Ahanzturaren planetan hiltzen gara memoria bizia zaindu nahian.
heriotza
Espanturik?
Baliteke heriotza zuregana bat-batean espanturik gabe etortzea. Espantua, agian, zure senide, lagun, etsaiena…
Ontsa hiltzeko bidea, gaur egun.
Bizi zaitez osasuntsu, osasuntsu hil nahi baduzu.
Katuek zazpina bizitza, omen
Auskalo zenbat katuren bizitzak gainditurik, zakur baten ahutzetan hil zen.
Hiltzen duten maitaleak
Heriok bizidunok maite gaitu. #haika
Azken nahia
Gehiago gorroto zion paperak betetzeari heriotzari baino. Izan ere, paper anitz sinatu zuen hala moduz bizi ahal izateko. Baina hiltzeko ere paperak sinatzeko eskatu ziotenean, “Aski da!” erran, bere azken nahiari eutsi zion eta testamenturik gabe hil.
Herio, berdintzaile?
Heriok berdintzen gaituelakoan al zaude? Alta, askoz gehiago hiltzen da pobrezian aberastasunak itota baino. Baita ehunekoetan ere.
Eutanasia
Heriotzaren teknikariei: zuen esku nola hil daitekeen inor hobe, baina noiz hil moriturien esku dadila.
Bizitza-zukua
Azken unera arte bizirik iraun nahi zuenez, hil ere, bizi izan bezain gogoz hil zen.
Heriotza garbia
Asepsiak denok hiltzea nahi duten horiek, aurretik gezatasunaz hiltzen ez bagara.