Ontzeko esperantza

Bere lan txarrena izanen zelakoan zegoen, eta pozik.

Ilusio hutsetatik haratago

Birjintasuna gorde artean, den-dena ilusio; hura galdu ondoren, itxaropenez haurdun betiko.

Huts egin didazu eta desengainatu nauzu.

̶ Sentitzen dut. Mila esker!

̶ …?

̶ Aitortzen duzulako esperantzarik pizteko gai izan nintzaizula.

Zahartzea zure bizitzaren une esperantzatsu hori iristeko berandu dela konturatzea da: inoiz ere benetan amestu ez zenuen une hura.

Arrazoia irrazionalki sortu den bezala, historia ere iraganaren ahanzturatik eta etorkizun egarritik sortu da.

Iratxo-pentsua, errata bat agian, baina barne-gogoeta itxaropentsu herratua ere izan daiteke.

Inork inoiz eginen ez dizun dei horren zain, inork inoiz itzaliko ez dizun ilusio horren aterpean.