Retrogradora

Bere delirio etilo-poetikoetan, Vinogrado birbataiatu zuen Bilbo hiria malenkoniatsuki, Retrogadora bidaia prestatzen zegoela.

Bizi ala kontatu

Zein erraz suertatzen diren melenga maitasun poemak. Batere ez, ordea, maitasun bizipenak. Iraun artean, behintzat.

Indar poetiko bizia atzeman diodan aforismo hori poema bihurtu nahi izan dut, eta lerro desneurtuen segida indarge bat lortu.

Paradisuko Adam eta Ebak ez zuten poesiaren beharrik. Sagarretik sortu omen zen.

Hitz-joko, sintaxi gabeko hitz edota hots hutsen segida izan dezake oinarri poema ederrak; alta, zirrara baten sintaxia izan behar muinean.

Badaude metaforarik gabeko poemak sortu nahian dabiltzanak. Badute meritu, baina lortzen dutenean poema bera dugu metafora.

Ai ene, poeta izan behar nukeen! Baina bizitzak bertze neurtitzetara eraman nau, prosaikotasunean ene hitzak nekez neurtzera.