<![CDATA[Andoni Egaña | Berria.eus]]> https://www.berria.eus Bere azken artikuluak eu Sun, 24 Feb 2019 04:23:04 +0100 hourly 1 <![CDATA[Andoni Egaña | Berria.eus]]> https://www.berria.eus/irudiak/berriaB.png https://www.berria.eus <![CDATA[Aretoak]]> https://www.berria.eus/paperekoa/1928/024/001/2019-02-24/aretoak.htm Sun, 24 Feb 2019 00:00:00 +0100 Andoni Egaña https://www.berria.eus/paperekoa/1928/024/001/2019-02-24/aretoak.htm
Deus eramaten ez dakigun herritarrez osaturiko gizarte bat ehuntzen ari gara. Denak molestatzen gaitu: txakur jabea, auzoko pianojole saiatuegiak; pianojolea, txakurrak ezkaratzean uzten duen arrastoak; txakurra, taberna atari hotzegien atarian lotuta egon beharrak; tabernaria, terrazakoak zerbitzera doanean txakurraren sokarekin estropezu egiteak... Eta hainbesteko koloretako zain-ak nola dauzkagun, salaketa jartzera joko dugu molestiaren bat sentitu orduko. Badakit gauzak zentzuz arautu beharra dagoela. Herriko jaietan kalez kale diana jotzen dabilen txistulari talderen bat salatu izan du norbaitek noizbait... Besteren pozik ere ezin dugu eraman!

Kulturak behar ditu, jakina, propio prestaturiko toki egokiak. Baina askotan, harribitxirik distiratsuenak espero ez zenuen lekuan aurkituko dituzu, taberna-zuloren batean, esaterako. Gisa horretako antolatzaileen jarduna miresgarri zait. Toki handi-txikiek osaturiko zirkuituetan ibiltzeak, berriz, sortzaile hobea egin nau. Ustez behintzat.]]>
<![CDATA[Nola?]]> https://www.berria.eus/paperekoa/1881/018/001/2019-02-23/nola.htm Sat, 23 Feb 2019 00:00:00 +0100 Andoni Egaña https://www.berria.eus/paperekoa/1881/018/001/2019-02-23/nola.htm
Euskaraz iritsi zitzaigun guri eta oso geuretzat hartu genuen. Hunkigarria zitzaion haurrari aitatxo falta zuen beste ume baten istorioa. Izar baten gainean aitaren bila abiatzen zen umearen irudimenak piztu egiten zigun gurea. Gerora jakin genuen «nola, nola» hura «dona dona» zela eta hiltegira zeramaten txahalari buruz ari zitzaigula, enara izatera libre hegan egin besterik ez, eta txahala zela sinetsita zegoelako heriotza hurbil eta saihetsezina zain zuena. Izan haur eta izar edo txahal eta enara, beti izango dut Joan Baezekiko —Jose Inazio Ansorenak ere izan zuen merituaren zati handi bat doinua bertso-neurrietara moldatzean— doinu hari esker Lazkao Txikirekikoa kitatzeko eman zidan aukeraren zorra.

Zurriolako hondartzan izango da aurtengo uztailean. Norbaitek pentsa dezake Joan Baez zahartua iritsiko dela Donostiara. Aspaldikoegia dela, alegia. Laurogei urteak berta-bertan dituela, denak kontatu baditu behintzat. Baina zahar-gazteren hori erlatiboa da. Are erlatiboagoa genetikak laguntzen duenean. Gurasoak ez ditu hil zaharrak Joan Baezek. Aita 95 urterekin hil zitzaion. Ama ehun beteta...]]>
<![CDATA[Izenak]]> https://www.berria.eus/paperekoa/1881/017/001/2019-02-22/izenak.htm Fri, 22 Feb 2019 00:00:00 +0100 Andoni Egaña https://www.berria.eus/paperekoa/1881/017/001/2019-02-22/izenak.htm
Eusko Jaurlaritzako Turismo Sailburutzan Alfredo Retortilloren lekua Sonia Perezek hartuko duela jakin dugu egunotan. Ona bada, hobe. Ibilbidea zait bitxia. Jaurlaritzan lan arloko zuzendari izan zen duela hamar urte, eta lan kontuetarako sailburuorde Patxi Lopezekin ondoren. Orain Bizkaiko Foru Aldundiko enplegurako sailaren zuzendari zen... Lana eta enplegua bideratzetik turismoa bideratzera. Lana eta aisialdia, dena nahasian. Edo lana aisialdi eta aisialdia lan.

Txirrita-Saiburu zen garai bateko bertsolari bikote bikaina. Txirrita sailburu izatea falta zitzaigun...]]>
<![CDATA[Saria]]> https://www.berria.eus/paperekoa/1881/021/001/2019-02-21/saria.htm Thu, 21 Feb 2019 00:00:00 +0100 Andoni Egaña https://www.berria.eus/paperekoa/1881/021/001/2019-02-21/saria.htm
Bozen giroak nahasturik, pentsioen sistema berritzeko akordioa bertan behera geratu da Espainian. Atzoko berria da. Ez dakit nondik nora doan berritze asmoa. Dakidan bakarra da tankera horretako berriak entzuten ditudanero espabilatu egin beharko dudala hasten naizela pentsatzen. Ea ez naizen ilaran azken muturrean geratzen, margarina poterik gabe.]]>
<![CDATA[Zina]]> https://www.berria.eus/paperekoa/1881/017/001/2019-02-20/zina.htm Wed, 20 Feb 2019 00:00:00 +0100 Andoni Egaña https://www.berria.eus/paperekoa/1881/017/001/2019-02-20/zina.htm
Osakidetzako oposizioenak ez zuen itxura onik eta badirudi gaitzak txarrera egin duela. Fiskaltzak delitu zantzuak aurkitu ditu, Osakidetzako zuzendaritza egin du erantzule eta orain epailearen esku dago erantzukizun penalak zehaztearen lana. Ariketa batzuk aldez aurretik pertsona jakin batzuei filtratzea, galderak prestatu zituztenetariko batzuk eta epaimahaietako beste batzuk irizpide ez objektiboen arabera aukeratzea... ez dirudite huskeriak. Asko izango gara noizbait azterketa bat lapurtutakoak edo nolabait lapurtzen saiatu izan garenak. Baina hori behetik gorako barrabaskeria zen, harrapatuenean zigor ziurra zekarrena. Goitik behera horrelakorik egitea...

Ez dut kasualitatez hautatu. Hipokratesena da lehen ahapaldiko aforismoa. Osagileek juramentu nagusia hari zor diote. Laburra da bizitza. Luzea da bidea. Iheskorra da aukera. Gezurrezkoa eskarmentua. Horraino bat baldin bagatoz, epaia ezin da zail-zaila izan.]]>
<![CDATA[Dilindan]]> https://www.berria.eus/paperekoa/1881/017/001/2019-02-19/dilindan.htm Tue, 19 Feb 2019 00:00:00 +0100 Andoni Egaña https://www.berria.eus/paperekoa/1881/017/001/2019-02-19/dilindan.htm
Joandako igandean galdu ezineko gauzen artean bazen bat, harrapatu ez zuenak oraindik aisa eskuratuko duena: berripaper honetan Nora Arbelbidek Michel Portal konpositore eta musikari baionarrari egindako bi orri beteko elkarrizketa. Artistaren jarrera sarien aurrean; artistaren jarrera bere lanbideari dagokionez; inprobisazioa; aniztasuna; Che Guevararen abesti kuttuna... eta Aljeriako gerrari helduta, pasarte bat goi mailako errelato bihurtua: «...Gehienek bezala, ez nuen gerla egin nahi, baina behartu gintuzten. Egunero beldur ginen. Bitxia zen. Pianista baten adibidea emanen dizut. Kontserbatorioan ezagutu nuen. 24 urte zituen. Mendira, djebelera, joatea eskatu zigutelarik bere beldurra azaldu zidan: 'Ez ditzatela nire behatzak andea...'. Halako batean, eraso bat. Tiroak alde guztietatik. Lagun pianista lurrera erori zen...».

Micheli berari irakurri pasartea nola amaitzen den.]]>
<![CDATA[Euria]]> https://www.berria.eus/paperekoa/1928/023/001/2019-02-17/euria.htm Sun, 17 Feb 2019 00:00:00 +0100 Andoni Egaña https://www.berria.eus/paperekoa/1928/023/001/2019-02-17/euria.htm
Espainiako politikariek balukete zer ikasirik Prudentziorengandik. Santuak hamabost urte zituela egin zuena egiteko aholkatuko nieke. Armentiatik propio alde egin Soria inguruko ibaiertz batera, anakoreta. Ondasun material oro atzenduta, errezoan eta penitentzia eginez eman zituen han sei urte. (Politikari ugari da gogoz kontrako penitentzia egiten ari dena, baina ez ditut nik errezuan irudikatzen, errosarioaren aleak ere lapurtzeko tentaldian jausi gabe). Gerora, Gotzain izatera ere heldu zen Prudentzio. Eta heriotzak bitartekari lanak eginez harrapatu zuen Soriako Burgo de Osma herrian. (Zapatero ez al zen antzeko zerbaitetan ibili Venezuelan? ). Hil ondoren, eztabaida sortu zen non lurperatu, bere Elizbarrutitik kanpo zebilen eta. (Francoren hezurrekin darabilten luzamendurik gabe hartu zuten erabakia). Bere zaldira igo gorpua, eta zaldia geratzen zen tokian bertan hilobiratzea adostu zuten. Errioxako Clavijo herrixkan egin zuen pott animaliak.

Apirilaren azken igandean euria egingo du seguru-seguru. «Trifaliko»en zaparrada ez bada, hainbestean…]]>
<![CDATA[Trena]]> https://www.berria.eus/paperekoa/1881/019/001/2019-02-16/trena.htm Sat, 16 Feb 2019 00:00:00 +0100 Andoni Egaña https://www.berria.eus/paperekoa/1881/019/001/2019-02-16/trena.htm
Bakarrik bizi denari antzeman egiten zaio. Elkartuko zarete, demagun bi adiskide, eta lehen ordu laurdenean bera izango da, ia arnasarik hartzeko tarterik gabe, hitz-parrastada botako duena. Zu, berriz, lagun ona bazara behintzat, entzule izatera mugatuko zara. Berea da benetako kontatu beharra. Denbora tarte bat igarota, hustua laguna, bakarrizketa elkarrizketa bihurtu ahal izango duzue.

Kataluniarrei bozkatzeko eskubidea, etorkizuna irudikatzen hastekoa... galarazi diete. Preso daudenei, nahi dutenean eta nahi dutenarekin hitz egiteko aukera ere bai. Gogoan dut bertsotan jarritako gai bat: «Trenean zoazte elkarren ondoan. Eta zuetako bat hitz eta pitz doa, isildu gabe». Bestea zen hasten. Uste dut Loidi Saletxe II.a zela. Pelmari errietan hasi ordez, «zu bakarrik biziko zara, ezta?» galdetuz ekin zion. Trena: bi adierako hitza, Junquerasek bezala, gaztelania estimutan baduzu.]]>
<![CDATA[Hanka-motzak]]> https://www.berria.eus/paperekoa/1881/021/001/2019-02-15/hanka_motzak.htm Fri, 15 Feb 2019 00:00:00 +0100 Andoni Egaña https://www.berria.eus/paperekoa/1881/021/001/2019-02-15/hanka_motzak.htm
Iritsi berritan Aian bertsolariak entzun zituen lehen aldi hartan bertsomindu omen zen. Mutiko erneak ikasi zuen euskaraz; trebatu zen bertsotan. Eta egin zuen lekutxo bat garai hartako bertsoen munduan. Francisco Tejados izaki, Iñaki Linazasorok gaijartzaile lanak egin zituen batean Patxi Teilatu izendatu zuen. Berak batere eragin gabeko polemikaren batean ere katigatu zuten. Aurrezki Kutxa baten egutegian azaldu zen Nací en Cáceres y soy euskaldun goiburupean. Gipuzkoan bizi zen hainbat cacerestar mindu egin zen. Albaceten jaioa zen Patxi, ez Cáceresen. Gainera, eurek ez omen zuten nortasuna eta izena aldatu beharrik edo gaztelaniari uko egin beharrik hona lanera etorri arren...

Egunotan hedabideetan azaldu da Manu Bendala bertsolaria. Sevillan jaio eta hazia. Euskalduna. (Ere bai, behintzat). Zorte on Aramaioko saioan. Eta ongietorriak entzutera datozen senideak.]]>
<![CDATA[Bakartu]]> https://www.berria.eus/paperekoa/1881/017/001/2019-02-14/bakartu.htm Thu, 14 Feb 2019 00:00:00 +0100 Andoni Egaña https://www.berria.eus/paperekoa/1881/017/001/2019-02-14/bakartu.htm
Denbora gutxian medikuekiko beldurrak asko egin du behera. Osasun Zentroak gainezka ikusi besterik ez dago. Edadetuak obrei begira denbora pasa egoten ziren lehen. Orain, osasunaren inguruan sozializatzen dute maizago. Kontu kontari aritzeko ere ez da gai murritza mediku-agendarena. «Ba nik, asteartean, herrian bertan daukat begien errebisioa; ostegunean, hiriburuan analisiak eta, ostiralean, berriz herrian, kura. Badakizu joan den azaroan ebakuntza egin zidatela...».

Bezeroen bizi kalitatea hobetu nahian, Osakidetzak Sintrom hartzen dutenei eskura jarri nahi die autokontrol sistema bat, etxetik bertatik zaindu dezaten euren burua. Ongi. Eskertuko dute. Baina erosotasunean irabaz dezaketena gal dezakete bakartzean. Kontatu ahal izatea ere osasuna baita... ]]>
<![CDATA[Iraupena]]> https://www.berria.eus/paperekoa/1881/023/001/2019-02-13/iraupena.htm Wed, 13 Feb 2019 00:00:00 +0100 Andoni Egaña https://www.berria.eus/paperekoa/1881/023/001/2019-02-13/iraupena.htm
Arrazoiaren jabe nor den zalantzarik ez dut. Badakit noren eskubideak urratu diren. Baina behin epaitegira sartuta, mila ertzetatik heltzeko moduko gaia da. Ezjakin hutsa naiz gehienetan. Herritar xehe askoren jakin-min bertsua dudalako, ia urte eta erdi kartzelan daramaten kataluniar hauen etorkizunak kezkatzen nauelako, epaiaren berri noiztsu izango dugun nahi nuke jakin.

Datu bila hasi naiz, konparaziorik egin nahi izan gabe, aztarnaren bat aurkitzeko. Burgosko prozesua 1970eko abenduaren hiruan hasi zen. Handik hogeita sei egunera heldu zen epaia eta hogeita zazpira heriotza zigorren indultua. Nurenbergeko epaiketa nagusia 1945eko azaroan hasi eta hurrengo urteko urriaren lehenean amaitu zen. Hamar-hamaika hilabete... Hiru hilabeteko iraupena izango omen du, gutxi-gehiago, atzo hasi zenak. Itxurazko zerbait gerta dadin aski denbora... ]]>
<![CDATA[Ximurrak]]> https://www.berria.eus/paperekoa/1881/025/001/2019-02-12/ximurrak.htm Tue, 12 Feb 2019 00:00:00 +0100 Andoni Egaña https://www.berria.eus/paperekoa/1881/025/001/2019-02-12/ximurrak.htm
Emakumezkoen futbol partida dexente ikusitakoa naiz joan den dozena bat urtean. Joan zen igandean Anoetako derbia etxetik ikusi nuen, telebistaz. Egia da harmailetan giro bikaina bizi izan zela; jokalariak lehiakor eta zintzo aritu zirela ere egia da; emaitzaren estuak partidari emozioa erantsi ziola ere bai... Baina ustez badakit osagai horiek albora utzi eta jokoa bera zer-nolakoa izan den neurtzeko adina. Niri jokoa aparta iruditu bazitzaidan eta protagonisten hitzetan zinez ez bazen hain ona izan, zerk eragin zuen tarte hori? Kameren kokapenak. Partida Anoetan jokatzean, ez Zubietan, Lezaman edo Lasesarren, kamera askoz gehiago eta, batik bat, gorago kokatuak ziren. Gisa horretan ikusita, futbolarien jarduerak hobea ematen du. Eszenategi kontua da. Eta hori ere bada orain artean emakumezko futbolariei ukatu zaien zerbait...

Bikotea ziren. Emakumezkoak begietako dioptriak arintzeko ebakuntza egin ondoren, gizonezkoa aurpegiko ximurrak leuntzekoa egin beharrean sentitu zen. Ea joan den igandeko begiek zenbaiten eszeptizismo ximurrak leuntzeko balio duten! ]]>
<![CDATA[Agurrak]]> https://www.berria.eus/paperekoa/1928/022/001/2019-02-10/agurrak.htm Sun, 10 Feb 2019 00:00:00 +0100 Andoni Egaña https://www.berria.eus/paperekoa/1928/022/001/2019-02-10/agurrak.htm
Beltza-rekin horrelakorik ez sentitzearen zortea behintzat izan dut. Urtero gisan, urriko azken astelehenarekin Gernikan ginen. Oholtzapean zegoen, urtero gisan, guk lanak bukatu zain. Inguruko taberna batera joan ginen beste hiru-lau lagunekin. Lepo zegoen. Inork bultzadarik edo kolperik eman ez ziezaion besoa pasa nion sorbaldatik adinak, lanak eta urte luzeetako zaintza-lanak nekaturiko gizon hari. Igurtzia. Ukitua. «Maite haut, Jon» esateko ezohiko modua gure artean.

Irten ere halaxe irten ginen. «Azkenengoa ez balitz ere, ze goxoa izan den!», pentsatu nuen nire baitan. Oinez abiatu nintzen. Zorionez, autoa urrutiko aparkaleku batean neukan.]]>
<![CDATA[Eskueran]]> https://www.berria.eus/paperekoa/1881/017/001/2019-02-09/eskueran.htm Sat, 09 Feb 2019 00:00:00 +0100 Andoni Egaña https://www.berria.eus/paperekoa/1881/017/001/2019-02-09/eskueran.htm
Hiru egun lehenago kulturarteko inprobisatzaileen jardunaldietara Donostiara iritsi ziren unetik, batek ez zuen beste konturik buruan. Anaiaren autoari falta zitzaizkion piezak eskuratzea Habanara eramateko. Iraetako auto-hilobian izan ondoren, zekarren zerrenda luzeko piezarik gehienak lorturik, pentsatzekoa zen zorion betean behar zuela Zarauzko malekoian. Baina ez. Bezperan izugarri gustatu zitzaien Euskal Herriko txoko batera eraman nitzan presa zuten. Txoko hura ez zen Gaztelugatxe; Opakua gaina ere ez; ezta Txingudiko badia ere. Urbil-era itzuli nahi zuten, denetik eskueran —ez sakeleran— zeukaten tokira! Ni zorabiarazi egiten nau horrelako lekuetako argi eta usain joritasunak eta aire eskasiak. Haiek ere bai nonbait.

Suku Maya nepaldar emakume maitagarri eta maitatuak ekarri dit gogora pasadizoa, Euskal Herriko txoko bat aukeratzeko esan eta Donostia eta Urbil hautatu dituenean.]]>
<![CDATA[Entretenitu]]> https://www.berria.eus/paperekoa/1881/015/001/2019-02-08/entretenitu.htm Fri, 08 Feb 2019 00:00:00 +0100 Andoni Egaña https://www.berria.eus/paperekoa/1881/015/001/2019-02-08/entretenitu.htm
Gerora ikasi dugu asko bizi dela esaldi horretan oinarriturik. Eraman ona eta azala baino ez direla behar. Donald Trump presidenteak azken muturreraino luzatu du esaldiaren logika. Kongresuan agerraldia egin berri du. Ez du deus berririk esan; ez du ekimen berritzailerik proposatu. Baina sekulako audientzia lortu du telebistan: 49 milioi ikusle. Lautik hiruk bere jarduna egokia izan zela dio, gainera! Trumpen esaldirik burutsu eta konplikatuena izan zen: «Estatu Batuak ez dira inoiz sozialista izango!». Eta okerrena da horrelakoei jokoa irabazteko modu bakarra bere jolasean sartzea dela erabaki dutela oposiziokoek ere. Xouari xoua.

Entretenigarritasuna da nonbait pertsonon ardatz berria. Hesiak eraiki eta kartzelak betetzea, komeni den herrialdeei blokeoak ezartzea, gerrak piztu eta jendea hiltzea... dena da eramangarri modu entretenituan aurkeztuz gero. Ongi datorkio hori askori. Entretenitu hitzak, erroan, ez baitu esan nahi «bitartean menpean eutsi» besterik. Eta xaloa eta polita zirudien, batere arriskurik gabea!]]>
<![CDATA[Zain]]> https://www.berria.eus/paperekoa/1881/017/001/2019-02-07/zain.htm Thu, 07 Feb 2019 00:00:00 +0100 Andoni Egaña https://www.berria.eus/paperekoa/1881/017/001/2019-02-07/zain.htm
Patria liburuan oinarrituriko filmean parte hartzeko casting-a egiten ari dira egunotan. Jende mordoa hurbilduko da. Zerbait berria probatu nahi izango dute batzuek; beste batzuek lagunarteren bat aurkitu denbora pasarako; diru-pizarren bat erantsi nahiko dio besteren batek zituen diru-sarrera murritzei...

Nolabait protagonista izanda zain egoten asmatzea zaila bada, ertzeko bete-lan zaren garaian zeinen gogorra izan behar duen ez dut pentsatu ere egin nahi. Baina, zorionez, bada denerako jenderik...]]>
<![CDATA[Nor]]> https://www.berria.eus/paperekoa/1881/017/001/2019-02-06/nor.htm Wed, 06 Feb 2019 00:00:00 +0100 Andoni Egaña https://www.berria.eus/paperekoa/1881/017/001/2019-02-06/nor.htm
Hemendik hangoa konpontzea errazagoa da hemendik hemengoa konpontzea baino nonbait. Ez dakit europar agintariak mezatara askotan edo gutxitan joandakoak diren. Baina bazen esaldi bat aintzat hartzekoa: «Ni ez naiz nor zure etxean sartzeko...». Maduro presidenteari egurra ematen ari direnek jakin behar lukete hori.

Zorionez, mundua ez da Europa eta Amerikako Estatu Batuak bakarrik. Txinak, Errusiak, Vatikanoak berak akaso... ez diote men egin chavismoaren aurka harrotu den aitzakia parrastadari. Hala hobe. Ikuspuntu bakarra beti da murritza...]]>
<![CDATA[Eskean]]> https://www.berria.eus/paperekoa/1881/018/001/2019-02-05/eskean.htm Tue, 05 Feb 2019 00:00:00 +0100 Andoni Egaña https://www.berria.eus/paperekoa/1881/018/001/2019-02-05/eskean.htm
Ikasten duzu geografiaz eta erreken isuriak bailaren banaketan duen garrantziaz; ikasten duzu giza harremanez, belaunaldiartekotasunaz eta haurrek tribuko helduak imitatzeko izaten duten grinaz; ikusten duzu bizitzeko modu desberdinak badirela, bata artzain, bestea okin, txakolingile beste bat...

Eguraldi petralaren aroan tokatzen da beti Santa Ageda eskea. Horregatik, hizkuntzaz ere gogoeta egiteko aukera izango duzu. Gazteleraz casa eta hogar bereizi egiten dituzte. Gure etxe-k haien biak harrapatzen ditu gutxienez. Baina inoiz hogar esateko beharrik bagenu, santa eskean eguraldi makurrarekin ibilita ikasten da nola esan: supazterra. Ataritik barrurako gonbita egin eta pauso gutxi batzuk ematen dituzunean ulertzen duzu hitzaren benetako esanahia.]]>
<![CDATA[Bularrak]]> https://www.berria.eus/paperekoa/1881/023/001/2019-02-03/bularrak.htm Sun, 03 Feb 2019 00:00:00 +0100 Andoni Egaña https://www.berria.eus/paperekoa/1881/023/001/2019-02-03/bularrak.htm Anton Carabina-na, mato a su mujer-jer-jer, la metio en un saco-co, la llevo a moler-ler-ler. El molinero dijo-jo, esto no es harina-na, esto es la mujer-jer-jer, de Anton Carabina-na». Elkarri eta erritmo jakin batean esku zartadak ematearen jolasa kantu honekin laguntzen genuen umetan, euskaraz egiteko ohitura genuenok ere. Hots, Anton Carabinak emaztea hil, zaku batean sartu eta errotariari eraman ziola. Eta errotariak esan zuela hura ez zela irina, Anton Carabinaren emaztea baizik. Ez dut ulertzen nola iritsi zitzaigun kantu hori eta nola ez ziguten kantatzea galarazi. Gutxiagorengatik daude kartzelan edo mehatxupean rap kantariren batzuk!

Santa Ageda bezpera bezpera gaur. Nafarroan eta gazteleraz bildutakoa omen den bertso zahar bat itzuli dut neure kabuz: «Ageda ez zen nonbait makurtzen zenbait jainkoren gerizan/ 'bularrak moztu behar dizkinagu, hik nahi dunana egin zan'/ Santak goxoki erantzun zien, (bera halakoa izan)/ 'moztu behar bada, moztu itzazue, tinkoa naiz ni bizitzan'/ zer egingo ta, bularrak moztu, ogia ebaten den gisan».

Gordin. Gu hor ibiltzen gara «oles egitera gatoz» eta «Euskal Herriko eguna» eta oinetakoz aberats ez gabiltzala kantatuz. Ez genuen bestelako ondarerik, ala ezkutatu egin digute?]]>
<![CDATA[Begira]]> https://www.berria.eus/paperekoa/1881/024/001/2019-02-02/begira.htm Sat, 02 Feb 2019 00:00:00 +0100 Andoni Egaña https://www.berria.eus/paperekoa/1881/024/001/2019-02-02/begira.htm
Adinean aurrera doan bat baino gehiago sumatu dut azken boladan, nerabe eta gazteek sakelakoaren pantailari begira kalean zehar ibiltzeko duten joeraren aurrean ozpin. Trafikoarentzat arazo direla, edozeinekin egin dezaketela tupust, adiago ibili behar dela jendartean... botako dizute arrazoitzat. Nik ez dut bizikidetza koartadatzat hartzen. Baina kalean natural noala, inork ezer antzemango ez didala buruan hurrengo bileraren kezka, biharko artikuluarena, etziko bertso saiorako hitzorduarena daramatzadala... sarritan egin izan diot galdera neure buruari: «Zer ote du gizarajo/gajo horrek oraintxe bertan jakin beharrekoa izateko adinako garrantzia duena?».

Ez dakit Fernandorena Pernandoren egia zen ala ez. On eta txar ere bakoitzak bere talaiatik epaitzen ditu. Eta gaztetxo batentzat pantailako OK soil bat edo hunkiki parregarriki errepikatua izan daitezke norberarentzat hitz parrastada bat bezain garrantzitsu.]]>