Abertzalekeria

Nork bere herria maite dezake, noraino eta herrikideak gorrotatzeraino.

Nartzisismo maitagarria?

Zu ezagutzea zu maite izatea bada, zer ote da nosce te ipsum hura?

Zure erara maite zenuen hark bere erara ere zu: konbergentzia ezinean.

Heriok bizidunok maite gaitu. #haika

Amoroski igurtzi zion autoak eskuineko hormari, eta honek, ero maitearen pare, fereka ubeldurak opari egin autoaren larruazalari.

Ezin dut mespretxatu euskara maite ez duena; orobat, are gutxiago estimatu euskara gorrotatzen duena.

Norbait edo zerbait ezagutu gabe harekin maitemintzea maitasun platoniko baldin bada, gorroto platonikoaz ere mintza al gaitezke?

Zer izanen luken itsasoa

ertzik batere gabe,

aparraren xera zuririk gabe?

Hire larrua ukitu,

hire begietako irri zuria laztandu

nahiago dinat,

hiregan ito baino.

Hain amultsu maiteminduak euskararekin, non beraien ama hizkuntza hau familia giro goxoan hil dadila nahi duten.

Hain bihozbera elkarrekin beti, non bihozmin huts bihurtu zuten elkarbizitza.