Logika miragarria

Immigrazio debekuen logika: zenbat eta papergabe gehiago, hainbat eta paper gutxiago bete behar eskulana merkatzeko.

Herio, berdintzaile?

Heriok berdintzen gaituelakoan al zaude? Alta, askoz gehiago hiltzen da pobrezian aberastasunak itota baino. Baita ehunekoetan ere.

Zor kitapenak, pobrearen etxean: gaurko penak arintzeko zorra. Eta bihar biharkoa.

Diru ugalketa malthusiarra ezarri diete pobreei diru ugalketa librearen aldekoek.

Ase eta gosearen arteko gerra bitxiak: gehienetan, gosea ase baten edo bertzeren zerbitzuan banatu da bere buruaren aurka.

Pobrea, zenbat eta zor handiagoak izan, hainbat eta pobreago; diruduna, zenbat eta zor handiagoak izan, hainbat eta dirudunago.

Adio pobreziari, pobreak urrezko bihotzekoak izanen balira!

Pobreziaren aurrean, zer malkoak darizkie krokodilozko billete-zorroa bihotzaren aldean daramatenei?

Aberatsen diru-metaketak sortzen ditu pobreak, etengabe halako erditze batean. Hori ugalkortasuna, aberatsena!

– Garesti ateratzen zaizkigu pobreak gero! –filantropo dirudunak–.
– Garesti ateratzen zaizkigu aberatsak gero! –behardunak–.