Idazle onak ongi ibili ohi dira subjektuak eta objektu zuzenak zehazten. Sarri, ordea, oker, zeharkako osagarriekin: aditzarena nori egokitzerakoan alegia.
idazleak
Idazle zaila
Barne bizikidetza latza, bere baitan zeraman idazlearekin! Are latzagoa haren bikotekidearena!
Testuen dasta
Denen gustura idazteak, zaporerik bai?
Jaiotza tonbola
Zorte txarra La ciudad y los perros eta Conversación en La Catedral bezalakoena, Vargas Llosaren aitatasuna haiei tokatzea!
Eta gero gerokorik ez.
Aforismo-zeroa: biribilena, giza jakinduria osoa biltzea nahi zenukeena, zeure epitafioa izan litekeena.
Kritikagintzaren demerituak
Kontuan hartzen ez diren idazleak euren meritu faltan, eta kontuan hartzen ez diren idazleak kritikagileek merituak lortu nahian.
Idazteko zergatien garrantzia
Zergatik idatzi ez jakin hasten ohi zen idazten, eta jarraitu jakin arte. Orduan, lasaiturik, paperontzira botatzen zuen idazkia.
Autoaipuak
Inork ez zituenez bere ekarpenak aipatzen, berak ere, inoren ekarpenak baino, bere burua aipatu nahiago zuen.
Nor bere arruntean
Hain zorrotz bere irakurleekin, inora ere ez zen helduko. Batik bat, zorrotz itxurapean hain mezu arruntak eskaintzen bazizkien.
Saltsa ontzaileak
Politika sukaldaritzan ongailuz pil-pil dauden iruzkingileek, koilara bat kare, bertzea area: bazter-saltsa, haiena!