Irakurle aniztasuna

Mota anitzetako irakurleak daude: bertzeak bertze, bestsellerren irakurle amorratuak, aforismoak luze suertatzen zaizkienak.

Zalantzazko irakurketak

Irakurketa unibokoen aldekoek sortu ohi dituzte ekiboko gehienak.

Irakurleok geure adimenaren arabera ulertu ohi ditugu testuak; alta, batzuek beren nahimenaren arabera baizik ez dituzte ulertzen.

“Berdin du nork erran, dioena da kontua”. Hain ziur? Nork dioen topiko hori, inozokeria ala maltzurkeria den jakin dezakegu.

Hain zorrotz bere irakurleekin, inora ere ez zen helduko. Batik bat, zorrotz itxurapean hain mezu arruntak eskaintzen bazizkien.

Hitzez hitz irakurri, baina hitz gakoak irekitzen jakin behar, interpretazio eremu zabaletara irten nahiez gero.

Zu zeu errudun, ene irakurle hori, gertaera edo pertsona errealen kontakizunik/argazkirik antzematen baduzu narrazio honetan.

Erraten duzuna erraten duzula, ez ahaztu aditzen dutela aditzen dutena.

ABCko azalak guztiak gogoz irentsi eta sendo alfabetaturik zegoela sinetsi.

Baltsamo da irakurketa, bai horixe, gorputz minduarentzat, baina irakurlearen jarrerak eragiten du horretan aurretik.