Sublimeki “sub limine”

Txaloak publizitate subliminalari uko egiteari! Onargarri, ordea, sub limine-ko hainbat mezu politikok subliminalki islatzen duten adimena?

Urre patroia

“Denborak urrea balio du” ideia gizarteratu zenetik hasi zen denbora debaluatzen.

Sanoegia, egiaz sano?

Ezohiko lorpen bikainak, eguneroko lan-errutinaren kume.

Nik, erromatarrak, aukeran, eroak nahiago ditut, zentzudunak baino.

Poema baten ametsek logura sortzen dutenean, loto-lorearen humus lokaztua poeman edota irakurlearengan.

Inoizko eleberririk onena, duda izpirik gabe, nirea, buruan dudan eta inoiz plazaratuko ez dudan horixe. Zuen kaltez betiere.

Gaixobera da, berez, osasuna, eta, bapo jartzeko bazkari batek bezala, guztion sasoi onak jaki gaixoberak ere eskatzen ditu.

Zergatik izanen ote da probetxagarriagoak direla antxume/arkume/txahal/txerrien garunak, politikari anitzenak baino?

Nago nekez idatz daitekeela narrazio on bat hitzekin jolasean: jokoan jarri behar hitzak horretarako.