunak zoldaz betetzeko alimaleki lan egiten duten hedabideei: fauna espainiar eraginkorra, berauek.

Hedabideek faltsukeria Egia gisa gurtzen dutenean, egiak erratea, beti, demagogia.

Kontuan hartzen ez diren idazleak euren meritu faltan, eta kontuan hartzen ez diren idazleak kritikagileek merituak lortu nahian.

‘Beldur’ hitzaren zentzu beldurgarrian, ez dakit beldurgarriena ez ote den beldurraren kulturaren aurreko gure beldurra.

̶ Etxeko zaborra sailkatu eta birziklatzea, hori dut gustuko!

̶ Eta telebistako programa hori?

̶ Zer ba? Usain ona dario!