Politikagintza, berez, determinismoaren aurkako giza determinazioa da. Alta, zenbat ideologia determinista politikagintzan!
ideologia
Zientzia politiko-estrategikoa.
Atzo iraultzaren espero zientifikoan zebiltzan alderdi haiek, aldakuntza politiko sakonen espero zientifikoan jarri dira gaur. Lehen bezala, euren zientziatik kanpo mugitzen den oro arbuiatzen dute. Hobe beharrez euren ustez, bertzela euren mundua akabatuko litzaiekeelakoan.
XXI. mendetik XIX.era
Men(d)ekoon geldiezina: bi ‘X’ arteko ‘I’aren pendulu higiduran gaituzte.
Neo bila, atzera
Neo guztien argumentuak, zaharminduak.
Deszentratu horiek
Euren burua zentrokotzat jo, ez eskuineko ez ezkerrekotzat, eta eurena ideologiarik ez dela diotenak baino deszentratuagorik?
Ustezko harrizko errealitatea
Errealitatean harri asko dago, bera harrizkoa zertan izan ez, eta betiere harriak eraikuntzan bezain moldagarria.
Gaixotasun nazionalak?
Nazionalismoak gaixotasun gisa diagnostikatu zituztenek euren burua diagnostikatu ondoren egin zuten aurkikuntza.
Justizia egarria berdindu
Justizia aurreko denon berdintasuna, maizegi, epaileen injustizia egarria ederki berdinduta ikusgai.
Post-intelektualak?
Paradigma guztien ostean/‘post’etan omen gaude. Hau post-betekada hau! ‘Neo’ak sortzeko konpost ezin emankorragoa!
Zaharrak berri
Bere etimologiaren despit, ‘neo’: ezer berririk ez, zaharra berriro ere baizik.