Ontzeko esperantza

Bere lan txarrena izanen zelakoan zegoen, eta pozik.

Goreneko demokrazia

Demokrata sutsua goreneko epailea: diktaduran inor ohartu gabe gertatu zatekeen; demokrazia honetan, antologietan lortu du lekurik.

“Zenbat buru, hainbat aburu”, omen. Baina hainbat buruk a-burutzat jotzen gaituzte bertzeok.

Gorroto diet guztion garunak zoldaz betetzeko alimaleki lan egiten duten hedabideei: fauna espainiar eraginkorra, berauek.

Gastuetan, telebista zuen kultura ataleko partidetan. Ezin ni haren mailan kulturaz mintzatu, ataleko ene gastu altuagoen despit.

Getariako txakolina, bikaina! Erran genien eta hura prezioa geroztik! Arabako bertze bat edaten hasi, eta isilik gu zein ona den!

Gurutze batekin sinatu beharreko agiri politiko horiek. Askatasuna bide, aukeran, gurutze grekoa ala San Andresena.

Aforismo-zeroa: biribilena, giza jakinduria osoa biltzea nahi zenukeena, zeure epitafioa izan litekeena.

Nor bere buruaren kritikaririk ezegokiena dela jakinik, zertarako eskatu inori autokritika?

̶ Ur botila bat ekarri dizut.

̶ Mila esker. Ginez beterik, espero dut.