Egia bat eszeptizismo puntu batekin azaldurik, ez al da sinesgarriago suertatzen?
sinesgarritasuna
Konparazioak
Gorrotagarriak konparazioak oro… sinesgarriak diren heinean. Bertzela, barregarriak.
Sinesgarritasun
Mesfidati ni, oso, hedabide handien agenda eta edukiekin. Egunen batean niri interesatzen zaizkidanak zabalduko balituzte, ene usteekin mesfidatzen hasi beharko nuke.
Fidagarritasun neurgailua
Bere sinesgarritasun faltak egiten zuen fidagarri: zer hitzeman, hitz horixe jan.
Lan-eskaintza iragarkia
Puntako komunikazio-agentziak bulografo bat behar du. Ebaluatuko dena: ausardia, irudimena, gaurkotasun nazional eta nazioartekoa, esperientzia sare sozialetan. Sinesgarritasuna, agentziaren kontura. Eskabideak eta curriculumak, 023104 posta-kutxan.
Surrealismoa politikan
Estatu eta erakundeak, zeintzuen inguruko berriak, zenbat eta irudikaezinago, hainbat eta sinesgarriagoak diren.
Gezurren sinesgarritasuna
Egiantza gutxiko egiak asmatzen dituzten bertsioak, egon, badaude. Horien aterpean gozo dabiltza apopilo gezurrik galantenak.
Egien sinesgaiztasuna
Sinets iezadazu, egia diotsudan arren.
Fantastikotasun sinesgarria
Mundu erreal fantastiko liluragarria gurea: errealismoa irizpide, sinestezinena sinesgarri egiten digun mundu batean bizi gara.
Sinestezina, aizu!
Hain sinesgarritasun gutxikoa berau, non berari buruzko den-dena zen sinesgarri.