Txokolateaz gozatzeko parada

Arkupe gozotegiak 30 urte baino gehiago daramatza lanean, gozogintzako produktu bikainak, bereziak sortzen. Horretarako, kalitate goreneko lehengaiak erabiltzen dituzte. 2008an enpresa zaharberritu zuten, eta ordutik punta-puntako makineria dute txokolatea sortzeko artisau lanerako.

Arkuperen berezitasunik nabarmenena hurrarekin egindako txokolatea da, hur ale osoekin nahastutako txokolatea. Horrez gain, askotariko produktuak lantzen dituzte, denak egunero-egunero egin berriak: pastak, pastelak, opilak, izozkiak…

Salmenta tokiak Nafarroako Baztan bailaran daude, Elizondo eta Irurita herrietan.

Arrakastaren sekretua

Horrenbeste urte arrakasta betean egiteko, sekretu bat du Arkupe gozotegiak: kakao hazitik hasita txokolatearen prozesu osoaren gaineko kontrola izatea: kakao haziak eskuz hautatu, txigortu, azala kendu, xehatu… Produkzio guztia beren lantegian bertan egiten dute, eta horrek bermatzen du txokolatearen kalitatea maila gorenekoa izatea.

Kakao hazien aukeraketatik bezeroaren eskuetaraino iritsi arteko bidea egiten dute Arkupeko langileek. Kakaoa hainbat herrialdetatik ekartzen dute: Ekuador, Venezuela, Madagaskar… Eta artisau lana egiten dute lan prozesu osoan.