Terrorismo zale antiterroristak

Terrorismotzat jotzen duten guztia terrorismo izanen balitz, antiterrorista horietako zenbatek jarraituko luke terrorismoa salatzeko gai?

Arrazoi hutsalak

Arrazoi faltan arrazoiak fabrikatzeari ekiten diotenei lehengaiek egiten diete huts.

Gaitz erdi herriko ergelak baizik ez balu ahalmenik izanen ergelkeriak errateko!

Egon, badago jenderik ere denok ilargiari beha jartzea nahi duenik eta bere behatzari ez erreparatzea.

Populismo garaiotan, kopeta-bidun ditugu fronte bakarraren zaleak.

Hain begi-bistakoa, non ezin daitekeen egia izan. Horixe ez ikusiarena egiten duenaren ikusmoldea.

Hedabide handi gezurtari horiek: hain kritiko gertatzen denarekin non zuzen-zuzenean errealitatea eraldatu behar duten.

Halako bestondo batez ari izanen bailiran Postongizate Aroaz mintzatzen diren horiek.

Maitagarri izan behar du lege-kode batek, ‘gorroto delitua’ tipifikatu badu.

Espainiar Justizia sistemaren garun distirantak kanpotik iristen zaizkion argi-izpiak barneratu ez, baina den-denak kanporatzen ditu.