Egien akatsetako bat.

Agitprop mota guztiek diotena diotela, milaka mila aldiz errepikaturiko egia bat ez da gezur bihurtzen.

Pentsatzeko nekeak.

Pentsamoldeak, zeinen indarra hainbat jendek pentsatu nahi ez izatean datzan.

Nekagarri nekaezin horiek, hain maiztarrak beti kalaka bera denon belarrietan paratzen.

Hau paradoxa! Burua nekatzen zitzaionean ere burugogorkeriarako joerak hartzen zion gaina.

Hara! Egun osoa burujabetzaz hausnarrean, eta burua galdu dudalako sentsazioa jabe egin zait.

Garuna hodei beltz lodi batez beterik hasi eguna eta, egun goibeleko atsedenaren nekearen nekez, lanari ekin behingoz.

Nekaezin galdezka bizitzari zentzurik bazuen, eta ihes egin zion neka-neka eginik bizitzak.

Hau nekea, deus ere ez egiten bizi izatea! Ez dut atseden hartuko deus ere ez egitea eginkizun izan arte.

Izan pazientziadun, baina gutxi fida haien asmoetan pazientzia gutxikoekin: sufritzen jakin ezean, zein asmori eutsiko ote diote?

Gaitz erdi nekeak hartu izan balio gaina jendea nekatzen! Ba, jai, berak hartu zion neurria bere nekeari, bertzeena neurtzeko ezgai.