Ezjakin orojakileak

Ezjakin orojakileak, gutxien ikasiko dutenak eta gehien irakatsi nahi.

“Ezjakinkeria”, hain arrunta ere bai

Konnotaziorik gabeko ‘ezjakintasun’ hitzaren parean, zergatik ez ‘ezjakinkeria’, jakin nahi ez dutenen ezjakintasunaren adieran?

Kultur eza masiboaren magma hori, negozio haztegi hobeezina lixtoentzat.

Historia jakineza, historizismoen haztegi emankorrena, ia hutsezin; historia ezagutza haien aurkako botikarik onena, ez beti hutsezin.

Jakinezak mutuarena egiten ez badu, mintzoaren teknikak jakintsuarena egin dezake.

Euren ausardiarekin sinesten duten ausartak egon badaude. Ausardia zer den ezjakin, arruntean.

Jakin-minaren musuak, ausiki beti. Eta pozoitsuak, Ebaren kondairak jakinarazi nahi digunaren arabera.

Inoiz noraino ez jakin eta, horratx!, ezjakinaren mugak harago eramaten bizi gaitu helmugak.

Demokrazian, ezkonezin, ote, jakineza ordezkagarritasunarekin? Bikotearen oinordetzan dugu arazo.

Kukuak habi ezjakinetan txitatzen omen ditu bere arrautzak; holaxe sinesmen erosoak hautatu ere jakineza bere beldarrak goxo babesteko.