Isildu nahia

Zerbait errateko duenak bakarrik izan dezake zer isildu nahi. #haika

Hitzontzikeria

Hitzontziak, buruargi agian, baina buruargi hits-ontzi.

Barrukiak borborrean eduki bai, baina pausatzen uztea hobe gero, ahora eraman aurretik.

Hitz jarioa, maizegi, zerbait isildu nahiaren mozorro.

Ez zen infusio sentimentalen zale, edabe serioagoak nahiago zituen.

Hitz eskasetako hitzontzia.

Diskurtso baten distirak ez du zertan bermatu haren araztasuna: purpurinak zipriztinduriko herdoilari ere distira dario.

Politikari askok duten bertutea: euren buruari ez aditzekoa. Bertzela nola erran hau gaur hemen, atzo han erranaren ondoren?

Gaitz erdi nekeak hartu izan balio gaina jendea nekatzen! Ba, jai, berak hartu zion neurria bere nekeari, bertzeena neurtzeko ezgai.

Ordezkaritza zabalena, zeren ordezkagarritasunari esker lortzen da?