<![CDATA[Eñaut Agirrebengoa | Berria.eus]]> https://www.berria.eus Bere azken artikuluak eu Mon, 26 Aug 2019 05:29:50 +0200 hourly 1 <![CDATA[Eñaut Agirrebengoa | Berria.eus]]> https://www.berria.eus/irudiak/berriaB.png https://www.berria.eus <![CDATA[Borroka eta oreka]]> https://www.berria.eus/paperekoa/1950/018/001/2019-08-25/borroka_eta_oreka.htm Sun, 25 Aug 2019 00:00:00 +0200 Eñaut Agirrebengoa https://www.berria.eus/paperekoa/1950/018/001/2019-08-25/borroka_eta_oreka.htm Chimy Avilari, David Garciari eta Brasanaci; eta Eibarreko Sergio Alvarezi, Arbillari, Oliveira eta Charlesi. Bestelakoak. 13.978 ikusle Sadarren, tartean Eibarren 225 jarraitzaile inguru.

Futbolean bada euskal derbiak gogorrak, berdinduak eta distira handirik gabeak direla dioen topiko bat. Ez da beti betetzen, baina batzuetan bai; esaterako, atzo, Osasunak eta Eibarrek Sadarren jokatu zuten neurketan. Bi taldeek gogor estutu zuten elkar, Jagoba Arrasate eta Jose Luis Mendilibarren filosofiari jarraiki, aurkariaren ia saiakera guztiak ezerezean uzteraino. Hainbesteko ahalegina egin zuten presio lanetan, ezen ez baitzioten tokirik egin ikuskizunari. Hutsean bukatu zen partida, eta markagailua zelaian ikusi zenaren isla fidela izan zen. Bi taldeek izan zituzten anbizioa eta gogoa, baina bata bestearen amaraunean katramilatu ziren.

Osasunak bi abantaila zituen. Alde batetik, lehen jardunaldian garaipen baliotsua lortu zuen Leganesen (Espainia), eta, alde horretatik, Palman (Herrialde Katalanak) esku hutsik gelditutako Eibarrek baino aldarte hobea zuen. Eta bestetik, alde zeukan Sadar faktorea. Bertan garaiezina izan zen iragan sasoian, hemeretzi partida irabazi eta bi berdinduta. Hanpatuta zegoen, baina Eibar serio eta sendo batekin egin zuen topo. Gipuzkoarrek emaitza on bat behar zuten datorren asteburuan Atletico Madrilen zelaian jokatu aurretik, eta ondo izerdiarazi zituzten gorritxoak. Eguzki galdatan jokatu zen lehia, eta ura edateko bi eten egin behar izan ziren.

Izan zen bestelako geldialdirik ere; faltek eraginak, hain zuzen ere. Muga-mugan jardun zuten bi taldeek, kirol legez betiere, baina oso oldarkor. Epaileak txistua behin eta berriz eraman zuen ahora, eta baita eskua sakelara ere, sarritan: zortzi txartel hori erakutsi zituen guztira, lau talde bakoitzari. Hori horrela, partidak distira gutxi izan zuen. Presio itogarria egin zuten nafarrek nahiz gipuzkoarrek, eta horrela oso zaila suertatu zitzaien erasoko jokaldi garbiak ehuntzea.

Aginte makila, inork izatekotan, Eibarrek eduki zuen. Ekimen gehiago izan zuen, baina, edonola ere, horrek ez zion balio izan Osasunaren arean arriskua sortzeko. Gorritxoak erasoko joko bizia bereizgarri hartuta igo ziren Lehen Mailara, baina sendotasuna ere badute. Baita moldakortasuna ere: badakite aurkariak estu hartzen beren zelaian sartuta daudenean ere. Maisuki profitatzen dituzte baloi luzeak eta hutsuneak. Formula horrek garaipena eman zien ia, 56. minutuan. Kontraeraso batean, Dmitrovicen aurrean gelditu zen Chimy Avila, baina haren zartakoak atezain serbiarraren eskuekin egin zuen topo.

Ontzat jo dute

Hori izan zen neurketako aukerarik garbiena, eta ia bakarra. Lehen zatian ere sortu zuten arriskua etxekoek, Moncayolak eta Roberto Torresek egindako jaurtiketa banarekin. Horretaz landa, gol bat baliogabetu zioten Chimy Avilari, jokoz kanpo kokatzeagatik. Eibarrek, aldiz, behin ere ez zuen atera jaurti. Diopen burukada bat eta Arbillak eta De Blasisek gora bidalitako falta jaurtiketa bana izan ziren kanpokoen abagune bakarrak. Erdiraketa ugari egin zuten Osasunaren areara, gehienak korner eta faltetan, baina ez zituzten atzelari gorritxoak artegatu.

Partida bukatu ostean, Arrasate eta Mendilibar beren jokalarien lanarekin pozik agertu ziren; ez, ordea, erakutsitako jokoarekin. Hori bai, modu batera edo bestera, ontzat jo zuten lortutako puntua. Osasunak lau puntuko bermearekin jokatuko du datorren astean Bartzelonaren aurka, eta Eibarrek hainbesteko presiorik gabe egingo dio bisita Atletico Madrili.]]>
<![CDATA[Ildo beretik jarraitzera]]> https://www.berria.eus/paperekoa/1956/020/001/2019-08-25/ildo_beretik_jarraitzera.htm Sun, 25 Aug 2019 00:00:00 +0200 Eñaut Agirrebengoa https://www.berria.eus/paperekoa/1956/020/001/2019-08-25/ildo_beretik_jarraitzera.htm
Ligako lehen bi norgehiagokak etxean jokatzea egokitu zaio Alavesi, eta aukera aprobetxatu nahi du. Mailari eusteko lehian, funtsezkoa da etxean gotortzea, eta harresiak ahalik eta azkarren altxatu nahi ditu. Gaur bigarren garaipena kateatuta, eraikia izango luke oinarria. Hori bai, aurkari zaila izango du. Europa ligako atarikoak ari da jokatzen Espanyol; beraz, gasteiztarrek baino erritmo handiagoa du. Hala ohartarazi du Garitanok. «Besteok baino goizago hasi dira denboraldia prestatzen, eta orain lehiarako sasoi hobea dute».

Ostegunean partida izan zuen Kataluniako taldeak, eta gaur nekea nabari lezake. Ez du hala uste, ordea, Garitanok. «Ondo etorriko zaio, lehiatzea beti baitator ondo. Gainera, aldaketak egin zituzten, eta jokalari garrantzitsuak ari dira fitxatzen». Gauzak hala, partida «orekatua» osatu beharko du Alavesek.

Hamaikakoan gutxienez aldaketa bat egin beharrean da Garitano. Maripan Monakon da, eta haren irteerak zuloa utzi du defentsa erdigunean. Min hartuta daude Laguardia eta Ximo Navarro, beraz, ikusteko dago nork jokatuko duen Elyren alboan. Alberto Rodriguez Tachi gaztearen ordua izan daiteke. Gasteizera iritsi berria da, eta ez du eskarmenturik gorengo mailan; aitzitik, «prest» dagoela iruditzen zaio entrenatzaile gipuzkoarrari. «Saiatua eta oldarkorra da, eta ondo eusten dio arretari». Beste aukera Duarte erdiratzea litzateke.

ALAVES-ESPANYOL

Alaves. Pacheco; Agirregabiria, Ely, Duarte, Marin; Vidal, Pina, Manu Garcia, Wakaso, Rioja; eta Joselu.

Espanyol. Diego Lopez; Javi Lopez, Lluis Lopez, Naldo, Didac, Melendo, Victor Sanchez, Marc Roca, Vargas; Wu Lei eta Ferreyra.

Epailea. Prieto Iglesias.

Lekua. Mendizorrotza (19.840 ikusle).

Ordua. 17:00etan (Mov. La Liga).]]>
<![CDATA[Konfiantza eta beharra]]> https://www.berria.eus/paperekoa/1877/018/001/2019-08-24/konfiantza_eta_beharra.htm Sat, 24 Aug 2019 00:00:00 +0200 Eñaut Agirrebengoa https://www.berria.eus/paperekoa/1877/018/001/2019-08-24/konfiantza_eta_beharra.htm
Osasunak Sadarren bermea izango du bigarren garaipena kateatzeko. Iragan sasoian, behin ere ez zuen galdu han, eta jarraian irabazi zituen han jokaturiko azken hamazazpi partidak. Nafarrek badakite ezinezkoa dela halakorik egitea Lehen Mailan, baina, dena den, ahalik eta puntu gehien bildu nahi dituzte etxean; lehen hirurak gaur, aurkari zuzen baten aurka.

Horretarako, ordea, Butarquen baino gauza gehiago erakutsi beharko dituzte. Hala uste du, bederen, Arrasatek. «Irabazteko, Leganesen aurka baino hobeto jokatu beharko dugu. Ez genuen baloia behar bezala erabili». Alde horretatik, «aurrerapauso bat emateko» eskatuko dio taldeari.

Teknikari gorritxoak derbi «zirraragarria» espero du. Ez dauka zalantzarik: Eibar ere «partidaren bila» irtengo da. «Haien jokoa aurkariaren zelaian aritzean eta baloi aske guztiak borrokatzean datza». Hori horrela, garrantzi handia eman dio hegalak behar bezala ixteari. «Erdiraketa asko egiten uzten badiegu, arazoak izango ditugu».

Osasunan ez da ariko Perea. Erdilariak min hartu du, eta gutxienez gaurko lehia galduko du. Arrasatek hura ez beste jokalari guztiak sartu ditu deialdian; sasoiko lehen partidan egon ez ziren Ruben Garcia, Adrian, Roncaglia, Navas eta Otegi barne. Jokalari berriak «Sadarko partiden dinamikara» egokitzeko hartu du erabaki hori.

Erne egon behar du

Eibarrek gaizki ekin zion Mallorcaren aurkako neurketari. Laugarren minuturako markagailuan atzetik zegoen jada. Hori horrela, partidari neurria ahalik eta azkarren hartzen saiatuko dira gaur gipuzkoarrak. «Ez bagara haien grina berberarekin ateratzen zelaira, zaila izango da ezer onik lortzea», adierazi du Mendilibarrek. Arretari eustearen garrantziaz mintzatu da prestatzaile zaldibartarra. «Osasuna talde deseroso eta erasokorra da. Partida gogorra izango da. Ez da erraza, baina une oro erne egoten eta erabaki zuzenak hartzen saiatu behar dugu».

Aldaketak espero dira Eibarren hamaikakoan. Arbilla Tejeroren ordez aritu liteke defentsako ezker hegalean, eta, zelai erdian, Expositok Escalanteren lekua har lezake. Diop osatu da, baina oso goiz da oraindik hasieratik aritu dadin. Aurrean, berriz, Mendilibarrek Charles ipin lezake Enrichen aldamenean, Kike Garciaren kalterako. Teknikari bizkaitarrak ondo ezagutzen du gaurko aurkaria, lau denboraldi —bi osorik— eman baitzituen Osasunan. Quique aurrelariak, berriz, Iruñean jokatu zuen orain dela bi sasoi.]]>
<![CDATA[Nagusitasun berria sor daiteke]]> https://www.berria.eus/paperekoa/1945/022/001/2019-08-24/nagusitasun_berria_sor_daiteke.htm Sat, 24 Aug 2019 00:00:00 +0200 Eñaut Agirrebengoa https://www.berria.eus/paperekoa/1945/022/001/2019-08-24/nagusitasun_berria_sor_daiteke.htm
Ez Bernal eta ez Carapaz, ez dira Torrevellako (Herrialde Katalanak) irteeran izango. Kolonbiarrak nahiago izan du atseden hartu, Tourreko ahaleginetatik osatu eta lortutakoa behar bezala barneratzeko. Ekuadortarra, berriz, parte hartzekoa zen, baina etxean geratu behar izan du, joan den igandean, Vueltarako entrenatzen ari zela izandako eroriko baten ondorioz. Horrenbestez, Rigoberto Uranen (Education First) Nairo Quintanaren (Movistar) eta Miguel Angel Lopezen (Astana) gain egongo da txirrindulari latinoamerikarren nagusitasuna erabatekoa bihurtzeko ardura. Uranek eta Quintanak Tourra lehiatu zuten orain dela hilabete eskas; beraz, nekez eutsiko diote goiari bukaerara arte. Lopezek, ordea, lasai hartu ditu Giroaren osteko hilabeteak, eta, Italian baino zorte hobea badu, garaipenaren lehian sar daiteke.

Taldearen indarra lagun izango dute hirurek. Movistarrek Carapazen hutsunea izango du, baina, halere, goi mailako zortzikoa aurkeztuko du. Quintanaz gain, bertan daude Alejandro Valverde, Marc Soler, Antonio Pedrero eta Imanol Erbiti, besteak beste. Astanaren zerrenda ere ez da edonolakoa: Ion Izagirrek helduko dio aginte makilari Lopezekin batera, eta haien aldamenean egongo dira Gorka Izagirre, Jakob Fuglsang edota Omar Fraile. Eta Education Firsti dagokionez, zeresan handia emateko moduko beste bi ziklista kolonbiar ditu Uranez gain: Sergio Higuita eta Daniel Felipe Martinez.

Jumbo Visma ere lasterketako talderik ahaltsuenen zakuan sartu behar da. Hasteko, liderrik sendoenetako bat dauka: Primoz Roglic. Esloveniarra da latinoamerikarren mehatxu nagusia. Giroan podiuma zapaldu zuen —hirugarren izan zen—, eta gehiagoren gose da. 36 kilometroko bakarkako erlojupeko bat dauka lasterketa apurtu ahal izateko, eta maldan gora kapaza da igotzaile onenei eusteko. Harekin batera, Tourrean hirugarren izandako Steven Kruijswijk jardungo da taldeburu gisa, eta ezkutari lanetan ariko dira George Bennett edota Robert Gesink.

Koska bat beherago, UAE Emirates dago, lider gisa Fabio Aru eta Tadej Pogacar dituela. Ineosek ez du izen handiko taldebururik izango, baina baditu aurrean tokia egiteko moduko hiru ziklista: Wout Poels, Tao Geoghegan Hart eta David De la Cruz. Pierre Latour (Ag2r), Rafal Majka (Bora), Esteban Chaves (Mitchelton) eta Wilco Kelderman (Sunweb) ere saiatuko dira lehia horretan sartzen.

Etapen lehia ere zirraragarria izango da, klase eta sen handiko ehiztariak egongo baitira. Horien artean daude Mikel Nieve (Mitchelton), Thomas De Gendt (Lotto Soudal), Philippe Gillbert (Deceuninck-Quick Step), Gianluca Brambilla (Trek), Dylan Teuns (Bahrain)... Oscar Rodriguez (Euskadi-Murias) ere multzo horretan sar liteke, iaz Camperonan erakustaldi gogoangarria eman eta gero. Muriasek haren aukerei begiratuko die batez ere. Eta Caja Ruralen kasuan, Alex Aranburu, Jon Aberasturi eta Jonathan Lastra saiatuko dira ezustea ematen.

Mendiak, hasi eta buka

Esprinterrentzat ez da giro izango. Distira egiteko aukera txikia izango dute Fernando Gaviriak (UAE), Sam Bennettek (Bora), John Degenkolbek (Trek) eta enparauek, ibilbidea oso menditsua baita. Etapa motzak eta gogorrak izango dira nagusi, azken urteetan bezala. Bakar batek ere ez du 200 kilometrotik gora izango; ordea, zortzik mendate batean izango dute helmuga. Oilarrek lehen astetik bertatik egon beharko dute adi. Areago, gaur bertan zabalduko dira lehen aldeak, hemezortzi kilometroko taldekako erlojupekoan. Hortik aurrera, malkarrak beren epaia ematen hasiko dira, Javalambren, Mas de la Costan eta Cortals d'Encampen bukatzen diren etapekin.

Lehen atseden egunaren ostean, erlojupeko luzea jokatuko da Paue (Okzitania) inguruan, eta Euskal Herrian korrituko dira hurrengo bi etapak. Lehena, 11.a, Donapaleun (Nafarroa Beherea) hasi eta Urdazubin (Nafarroa) bukatuko da. Biharamunean, berriz, tropelak Los Arcosko zirkuitutik (Nafarroa) Bilborainoko bidea egingo du. Ehiztarientzako egunak izango dira. Faboritoak ez dira gehiegi mugituko, datorkienaren zain: Los Machucosen bukatuko da 13. etapa, Acebon 15.a, eta Cubillan 16.a. Ondoren, 18. etapan, Guadarramako mendizerran gora eta behera ariko dira ziklistak, eta 20.ean izango dute azken borroka.]]>
<![CDATA[Sasoi betean iritsiko dira]]> https://www.berria.eus/paperekoa/1949/016/001/2019-08-23/sasoi_betean_iritsiko_dira.htm Fri, 23 Aug 2019 00:00:00 +0200 Eñaut Agirrebengoa https://www.berria.eus/paperekoa/1949/016/001/2019-08-23/sasoi_betean_iritsiko_dira.htm
Ilusio eta konfiantza handia dute Rodriguezek eta Aranburuk. Biak ere ondo erakutsi zuten iragan astean, Burgosko Itzulian. Batak bigarren postua lortu zuen sailkapen nagusian, eta bigarren izan zen etaparik gogorrenean; besteak, berriz, laugarren etapa irabazi zuen, aurrenekoan garaipenak oso gutxirengatik ihes egin ostean. Emaitza horiek «lasaitasuna» eman diete biei. Rodriguezek ez zuen espero Vueltaren atarian halako errendimendua izaterik, eta «erabat harrituta» gelditu da. «Ez dut intentsitatezko saiorik egin altuerako lan saioetan, eta horregatik da harrigarria horren ongi aritu izana». Aranburuk, berriz, taldearen jarduna azpimarratu du. «Oso lan ona egin dugu talde moduan, eta, horri esker, bi etapa irabazi ditugu; bat nik, eta bestea Jon Aberasturik. Bide horretatik jarraitu behar dugu».

Bigarren Vuelta izango dute biek, eta, alde horretatik, esperientziaren balioa aipatu du gipuzkoarrak. «Iaz oso urduri iritsi nintzen, nire lehen itzuli handia izanik. Orain, ordea, badakit nolakoak diren gauzak, eta horrek beste sosegu bat ematen dizu». Eskarmentuaz landa, sasoi osoko emaitzen bermea ere badute. Izan ere, aurrerapauso nabarmena eman dute. Aranburuk okerreko hankarekin hasi zuen urtea, belauneko lesio baten erruz. Alabaina, behin pedal kolpe egokia hartuta, emaitza on ugari lortu du; tartean, bi garaipen —Madrilgo eta Burgosko itzulietan— eta hiru bigarren postu —Alpeetako Itzulian, Getxoko Zirkuituan eta Burgosen—. Onena oraindik etortzeko omen dago. «Denbora pasatu ahala, geroz eta sentipen hobeak ari naiz izaten. Oraindik beste puntu bat gehiago har dezakedala uste dut».

Rodriguezek, berriz, uste du «oinarri sendoagoarekin» helduko dela aurtengo Vueltara. «Iaz errebotez iritsi nintzen, eta ezin izan nuen bete-betean prestatu. Aurten, ordea, prestakuntza guztia Vueltari begira egin dut». Postu onak lortu ditu Murtziako, Andaluziako, Asturiasko eta Okzitaniako itzulietan, eta zer esanik ez, Burgoskoan. Haatik, badaki «oso zaila» izango dela iaz Camperonan gora egindako balentria errepikatzea. «Sasoi guztian oraindik ez dut etaparik irabazi. Beraz, zaila da aurrenekoa itzuli handi batean lortzea». «Presio pixka bat» duela aitortu du. «Kalean jendeak asko animatzen zaitu, eta hori asko eskertzen dut, baina, sare sozialetan, anonimotasunetik, jendeak gauza asko eskatzen dizkizu. Iruzkin horietatik urruntzen hartzen saiatzen naiz. Oinak lurrean izan nahi ditut».

Ibilbide «aproposa»

Gauzak hala, Rodriguezek ez du sailkapen nagusiari zeharka begiratzeko tentaziorik. Buru-belarri jardun nahi du etapa ehizan, beste ezertan pentsatu gabe. «Hobe dut indarrak helburu bakarrean jarri. Eta, gaur egun, beste etapa garaipen bat lortzea da xederik zentzuzkoena». Aurten gazteen sailkapena jokatuko da aurrenekoz, baina nafarrak ez du maillot zuriarekin itsutzeko asmorik. «Ziklista oso onak egongo dira sailkapen horretan. Adibidez, Tadej Pogacar. Lehiatu behar badut, aurrera, baina ez da helburu nagusia, inondik inora».

Aranburu ere sartuko da sailkapen horretan, 25 urtez azpiko gainontzeko ziklistak bezala, baina ez dio erreparatuko. «Bestelako helburuak ditut buruan: ihesaldiak borrokatzea, nire buruaren berri ematea, garaipenen batekin amestea...». Burgosen (Espainia) errematatzailerik onenen artean egon zen, maldan gora esprint indartsuak eginda. Ordea, Vueltan estrategia aldatu beharko du. «Oso zaila izango da tropelean errematatzea, goi mailako ziklistak egongo baitira bertan. Hortaz, batik bat ihesaldietan jorratuko ditut nire aukerak».

Ibilbideari dagokionez, euren ezaugarrietara ondo egokitzen dela uste dute biek. Rodriguezen aburuz, «iazkoa baino apur bat gogorragoa» da. Nafarrak zenbait igoera ditu begiz jota. «Ondo molda naiteke Acebon, Machucosen, Mas de la Costan eta Cubillan. Zaila izango da, baina horietan distira egiten saiatuko naiz». Aranburu, berriz, etapa gorabeheratsu eta bihurrietan saiatuko da. Halakoak dira Euskal Herrian korrituko diren biak. «Aukerakoak dira guretzat. Ihesaldia garesti egongo da, baina inork ez du izango guk baino gogo gehiago».

Urratsa egiteko "prest—

Iragarle izateko eskatuta, Rodriguezek Movistarreko liderrak ikusten ditu lasterketa irabazteko faborito nagusi bezala. «Dena oso berdinduta ikusten dut. Ez da punta-puntako izar asko ariko, baina hor daude Quintana, Valverde... Talde oso indartsua du Movistarrek, eta haiek dira faboritoak». Aranburuk, berriz, ez luke jakingo hautagai nagusi bat aukeratzen. «Talde oso indartsuak daude, eta denek dute lider on bat. Edozein ikusten dut irabazteko gai. Erlojupekoetan eta lehen asteko mendietan ikusiko da nola dagoen bakoitza, eta, ohi bezala, azken etapetan erabakiko da dena».

Ziurrenik, datorren urtean «talde indartsu» horietakoren batean ariko dira Aranburu eta Rodriguez. Astanarekin lotzen dituzten zurrumurruez galdetuta, biek diote behin betiko erabakirik ez dutela hartu oraindik. Hori bai, garbi dute World Tourrean ariko direla, azken urteetan izaniko garapenari jarraipena emanez. Aranburuk 2016an egin zuen debuta profesional gisa, Euskadi-Muriasen eskutik, eta azken hiru urteak Caja Ruralen eman ditu. Iaz lortu zuen estreinako garaipena, Getxon (Bizkaia), eta aurten beste bi ale gehitu dizkio bildumari. Rodriguezek garaipen bakarra du, baina ez da edonolakoa. Izan ere, oso gutxiren esku dago profesional bihurtu eta urtebetera Vueltan etapa bat irabaztea.

Gorengo mailara egingo dute jauzi datorren denboraldian. Handia da erronka, baina bere burua «prest» dakusa Aranburuk. Rodriguezek, aitzitik, ez ditu gauzak gehiegi aurreratu nahi. «Lehen gauza Vueltan txukun aritzea da. Eta, gero, oporrez gozatuko dut, badugu-eta beharra».]]>
<![CDATA[«Sendoak eta erasokorrak izan nahi dugu berriro»]]> https://www.berria.eus/paperekoa/1913/020/001/2019-08-18/sendoak_eta_erasokorrak_izan_nahi_dugu_berriro.htm Sun, 18 Aug 2019 00:00:00 +0200 Eñaut Agirrebengoa https://www.berria.eus/paperekoa/1913/020/001/2019-08-18/sendoak_eta_erasokorrak_izan_nahi_dugu_berriro.htm
Gaur ekingo diozue denboraldiari, etxean, Levanteren aurka. Nolako sentipenak dituzue?

Onak. Gauzak espero bezala atera zaizkigu. Minutuak pilatu eta teknikariaren mekanismoak barneratu ditugu. Praktikan jarri dugu entrenamenduetan landutakoa, eta behar bezala iritsiko gara liga hasierara. Lan saio asko egin ditugu, eta karga handia izan dugu. Hori guztia gaur islatzea gustatuko litzaiguke.

Gorabehera asko izan dituzue sasoi-aurreko partidetan. Zer analisi egiten duzue?

Prestakuntzan, denetariko momentuak izaten dira. Partida batzuk onak izaten dira, eta beste batzuk ez horren onak. Kontua norabide egokian lan egitea da, eta uste dut guk hala egin dugula. Ulertu dugu entrenatzaileak zer eskatzen duen, eta jada gai gara haren planteamendua praktikan jartzeko. Hori da garrantzitsuena.

30 jokalari aritu zarete. Asko da.

Bai, ez da ohikoa. Baina jokalari asko edo gutxi edukitzearen artean aukeratu beharko bagenu, lehen aukerarekin geldituko ginateke. Arazoak edukiko genituzke bestela. Ona da lehia handia izatea, eta jokalariok oraindik ez jakitea zer hamaikakorekin ariko garen. Denok txukun jardun dugu denboraldi-aurrean, eta jokatzen duenak jokatzen duela, ondo lehiatuko gara.

Zer iritzi duzu fitxaketez?

Klubak oso lan ona egin duela deritzot. Oso jokalari onak iritsi dira. Gainera, oso ondo egokitu dira taldera. Gure ikurrak umiltasuna, lana eta jarrera lehiakorra dira, eta horiekin bat datoz jokalari berriak. Ekarpen handia egin dezaketela uste dut.

Erasoko postuak indartu dira nagusiki. Defentsan, apenas izan den aldaketarik. Atzeko lerro sendo eta fidagarria duzuen seinale.

Aurrean beste talde batzuek utzitako jokalariak genituen, eta, sasoia amaitzean, haiek utzitako hutsuneak bete beharra zegoen. Esan bezala, klubak taxuz jokatu du merkatuan, lerro guztiak ondo indartu ditu, eta, hala, berme handiko taldearekin iritsiko gara gaurko lehiara.

Ohi bezala, asko ari da hitz egiten Pacheco, Laguardia eta Maripanen balizko irteeraz. Kolpe handia litzateke haiek galtzea?

Funtsezko jokalariak dira guretzat, eta Alavesen jarraitzea nahi dugu. Zelaian sekulako garrantzia dute, eta liderrak dira taldean. Guztion miresmena eta errespetua dute. Haien beharra dugu.

Zelaian ez ezik, aulkian ere aldaketa garrantzitsua izan da: Asier Garitanok hartu du Abelardo Fernandezen tokia. Nolakoa izan da trantsizioa?

Nahiko samurra, antzeko jokamoldea baitute. Hori bai, bakoitzak bere ñabardurak ditu. Badira aldeak metodo, mekanismo eta taktikei dagokienez. Ez dira berdinak. Ordea, biek garrantzi handia ematen diote defentsako sendotasunari, eta joko zuzenaren aldekoak dira. Alde horretatik, talde sendo eta erasokorra izan nahi dugu berriz. Eta, noski, Mendizorrotzan gotorlekua eraikitzen saiatuko gara beste behin. Zaleen babesa da gure indargune nagusietako bat.

Zu Abelardorekin finkatu zinen lehen taldean. Pena emango zizun hura irten izanak.

Noski. Miresmen handia diot, eta asko zor diot. Bihotzean eramango dut beti. Orain, ordea, Asierren esanetara gaude, eta harekin ere gustura nabil. Oso langilea da. Ea hari Abelardori bezain ongi doakion.

Harekin euskaraz mintzatzeko aukera izango duzu.

Hala da. Ez da gutxi!

Aurreko sasoian aise eutsi zenioten mailari, eta Europako postuetan egon zineten jardunaldi askoan. Orain, zer helburu duzue?

Klub gisa hazten jarraitu nahi dugu, eta, horretarako, mailari eustea da aurreneko gauza. Gogor egin beharko dugu lan horretarako. Egia da iragan denboraldian sekulako lehen itzulia osatu genuela, eta horri esker beste urte batzuetan baino lasaiago edo errazago lortu genuela salbazioa. Orain, ildo berari eustea da helburua. Jaitsiera saihestea da lehen zeregina, eta estutasunik gabe lortzen badugu, hobe. Hala, berriz ere amesteko aukera izango genuke.

Europako postuetatik kanpo gelditu izanaren arantza duzue?

Bai, noski. Azkenean, ia denboraldi osoa pasatu genuen goiko postuetan. Behera egin genuen azken partidetan, eta pena da. Ordea, futbolak beti beste aukera bat ematen dizu, eta, sasoi honetan, berriz ere borroka horretan izatea gustatuko litzaiguke, mailari eutsi eta gero.

Hirugarren denboraldia izango duzu lehen taldean. Erabat finkaturik zaude dagoeneko. Beteranoa dirudizu.

Oso pozik nago hemen, etxean eta nire taldean. Bi denboraldi polit bizi izan ditut orain arte, eta ilusio handia dut aurrera begira. Zaleak babes handia ematen ari zaizkit, eta nik zelaian adierazi nahi diet nire esker ona.

Asko hazi zara bi urte hauetan. Nola hartu duzu arrakasta?

Lasaitasunez. Eguneroko lanean zentratuta. Futbolak ez du etenik, eta iraganean egin duzunak garrantzia galtzen du pixkanaka. Une oro erakutsi behar duzu zure balioa. Pozik nago orain arte egindako ibilbidearekin, baina oraindik gauza asko dauzkat egiteko eta lortzeko. Orain, gaurko partida besterik ez dut buruan.

Etxean egotea, gertukoak alboan dituzula, oinak lurrean izateko lagungarria izango zaizu.

Tira, etxean egon edo ez, nik uste dut bakoitzaren nortasunean dagoela arrakasta bizitzeko modua. Baina, bai, familia, neska laguna eta lagunak ondoan edukitzeak laguntzen du. Haien babesa eta ilusioa jasotzeak indarra ematen dizu.

Zer erronka izango duzu denboraldi honetan?

Taldeari ahalik eta minutu gehiena jokatuta laguntzea gustatuko litzaidake. Eta, noski, minutu horiek onak eta kalitatezkoak izatea nahiko nuke.

Aurreko denboraldian lehia estua izan zenuen Ximo Navarrorekin eskuin hegalean. Sasoi honetan, beste horrenbeste gertatuko da?

Bai. Denontzat da mesedegarria lehia izatea, eta asteburuero nork jokatuko duen ez jakitea. Jokalaria bere burua zukutzera behartzen du horrek.

Eskuinean ez ezik, ezkerrean ere joka dezakezu. Eta zelai erdiko hegaletan ere ari zaitezke. Hainbat tokitan joka dezakezu.

Hala da. Oso ona da postu batean baino gehiagotan jokatu ahal izatea, modu horretan aukera gehiago eman ahal diozulako entrenatzaileari, eta laguntza handiagoa eskaini taldeari. Eta pertsonalki, denbora gehiagoan joka dezakezu.

Eredua zara azpiko mailetako jokalarientzat. Izan ere, erakutsi duzu gazte gasteiztar batentzat posible dela Alavesen bidea egitea.

Harro sentitzen naiz. Harrobian gauzak oso ondo ari dira egiten, eta lan hori islatzeko modurik onena da gazteak lehen taldean ikustea. Denok ikusi nahi dugu harrobiko jende gehiago lehen taldean, eta nik uste dut jokalari batzuek pausoa emango dutela hemendik gutxira.

Geroz eta arabar eta gasteiztar gutxiago dago Alavesen bigarren taldean. Zer iritzi duzu?

Pena da. Uste dut hemengo jokalariek dohainak badituztela harrobiko taldeetan egoteko, baita bigarren taldean ere. Horretan ni ezin naiz sartu, baina denok ikusi nahi dugu harrobian Gasteizko eta inguruko jende gehiago.]]>
<![CDATA[Garitanoren aroa modu onean hasten saiatuko da gaur Alaves, etxean]]> https://www.berria.eus/paperekoa/2046/021/001/2019-08-18/garitanoren_aroa_modu_onean_hasten_saiatuko_da_gaur_alaves_etxean.htm Sun, 18 Aug 2019 00:00:00 +0200 Eñaut Agirrebengoa https://www.berria.eus/paperekoa/2046/021/001/2019-08-18/garitanoren_aroa_modu_onean_hasten_saiatuko_da_gaur_alaves_etxean.htm
Hamaikako berritua zelairatuko du Alavesek, erasoko postuetan batik bat. Taldea utzi dute Jonyk, Callerik, Bastonek, Inuik eta Rollanek -denak utzita aritu ziren-, eta haiek ordezkatzeko, Aleix Vidal, Joselu, Lucas Perez eta Luis Rioja iritsi dira oraingoz. Laurak titular izan beharko lirateke. Bestalde, bi erdilari fitxatu ditu Arabako taldeak: Pere Pons eta Jeando Fuchs. Kataluniarra lemazain lanetan arituko da, Pina edo Manu Garciaren aldamenean. Brasanacek utzitako tokia hartuko du.

Atzeko lerroan, berriz, azken urteetako oinarriari eutsi dio Alavesek. Pacheco eta Laguardia izango dira liderrak, baldin eta ez badira merkatuaren azken txanpan irteten. Haiekin batera, Martin, Maripan, Ely, Duarte, Ximo Navarro eta berpiztutako Adrian Marin ariko dira. Nekez izango dute lekurik Tachi, Verdon eta Saul Garcia iritsi berriek.

Denboraldi-aurrean denetariko sentipenak igorrita iritsiko dira arabarrak gaurko lehiara. Ongi jardun zuten Racing, Albacete eta Oviedoren aurka; nola hala, berriz, Leioa, Zaragoza eta Sportingen kontra; eta eskas, Realaren eta Fuenlabradaren aurka. Guztira, lau partida irabazi, bi berdindu eta beste bi galdu dituzte. Garitanok hamaikako ugari eta sistema taktiko desberdinak erabili ditu lagunartekoetan, baina, hark esatera, taldeak «garbi» ditu ideiak, eta «nahiko ondo» iritsiko da ligako estreinakora.

Ziurrenik, 4-4-2 marrazkia ezarriko du, Abelardok bere garaian egin bezala, eta estilo aldetik ere ez da desberdintasun handirik espero. Ondorio hori atera daiteke Garitanoren hitzak adituta: «Talde saiatua, azkarra eta oldarkorra izatea gustatuko litzaidake. Baita bi areetan eraginkorrak izatea ere». Horretaz aparte, Mendizorrotzan ohiko sendotasuna erakusten saiatuko da Gasteizko taldea; hasteko, gaur Levanteri irabazita. Teknikari gipuzkoarrak jokalari guztiak izango ditu eskuragarri, Laguardia eta Ximo Navarro izan ezik. Min hartuta daude bi atzelariak.

ALAVES-LEVANTE

Alaves. Pacheco; Agirregabiria, Ely, Maripan, Duarte; Vidal, Pina, Pere Pons, Rioja; Joselu eta Lucas Perez.

Levante. Aitor; Coke, Vezo, Postigo, Toño; Vukcevic; Campaña, Bardhi; Hernani, Mayoral eta Morales.

Epailea. Soto Grado.

Lekua. Mendizorrotza (19.840 ikusle).

Ordua. 17:00etan (Mov. La Liga).]]>
<![CDATA[«Txipa jada aldatu dugu; prest gaude sufritzeko»]]> https://www.berria.eus/paperekoa/2134/014/001/2019-08-14/txipa_jada_aldatu_dugu_prest_gaude_sufritzeko.htm Wed, 14 Aug 2019 00:00:00 +0200 Eñaut Agirrebengoa https://www.berria.eus/paperekoa/2134/014/001/2019-08-14/txipa_jada_aldatu_dugu_prest_gaude_sufritzeko.htm
Denboraldi berria ate joka duzue jada. Dastatu duzue aurreko sasoiko arrakasta?

Ahalik eta gehien. Ahaztezina izan zen guztiontzat. Taldearen jokoa ikusgarria izan zen, etxean batez ere, eta emaitzak lagun izan genituen. Orain, ordea, aldaketa dator. Munduko ligarik zailenetako batean jokatu behar dugu, eta hutsetik hasiko gara. Ezin gara egon iraganean egindakoari begira.

Larunbatean ekingo diozue sasoiari, Leganesen. Zer moduz iritsiko zarete?

Taldeak oso lan ona egin du. Lesio ugari izan dugu, eta horrek dinamika apur bat eten du. Baina uste dut prestakuntza egokia izan dela. Partida batzuek balio izan digute Lehen Maila nolakoa den ikasteko. Lehia hasteko irrikan gaude.

Oro har, itxura ona eman duzue sasoi-aurrean, baina makal aritu zineten azken partidan, Realaren aurka. Zer eragin izan dezake horrek ligako estreinakoan?

Partida horrek balio izan digu ikusteko Lehen Maila hemen dagoela, eta iragan sasoian lortutako ia guztia ahaztu behar dugula. Ahalik eta lasterren jantzi behar dugu lanerako atorra. Talde garrantzitsu batzuek ere zailtasunak izaten dituzte mailari eusteko; beraz, guk, igo berriak izanik, erruz egin beharko dugu lan. Hori bai, erronkak kitzikatu egiten gaitu.

Dena nahieran atera zitzaizuen aurreko denboraldian, baina oraingoan dezentez gehiago sufritu beharko duzue. Psikologikoki prest zaudete kolpeak jaso eta etsipenari aurre egiteko?

Oso gaizki ohitu ginen iragan sasoian, baina txipa aldatu dugu jada. Prest gaude sufritzeko. Taldeko jokalari asko Lehen Mailan aurrez arituak dira, eta badakite gauzak nolakoak diren. Uste dut eskarmentu horrek asko lagunduko digula gauzak okertzen zaizkigunean. Oraindik oso goiz da, baina oso talde ona daukagu, eta berriz ere denboraldi ederra osatu dezakegula deritzot.

Butarquen hamaikako berritua zelairatuko duzue ziurrenik. Izan ere, zazpi jokalari fitxatu dituzue. Zer iritzi duzu iritsi berriez?

Kalitate eta esperientzia handiko jokalariak dira. Laguntza handia emango digute, bai zelaian,bai zelaitik kanpo. Adibidez, Chimy Avila Huescarekin jaitsi zen aurreko sasoian; beraz, egoera zailetan modu askotan lagun diezaguke. Beti da zaila talde berri batera iristea, baina uste dut iritsi berriak ongi ari direla egokitzen.

Fitxaketen artean bada bereziki harritu zaituen inor?

Bat esatearren, Darko Brasanac. Pertsona gisa harritu nau batik bat. Elitean urte asko daramatzan, baina oso apala eta gertukoa da. Bestela, ez dut ezusterik hartu. Gehienak Lehen Mailan gauza ederrak egiten ikusi ditugu. Gauzak hala, talde orekatua dugula deritzot. Eskarmentua badugu, eta gaztetasuna ere bai.

Fitxaketa gehienak erasoa indartzeko egin dira, baina defentsari ere erreparatu zaio. Atezain gisa, seguru sentitzen zara aurretik izango duzun lerroarekin?

Aurreko denboraldian oso ondo aritu ginen defentsan, eta, sasoi honi begira, oinarri ona genuen. Orain, Estupiñan eta Roncagliarekin, are hobeak izango gara. Exijentzia maila oso altua izango da denboraldi honetan, baina, nire ustez, nahikoa berme dugu atepean eta atzeko lerroan. Konfiantza itsua dut nire aurretik jokatuko duten jokalariengan.

Zein izango da taldearen helburua? Mailari edonola eustea sinatuko zenukete, edo estutasunak saihestea da asmoa?

Badakigu oso zaila izango dela mailari estutasunik gabe eustea. Hala balitz, ederki, baina errealistak gara. Asko borrokatu beharko gara, beti izaten baita gogorra igo osteko lehen urtea. Mentalitate horrekin, gehiago zukutuko dugu geure burua.

Aurreko sasoian, joko ausarta, erasokorra eta ikusgarria egin zenuten. Horri eutsiko diozue?

Jagobak [Arrasatek] filosofia garbia dauka. Erasoari ematen dio lehentasuna, betiere defentsako zereginak albo batera utzi gabe. Guztiok gaude eroso jokamolde horrekin; bai lehendik geundenok, bai iritsi direnak. Erabateko fedea dugu teknikariaren estiloan.

Haatik, Lehen Mailako taldeek askoz ere jo handiagoa dute, eta, menturaz, gehiago behartuko zaituztete atzera begiratzera?

Agian bai, baina taldeak filosofia garbi bat dauka, eta muina ez da aldatuko. Aurkarien maila ona izango da, baina guk ere kalitate handiagoa dugu orain.

Sadarrek ildo horren giltzarrietako bat izaten segituko du, ezta?

Garbi dago. Sadarrek dena eman zigun iragan denboraldian. Han jokaturiko partida gehienak irabazi genituen. Zenbaki horiek berdintzea ezinezkoa izango da, baina Sadar berriz ere gotorleku bihurtzen ahalegindu behar dugu. Iraganean gertatzen zen bezala, Iruñera etortzea erronka handia izan behar da aurkarientzat.

Zer mezu ari zaizue igortzen Arrasate?

Aldatu beharra dugula. Teknikariak anbizioa du, eta badaki nolakoa den Lehen Maila. Horregatik, guk beste koska bat igotzea nahi du. Bide onetik goaz, eta uste dut ondo arituko garela.

Eta zuri, bakarka, zer helarazi dizu?

Ez dugu hitz egin atepean egon daitekeen lehiaz. Ni gogor ari naiz lan egiten, izaniko lesio larriaren ostean konfiantza berreskuratzeko. Halakoetan, fisikoki ongi osatzen zara, baina psikologikoki gehiago kostatzen da. Ni lehiatzeko prest nago jada, entrenamendu eta norgehiagoka guztietan erakutsi bezala. Gero, teknikariak erabakiko du atepean nor jarri. Erabakia dena delakoa izanda, errespetatu egingo dut.

Iragan sasoian aulkitik ikusi behar izan zenituen partida gehienak. Nola bizi izan zenuen?

Taldea oso dinamika onean zegoen; ni osatu berria nintzen, eta Ruben oso lan txukuna ari zen egiten. Hortaz, onartu egin behar izan nuen aulkian esertzea. Ni zelaian nagoenean, ordezkoak errespetatu nazala nahi izaten dut. Hau da, taldekide izatea nahi duzu, eta ez traba. Taldekideok elkar estutu behar dugu, lo gelditu ez gaitezen, baina beti kirol legez.

Titular izateko aukera berberak dituzue orain Rubenek eta biok?

Hutsetik hasiko gara. Eguneroko jardunak eta partidetako errendimenduak zehaztuko du nork jokatuko duen eta nork ez. Rubenek sasoi bikaina osatu zuen, baina ez du postua ziurtaturik. Eta nik ez dut zertan berriz ere ordezko izan. Osasunan ezin zaitezke lokartu, denok dugun onena ematen baitugu egunero.

Estreinakoa izango duzu Lehen Mailan. Prest zaude?

Oso gogotsu nago, eta oso pozik, azpiko maila guztietatik pasatu ostean iritsi bainaiz. Gainera, min hartuta hilabete dezente pasatu eta gero, ederra da halako sari bat jasotzea. Orain, gozatzeko eta itzuli naizela erakusteko garaia da.]]>
<![CDATA[Igogailutik jaitsi nahi du]]> https://www.berria.eus/paperekoa/2056/015/001/2019-08-14/igogailutik_jaitsi_nahi_du.htm Wed, 14 Aug 2019 00:00:00 +0200 Eñaut Agirrebengoa https://www.berria.eus/paperekoa/2056/015/001/2019-08-14/igogailutik_jaitsi_nahi_du.htm
Hori horrela, oso garesti dago salbazioa igo berrientzat. Erronkak bertigoa eragin diezaieke gorritxoei; batez ere, iragan hurbilari erreparatzen badiote. Osasuna 2016-17ko sasoian lehiatu zen azkenekoz Lehen Mailan. Agian, lehiatu ez da aditzik aproposena, Iruñeko taldeak 22 puntu eskas bildu baitzituen. Eliteko futbola handi gelditu zitzaion, argi eta garbi. Haatik, oraingoan zaleek badituzte itxaropena izateko motiboak. Batetik, nafarrak Bigarren Mailako txapeldun gisa igo dira -aurreko aldian seigarren izan ziren ligan, eta kanporaketen bidez igo ziren-; eta, bestetik, talde askoz ere zailduagoa eta lehiakorragoa dute.

Apustua, aurrealdean

Nafarren lehen arrakasta joan zen denboraldiko taldearen bizkarrezurrari eutsi izana da. Carlos Clerc Levantera joan da, baina, bestelakoan, ez da irteera garrantzitsurik izan. Ruben Garcia taldeko izarra galtzeko arriskua zuten gorritxoek; lau urterako fitxatu dute, ordea, Levanteri hiru milioi euro ordainduta. Brandon Thomas ere bere egin dute, bi milioi euroren truk. Eta, horretaz landa, egin beharreko jauzi handira behar bezala egokitzeko, aurrez goi mailan beren kalitatearen berri emandako jokalariak fitxatu dituzte. Soa erasoko lerroan paratu dute batik bat, hiru aurrelari berri fitxatuta: Ezequiel Avila Chimy, Adrian Lopez eta Marc Cardona.

Edonola, atzera ere begiratu du Braulio Vazquez kirol zuzendariak. Defentsa sendorik gabe ezinezkoa da kasik Lehen Mailan lehiatzea, Osasunak orain dela hiru sasoi bere haragitan bizi bezala. Odol-hustu egin zen, partidako ia 2,5 gol jasota 94 gol guztira. Bada, halakorik errepika ez dadin, Brauliok Darko Brasanac euskarri defentsiboa, Facundo Roncaglia erdiko atzelaria eta Pervis Estupiñan ezker hegaleko atzelaria fitxatu ditu. Rober Ibañez eskuin hegaleko erdilaria ere bereganatu du, azken bi sasoietan taldean Getafek utzita aritu ondoren. Horrenbestez, zazpi jokalari berri iritsi dira, eta besteren bat ere heldu liteke merkatua itxi aurretik; erdiko atzelari bat. Diru zorroari astindua ematen ari zaizkio nafarrak: 13,5 milioi euroko inbertsioa egin dute orain arte.

Orain, pieza guztiak bere lekuan jartzea dagokio Arrasateri. Oier Sanjurjo, Roberto Torres, Ruben Garcia, Fran Merida eta David Garcia funtsezkoak izango dira berriro, eta fitxaketen ekarpenak ere garrantzi handikoa izan beharko luke. Osasuna iragan sasoiko talde ausart, bizi, lehiakor eta nekaezina izaten ahaleginduko da, igogailutik irten, eta goiko solairuan egonkortzeko.]]>
<![CDATA[Arnasberritu beharra dute]]> https://www.berria.eus/paperekoa/1901/017/001/2019-08-09/arnasberritu_beharra_dute.htm Fri, 09 Aug 2019 00:00:00 +0200 Eñaut Agirrebengoa https://www.berria.eus/paperekoa/1901/017/001/2019-08-09/arnasberritu_beharra_dute.htm
Lasaitasuna, bai, baina presioa ere izango dute Alavesen. Lucas Perezek eta Joseluk, adibidez, Calleriren eta Bastonen, iragan sasoian Alavesen gol gehien sartu zuten bi jokalarien, hutsuneak bete beharko dituzte. Calleri oraindik itzul liteke, eta taldean badira beste aurrelari batzuk, Guidetti eta Demirovic, esaterako; baina gaur-gaurkoz, galiziarren bizkar gainean dago aurkarien ateak zulatzeko ardura. Aleix Vidalek ere ez du edonolako erantzukizuna izango: hegaletik abiatuta, taldearen jokoa piztu, eta, hala, Jonyren eta Ibai Gomezen itzal luzea ahantzarazteko eskatuko zaio. Kataluniarrak taldeko izarra izan beharko luke.

Garai bateko maila balute, Alavesen zaleak lasai egoteko moduan leudeke. Haatik, hirurek nabarmen egin dute behera azken denboraldietan, eta, horrenbestez, izena baduten arren, zalantza eragiten du eman dezaketen mailak. Joseluk, adibidez, errematatzaile gisa oso kopuru kaskarrak izan ditu azken urteetan. Urruti gelditu da Real Madrilen harrobian distira egin zuen aurrelariaren oroitzapena. Galiziarrak Bigarren Mailara igotzen lagundu zion espainiarren bigarren taldeari, hemeretzi gol sartuta, eta talde nagusian debuta egiteko aukera jaso zuen. Bi partida jokatu zituen han, eta bi gol sartu. Talde askoren arreta piztu zuen haren jardunak, eta 2012an Hoffenheimera joan zen. Alemaniarrek sei milioi eurotan fitxatu zuten.

Ondoren, Alemaniako ligako beste bi taldetara joan zen; Eintracht Frankfurtera 2013an, eta Hannoverrera 2014an. Nahiko txukun aritu zen han: hamalau eta hamar gol sartu zituen, hurrenez hurren. 2015ean hasi zen aurrelariaren benetako gainbehera, Ingalaterrako ligako Stoke Cityk fitxatu baitzuen. Han, denboraldi batez aritu zen, eta, gerora, Deportivon eta Newcastlen jokatu du. Inon ere ez du egonkortzerik lortu.

Aurrez sekula ez du Lucas Perezen aldamenean jokatu. Gutxirengatik, hori bai, Deportivok fitxatu zuenean, taldea utzi berria baitzen Perez. Haren ordezko gisa fitxatu zuen Joselu Galiziako taldeak. Ez zen erronka makala, Perezek mundu guztia harri eta zur utzi baitzuen aurreko sasoian; Espainiako Lehen Mailako golegilerik onenen artean sartu zen, 17 gol sartuta. Ukrainan eta Grezian zaildu ostean egin zuen eztanda, eta beste koxka bat igotzeko asmoz joan zen Arsenalera. Londresko taldeak 20 milioi euro ordaindu zizkion Deportivori.

Alabaina, Joseluri gertatu bezala, Perez ere ez zen behar bezala egokitu Ingalaterrako futbolera, eta 2017an utzita bidali zuten Deportivora. Txukun aritu zen, baina ez zen bi urte lehenagoko berbera izan: bederatzi gol sartu zituen 37 lehiatan. West Hamek 4,5 milioi euroren truke fitxatu zuen iazko udan, eta hamabost partida jokatu zituen bakarrik. Hala, jokatzeko aukeren bila iritsi da Gasteizera: «Jokalari batentzat, konfiantza jasotzea da lehen gauza, eta hori ez zen gertatu Ingalaterran. Alavesek, ordea, apustu handia egin du nire alde, eta horregatik nago hemen». Galiziarrak ezaguna du Arabako taldea, han egon baitzen gazte mailan.

Vidal, erasoan berriro

Joselu eta Lucas Perezek hiru denboralditarako sinatu dute gasteiztarrekin. Aleix Vidal, berriz, Sevillak utzita ariko da. Kataluniarraren kalitatea ezin daiteke ezbaian jarri, baina oso distira gutxi egin du 2015ean Sevilla utzi zuenetik. Aurrez, hegaleko bizi eta zorrotz gisa egin zen ezagun Almerian, eta Sevillan goi mailako jokalari gisa finkatu zen. Bartzelonaren deia jaso zuen orduan, baztertu ezin diren horietako bat. Defentsako eskuin hegala indartzeko fitxatu zuten, baina ez zen sartu ez Luis Enriqueren eta ez Ernesto Valverderen asmoetan. Hori gutxi balitz bezala, 2017an lesio larria izan zuen orkatilan; non, eta Mendizorrotzan.

Bada, han saiatuko da izan zenera itzultzen. Iragan sasoian, helburu horrekin bueltatu zen Sevillara, baina oker jo zion kukuak. Alavesen jarraitutasun gehiago izatea espero du. Aspaldiko partez, erasoko hegaleko moduan ariko da, defentsako zereginak, neurri batean, alde batera utzita.]]>
<![CDATA[Lehergaia ez da faltako]]> https://www.berria.eus/paperekoa/1898/018/001/2019-08-02/lehergaia_ez_da_faltako.htm Fri, 02 Aug 2019 00:00:00 +0200 Eñaut Agirrebengoa https://www.berria.eus/paperekoa/1898/018/001/2019-08-02/lehergaia_ez_da_faltako.htm
Berez, nafarrek ez zuten emankortasun arazorik. Iragan denboraldian, beste inork baino gol gehiago sartu zuten Bigarren Mailan: 59 guztira. Edonola, martxa horri elitean eusteko, lehergai gehiagoren beharra antzeman du Braulio Vazquez kirol zuzendariak. Ezequiel Avila, Marc Cardona eta Adrian Lopez fitxatu ditu, eta aurreko denboraldian elastiko gorritxoa jantzi zuten Ruben Garcia eta Brandon Thomas erosi. Apustu horiek ahalegin ekonomiko handia eskatu diote Iruñeko taldeari: hamar milioi eurotik gora ordaindu du boskotearen truke. Inbertsio historikoa da, eta golen eta emaitzen bidez amortizatu beharko du taldeak. Handia izango da exijentzia; ez da onartuko orain dela hiru sasoi izandako deskalabrurik.

Ruben Garciarena izan da fitxaketarik garestiena. Gorritxoek kosta ahala kosta eutsi nahi zioten, Lehen Mailara modu gogoangarrian igo zen taldeko jokalaririk onena izan baitzen. Hasieran, Levantera itzuli zen, baina Osasunak berrerosi egin du azkenean, hiru milioi euroren truke. Valentziarra nahieran aritu zen iaz, eskolako jolastokian balego bezala, eta, orain, gorengo mailan ere nabarmentzen saiatuko da. Bigarren Mailan aritu da azken hiru denboraldietan, baina badu eskarmentua elitean: bertan lau sasoi eta 112 partida jokatu zituen Levanterekin, 2012tik 2016ra bitarte. Orain 25 urte ditu, jokalari helduagoa da, eta berriz ere Osasunaren izarra izateko ardura izango du, hegaletatik eta punta-erditik abiatuta.

Brandon Thomas ez dago hura bezain zailduta. Espainiako Lehen Mailan partida bakarra jokatu du, Mallorcarekin, 2012-2013ko denboraldian. 2017-2018koan, berriz, hamaika lehia jokatu zituen Frantziako Lehen Mailan, Rennesekin. Aurrelaria Osasunaren ikurretako bat izan zen iragan sasoian, eta, gorengo mailara igota, bi milioi euroren truke erosi dute gorritxoek. Ez da golegile petoa bost ale sartu zituen aurreko denboraldian, baina Sadarreko zaleek biziki eskertzen dituzten ezaugarriak ditu; besteak beste, izaera grinatsu eta nekaezina.

Zeudenei eustearekin batera, beste hiru jokalari erasokor fitxatu ditu Nafarroako klubak, hirurak ere aurrelariak. Iristen lehena eta, halaber, ikusmin handiena piztu duena Ezequiel Chimy Avila da. Gorritxoek 2,7 milioi euro ordaindu dizkiote San Lorenzori 25 urteko aurrelariaren trukean. Aurreko sasoian Huescan hamar gol sartu ostean iritsi da Avila Iruñera. Espainiako taldea Bigarren Mailara jaitsi zen arren, distira handikoa izan zen argentinarraren jarduna. Denboraldia amaitu bezain pronto, Lehen Mailako talde asko zituen ate joka, baina nafarren eskaintzak limurtu zuen gehien. Kalitatea badu, baita borrokarako gaitasuna ere. Ondo bidean, zaleen kutunetako bat bihurtuko da.

Egokitzen dakite

Oihartzun txikiagoa izan du Marc Cardonaren fitxaketak, baina hura erosteko ere apustu irmoa egin du Osasunak: 2,5 milioi euro ordaindu dizkio Bartzelonari. Katalana Eibarren utzita aritu zen aurreko sasoian, eta ez zuen segidan aritzeko modurik izan. Hamazazpi lehia jokatu zituen, sei titular moduan, eta hiru gol sartu. Edonola, jokalari gaztea da oraindik (24 urte), eta etorkizun oparoa duela deritzote arduradun gorritxoek.

Bestelakoa da Adrian Lopezen kasua, nafarrek azken fitxatu duten jokalariarena. Espainiarrak 31 urte ditu, eta sasoi bakarrerako kontratua sinatu du. Hots, harengandik berehalako errendimendua espero du Osasunak. Eskarmentu handikoa da: hamaika denboraldi jokatu ditu Espainiako Lehen Mailan. Goia 2011-2012ko denboraldian jo zuen, Atletico Madrilen. Espainiako taldeak Europa Liga irabazi zuen orduan, eta erakustaldi ugari egin zuen Adrianek. Txapelketa hartan hamaika gol sartu zituen. 2014an Portora joan zen, eta geroztik behera egin du nabarmen. Deportivon txukun aritu zen orain dela bi denboraldi, baina oroitzen zitzaion mailatik urrun jardun du gainerakoan. Izena eta izana uztartzen saiatuko da.

Gaur-gaurkoz, sei aurrelari ditu Osasunak. Izan ere, Juan Villar eta Xisco gehitu behar zaizkie Brandon, Avila, Cardona eta Adriani. Haien artean, Xisco da errematatzaile peto bakarra, eta litekeena da liga hasi aurretik taldetik irtetea. Ez dirudi tokirik duenik. Gainerakoak ez dira areako jokalariak, moldakorrak baizik, hegaletan ere lasai asko joka dezaketenak. Ezaugarri hori propio bilatu du kirol zuzendaritzak, erasoko hegaletan hutsunea bai tzuen taldeak; areago, Kike Barjak luzerako min hartu ondoren.]]>
<![CDATA[Epikari atxikita dago]]> https://www.berria.eus/paperekoa/2089/022/001/2019-07-14/epikari_atxikita_dago.htm Sun, 14 Jul 2019 00:00:00 +0200 Eñaut Agirrebengoa https://www.berria.eus/paperekoa/2089/022/001/2019-07-14/epikari_atxikita_dago.htm
Lehenik, iheskideak lehertuz joan zen, eta, gero, tinko eutsi zion tropelaren amaierako oldarraldiari. Julian Alaphilippek (Deceuninck) eraso gogorra jo zuen Cote de la Jailleren (1,9km eta %7,9), eguneko azken igoeran, eta haren gurpilera itsasi zen Thibaut Pinot (Gropuama). Frantziarrak dena emanda joan ziren, baina ezin izan zuten belgikarra harrapatu. Sei segundoko atzerapenarekin helmugaratu ziren. Edonola ere, biek bukatu zuten etapa bekoki alaiarekin; batez ere, Alaphilippek. Izan ere, maillot horia berreskuratu zuen, ostegunean galdu eta gero. Orain 23 segundora du Giulio Ciccone (Trek), eta 53ra Pinot. Hura da hautagaien artean hobekien kokaturik dagoena, atzo aurkari guztiei 20 segundo atera ondoren.

Maiz, Tourrean zorteak bizkarra eman izan dio Gropuamako ziklistari. Aurten, aitzitik, dena alde ari da edukitzen. Espero baino askoz ere galera txikiagoa izan zuen taldekako erlojupekoan, eta nota ona atera zuen La Planche des Belles Filleseko azterketan. Geraint Thomas ere (Ineos) indartsu agertu zen Tourreko lehen mendiko etapan; atzo, aldiz, estualdia izan zuen, 15 kilometroren faltan erori baitzen. Atzeratuta ekin zion azken mendateari, eta berotua hartu behar izan zuen tropelera itzultzeko. Gero, jokoz kanpo harrapatu zuen frantziarren ahaleginak. Bederen, arazorik gabe eutsi zien gainontzeko faboritoei, Vincenzo Nibalik (Bahrain) ez bezala. Lau minutu utzi zituen italiarrak, eta, hala, sailkapen nagusiaren lehiatik kanpo gelditu zen. Italiako Giroaren zama du hanketan.

Iheslariek ere neke handia pilatu zuten atzo. Etapa hasi berritan abiatu ziren De Gendt, Niki Terpstra (Direct Energie) eta Ben King (Dimension Data), eta kilometro batzuk geroago Alessandro De Marchi (CCC) batu zitzaien. Ohi bezala, eskuzabal jokatu zuen De Gendtek, eta ihesaldiaren ekimena hartu zuen. Eguneko lehen lau mendateak batera igaro zituen lasterketa buruko laukoteak, baina multzoa apurtu egin zen Croix de Parten (4,9km eta %7,9). Erritmoa gogortu egin zuen belgikarrak, eta soilik De Marchik jarraitu ahal izan zion.

Euskaldunak, lanean

Aurreko bikoteak ondo ulertu zuen elkar, eta irmoki eutsi zion tropelarekiko aldeari. Cote d'Aveize (5,2km eta %6,4) gainean 3.40ra zuen onen multzoa. 50 kilometro gelditzen ziren, eta mendate puntuagarri bakarra. Ordea, harainoko bidea ez zen samurra, ezta hurrik eman ere. Errepidea oso estua zen, eta muino gogorrak zeuden. Bertan, ekimena hartu zuen Astanak, Omar Fraile, Pello Bilbao eta Gorka Izagirreren eskutik. Euskaldunek nabarmen bizitu zuten tropelaren abiada, eta Education Firsteko Tanel Kangert eta Simon Clarkeren laguntza izan zuten.

Horiek hala, De Gendt eta De Marchi minutu bakarreko aldearekin hasi ziren igotzen azken mendatea. Italiarrari pedal kolpe freskoagoa sumatzen zitzaion, baina belgikarrak berehala utzi zuen atzean. Atzean ez zen su handirik piztu, Thomas atzeratuta egon arren, eta De Gendtek minutu erdiren aldearekin harrapatu zuen gaina. Hamahiru kilometrora zuen loria. Azken aldapetan abiatu zen Alaphilippe, baita bizi abiatu ere, baina etapak jabea zeukan jada: De Gendt.

Lasterketaren lidergoa, ordea, harena da berriro ere, eta horiz jantzita lehiatuko da gaur, Frantziako Jaiegun Nazionalean. 170 kilometro egingo ditu tropelak, Saint Etienne eta Brioude artean. Ihesaldiak beste aukera on bat izan dezake, gaurko ibilbidea ere gorabeheratsua baita, kontrolerako zaila. Etapa ehiztarientzat oso aproposa da, horrenbeste gaurkoa. Lehen mailako mendate bat dago etapa hasieran, eta, aurrerago, hirugarren mailako bi. Horietan azkena Cote de Saint Just da (3,6km eta %7,3), eta gaina helmugatik hamalau kilometrora du.]]>
<![CDATA[Artelana berritu nahian]]> https://www.berria.eus/paperekoa/1878/015/001/2019-07-12/artelana_berritu_nahian.htm Fri, 12 Jul 2019 00:00:00 +0200 Eñaut Agirrebengoa https://www.berria.eus/paperekoa/1878/015/001/2019-07-12/artelana_berritu_nahian.htm
25 jokalari aritu ziren Arrasateren esanetara lehen lan saioan. Hobe omen da ondo dabilena ez ukitzea, eta, horregatik, jarraitutasunaren alde egin du Iruñeko taldeak. Joan zen sasoiko bizkarrezurrari eustea zuen lehentasun, eta, oraingoz, lortu du. Izan ere, Clerc eta Rober Ibañez dira taldea utzi duten funtsezko jokalari bakarrak. Bata Levantera joan da, eta bestea Getafera itzuli da, bigarren itzulian utzita aritu eta gero. David Rodriguez eta Miguel Diaz ere irten dira, baina taldean tokirik ez zutelako.

Hortaz, bere horretan jarraitzen du iragan denboraldian Arrasatek margoturiko artelanak. Hori bai, ez zaio musu truk atera Osasunari. Izan ere, bi milioi euro ordaindu dizkio Stade Roazhoni Brandon Thomasen truke, eta hiru milioi Levanteri, Ruben Garcia berrerosteko —500.000 euro gehiago izango dira nafarrak datozen bi denboraldietan Lehen Mailan gelditzen badira—. Handia da inbertsioa, baina merezi du. Brandon zaleen kutunetako bat da, zelaian nahiz zelaitik kanpo bat baitator klub gorritxoaren balioekin. Lau gol sartu zituen aurreko denboraldian; kopuru eskasa aurrelari batentzat. Haatik, esfortzurako duen gaitasun handiak ezinbesteko bihurtu du Arrasaterentzat. Ruben Garcia, berriz, taldeko izarra da; margolanari balio berezia ematen dion ukitua.

Nolanahi ere, ez da aski taldearen oinarriari eustea. Jauzi handia dago Bigarren Mailatik Lehen Mailara, eta, bertan lehiatu ahal izateko, zertzelada berrien premia dago. Bada, dagoeneko hiru marraztu ditu Nafarroako klubak, Ezequiel Avila Chimy (San Lorenzo), Marc Cardona (Bartzelona) eta Pervis Estupiñan (Watford) fitxatuta. Taldearen osaketak luze joko zuela zirudien, baina azeleragailua sakatu du Braulio Vazquez kirol zuzendariak. 2015-16ko sasoian, uztaileko azken astean igo zen Osasuna, eta behar baino denbora gutxiago izan zuen taxuzko planifikazioa egiteko. Oraingoan, aitzitik, aurrea hartzeko tartea izan du kirol zuzendaritzak; maiatz amaierarako jada bazekien taldea Lehen Mailan ariko zela datorren sasoian.

Aurreko lerroa indartzea izan da Vazquezen lehentasuna, Avila eta Cardona aurrelariak fitxatuta. Apustu handia egin du klubak haien alde, 5,2 milioi euro ordainduta. Avilaren fitxaketak sortu du ikusmin gehien, hamar gol egin baitzituen Huescarekin joan zen denboraldian. Jokalari azkarra eta izaera lehiakorrekoa da, egokia nafarrentzat. Cardona, berriz, Eibarren eduki ez duen erregulartasuna izaten ahaleginduko da. Biak dira luzerako egindako apustuak: 25 urte ditu argentinarrak, 24 kataluniarrak, eta biek lau denboraldirako sinatu dute. Bost aurrelari ditu taldeak, Xiscoren etorkizuna argitu zain.

Estupiñanek, berriz, Clercek defentsako ezker hegalean utzitako hutsunea betetzeko ardura izango du. Watfordek utzita iritsi da, bi denboraldirako. Jite erasokorreko hegalekoa da, eta zeresan handia eman du Osasunarekin eta Granadarekin batera igo den Mallorcan.

Oreka bila

Hemendik aurrera, defentsaren alorra indartzen saiatuko dira nafarrak. Sendotu beharreko lehen postua defentsako erdigunea da. Unai Garcia luzerako dago min hartuta; beraz, David Garcia eta Aridane dira jokatzeko moduan dauden erdiko defentsa espezifiko bakarrak. Lillok eta Oierrek ere joka lezakete han, baina kirol zuzendaritzak ez du adabakirik nahi, eta bi atzelari fitxatzen saiatuko da. Horietako bat ezker hegalean ere jokatzeko gai izatea nahiko luke. Horretaz landa, euskarri defentsibo baten bila ere badabil, Oierrekin batera zelai erdiko eraiste lanaz arduratzeko.

Nafarroako taldeak Taxoaren osatuko du sasoi-aurrearen zatirik handiena, eta egonaldi labur bat egingo du Herbehereetan. Bi partida jokatuko ditu han, NEC eta De Graafschapen aurka. Osasuna B, Amorebieta, Numantzia, Eibar eta Realaren kontra ere lehiatuko da. Hori guztia, ligako lehen jardunaldian Leganesen (Espainia) jokatu aurretik.]]>
<![CDATA[Bi bide orri, jomuga berbera]]> https://www.berria.eus/paperekoa/1872/018/001/2019-07-11/bi_bide_orri_jomuga_berbera.htm Thu, 11 Jul 2019 00:00:00 +0200 Eñaut Agirrebengoa https://www.berria.eus/paperekoa/1872/018/001/2019-07-11/bi_bide_orri_jomuga_berbera.htm
Alavesek laugarren sasoia izango du jarraian gorengo mailan. Salbazioa itolarririk gabe lortu, eta Europako postuei zeharka begiratzea da Arabako taldearen nahia. Alegia, nolabait ere aurreko denboraldian egindakoa errepikatzea. Ez du lantegi erraza izango, ordea. Abelardo Fernandez proiektu egonkor baten gidaria izan zitekeela zirudien, baina teknikariak utzi egin du taldea, baita Jony eta Calleriren moduko jokalari erabakigarriek ere. Hori horrela, azalberritu egin beharko du Alavesek, Asier Garitanoren lemapean. Bergararrak egonaldi labur eta mikatza izan zuen Realean, eta, orain, iraganean arrakasta handia ekarri dion estilo sendo eta lehiakorra Gasteizen ezartzen saiatuko da.

Abelardoren oso antzeko gidaliburua darabil Garitanok; beraz, jokamoldeari dagokionez ez du iraultza handirik egingo. Haatik, handia izango da jokalarien joan-etorria. Irteerei dagokienez, oraingoz zazpi jokalari atera dira Gasteizko taldetik. Callerik eta Jonyk utzi dute hutsunerik handiena, bata taldeko golegile nagusia izan baitzen iragan sasoian, eta bestea, jokalaririk onena, erasoko jokoari gatza eta piperra emateaz arduratu zena. Utzita aritu ostean, beren jatorrizko klubetara itzuli dira, berriz, Alex Blanco, Inui, Brasanac, Rolan eta Baston.

Garitanok 24 jokalari izan zituen eskuragarri sasoi-aurreko lehen entrenamenduan. Tartean izan ziren Gasteizera azken asteetan iritsitako Lucas Perez (West Ham), Luis Rioja (Almería), Pere Pons (Girona), Ramon Mierez (Atletico Tigre), Jeando Fuchs (Sochaux) eta Saul Garcia (Deportivo). Olivier Verdon (Sochaux) geroago batuko zaie taldekideei, Afrika Kopa lehiatzen ari baita. Soilik Perezek, Riojak eta Ponsek dute toki finkoa proiektu berrian; gainontzekoek denboraldia hasi aurreko zortzi lagunartekoak eta lan saio guztiak profitatu beharko dituzte Garitano konbentzitzeko. Beste horrenbeste egingo dute aurreko sasoian utzita irten ziren gazteek: Ermedin Demirovicek, Adrian Dieguezek, Javi Muñozek eta Rafa Navarrok.

Hutsune handiak

Eibarrek jarraitutasunaren alde egingo du apustu, eta, era berean, taldea gaztetzen saiatuko da. Lehen Mailako batez besteko adinik altuena izan zuen joan den denboraldian ia 29 urte neurketako. Soilik Cucurellak, Jordanek, Calaverak eta Cardonak zituzten 25 urte baino gutxiago, eta lehen biek baino ez zuten izan Mendilibarren konfiantza. Bada, aire berriak ekartzeko asmoz, Bigarren Mailako merkatuari erreparatu dio Fran Garagarza kirol zuzendariak, eta etorkizun oparoa izan dezaketen bi jokalari erosi ditu: Alvaro Tejero (Albacete) eta Roberto Olabe (Extremadura). Esteban Burgos (Alcorcon), Rober Correa (Cadiz), Asier Benito (Athletic B) eta Ruben Lobato (Oviedo B) ere fitxatu ditu. Litekeena da azken biak utzita irtetea datozen asteetan.

Oraingoz, lau jokalari atera dira, eta horietatik bi ez dira edonolakoak: Ruben Peña Vila-Realera joan da, eta Jordan, Sevillara. Funtsezkoak ziren Mendilibarren arbelean, eta ez da erraza izango haien hutsuneak betetzea. Bederen, 21 milioi euro jaso ditu Eibarrek erdilariaren eta atzelariaren truke. Ziurrenik, beste lau poltsikoratuko ditu laster, Bartzelonak Cucurella berrerosteko asmoa baitu. Cardonak eta Millak ere taldea utzi dute; horrenbestez, 26 jokalarik hasi dute 2019-20ko denboraldiaren prestaketa Gipuzkoako taldean. Hasiera-hasieratik zukutuko ditu Zaldibarko entrenatzaileak: bi lan saio izan zituzten atzo, eta beste bi izango dituzte gaur.

Lehen lagunarteko norgehiagoka datorren astelehenean jokatuko du Eibarrek, Leioaren aurka, eta bi egun geroago Amorebietarekin neurtuko ditu indarrak. Gero, sasoi aurreko ohiko egonaldia egingo dute. Aurten, Kossenen (Austria) izango da, uztailaren 19tik 28ra bitarte.]]>
<![CDATA[Hasteko, ustekabeko handia]]> https://www.berria.eus/paperekoa/2089/018/001/2019-07-07/hasteko_ustekabeko_handia.htm Sun, 07 Jul 2019 00:00:00 +0200 Eñaut Agirrebengoa https://www.berria.eus/paperekoa/2089/018/001/2019-07-07/hasteko_ustekabeko_handia.htm
Hortaz, tropeleko behargin bat izan zen protagonista lasterketa frantziarrak Eddy Merckx omendu zuen egunean. Bruselan hasi eta bukatu zen 194,5 kilometroko etapa, eta Teunissenen ezustekoaren aurretik, erorikoek bereganatu zuten arreta. Itzuli handietako lehen asteko arrisku nagusia izan ohi dira, eta ez dute gupidarik izaten liderrekin. Kolperik handiena Jakob Fuglsangek (Astana) hartu zuen. Hamazazpi kilometro gelditzen zirenean erori zen, eta min hartu zuen belaunean. Gainera, zauria ireki zitzaion bekainean, eta aurpegia odoleztatu zitzaion. Hasieran, lanak izan zituen taldekideen erritmoari eusteko, baina bere onera itzuli zen, eta tropelean bukatu zuen etapa. Ez dauka hausturarik.

Geraint Thomas (Ineos), ordea, atzeratuta iritsi zen. Groenewegenekin batera erori zen, lasterketa azken kilometroan sartzear zela. Ez zuen, beraz, denborarik galdu; eta, gainera, onik atera zen, hesi bat jo arren. Alegia, sustoa besterik ez zen izan iazko Tourreko irabazlearentzat. Emanuel Buchmannek (Bora) ere urratu batzuk izan zituen soilik.

Aurrez, helmugatik 75 kilometrora egon zen tentsiorik handieneko momentua. Harbide zati bat zegoen tarteko esprint baten aurretik, eta erritmo bizia jarri zuen Borak. Tropela zatitu egin zen estutuaren ondorioz, eta moztuta gelditu ziren Viviani, Simon Yates (Mitchelton) eta Dan Martin (UAE). Horrez gain, ezerezean gelditu zen Mads Wurtz Schmidtek (Katusha), Natnael Berhanek (Cofidis) eta Xandro Meurissek (Wanty) osatutako ihesaldia. Ekaitzaren ostean barealdia etorri zen, eta ur lasaietan arrantzatzen saiatu zen Stephane Rossetto (Cofidis). Ahalegin ausarta egin zuen bakarka, baina, azkenean, ezin izan zuen tropelaren legea apurtu.

Helmugarako zortzi kilometro falta zirela harrapatu zuten frantziarra, esprinterren taldeen joari esker. Abiadura bizian zihoan tropela, eta errepidea zabala izan arren, tentsioak azken uneko erorikoa eragin zuen. Nahastu egin zen egoera, eta Sagani eskura jarri zitzaion garaipena. Michael Matthewsen (Sunweb) gurpila hartu, eta 200 metrora abiatu zuen esprinta. Ordea, luze egin zitzaion, eta azken orduan ezkerraldetik gainditu zuen Teunissenek. Hala, etapa eta lidergoa eskuratu zituen Jumbo-Vismako ziklistak. 30 urte ziren herbeheretar batek ez zuela Tourreko maillot horia janzten.

Gaur, taldekako erlojupekoa

Gaur zabalduko dira lehen aldeak hautagai nagusien artean, taldekako erlojupekoan. Gaur ere Bruselan egongo da irteerako eta helmugako marra, eta tartean, 27,6 kilometroko ibilbide gorabeheratsua osatu beharko dute ziklistek. Jumbo Visma izango da ateratzen azkeneko taldea, eta Ineos aurrenekoa. Preseski, Britainia Handiko taldea da saioa irabazteko faborito nagusienetakoa. Jonathan Castroviejo, Thomas eta Michal Kwiatkowski espezialistak ditu, eta gainontzeko txirrindulariak ere ondo moldatzen dira erlojuaren aurka. Jumbo-Vismak berak, Astanak, Sunwebek eta Deceuninck-Quick Stepek ere lan oso ona egin dezakete. Mikel Landaren Movistar modu duinean eusten saiatuko da.]]>
<![CDATA[Lehia bizia buruz buru]]> https://www.berria.eus/paperekoa/2589/014/001/2019-07-04/lehia_bizia_buruz_buru.htm Thu, 04 Jul 2019 00:00:00 +0200 Eñaut Agirrebengoa https://www.berria.eus/paperekoa/2589/014/001/2019-07-04/lehia_bizia_buruz_buru.htm ikusi ibilbidea). ]]>
Munduko ziklistarik onenak ariko dira nor baino nor gehiago, maglia arrosa preziatua soineratzeko lehian. Zabala da hautagai sorta, baina badira ororen gainetik aipatu beharreko bi ziklista: Anna van der Breggen (Boels) eta Annemiek van Vleuten (Mitchelton) herbeheretarrak. Lehena munduko txapelduna da, eta bi aldiz irabazi du Giroa, 2015ean eta 2017an. Gainera, bi bider egin du hirugarren, 2014an eta 2016an. Bestea, berriz, iaz gailendu zen aurrenekoz, erakustaldia eginda: hiru etapa irabazi, eta lau minutu baino gehiagoren aldea atera zion bigarren sailkatuari. 2017an ere podiuma zapaldu zuen; hirugarren koskara igo zen orduan.

Hori bai, bi herbeheretarrak sentipen nahiko kontrajarriekin iritsiko dira Giro honetara. Van der Breggenek ohiko mailatik behera jardun du klasikoetan. Fleche Wallonne irabazi du bakarrik, eta gainontzekoetan lehen hamar postuetatik kanpo gelditu da. Itzuliei dagokienez, Kaliforniako Itzulian nagusitu da. Van Vleutenek oso bestelako distira izan du egun bakarreko probetan: Lieja-Bastogne-Lieja eta Strade Bianche irabazi ditu, eta bigarren izan da Flandriako Tourrean, Amstel Gold Racen eta Fleche Wallonnen. Itzulietan ez du pedal kolpe sendorik topatu, baina konfiantzaz gainezka helduko da, Herbehereetako erlojupeko txapelketa hanka batekin irabazi ostean.

Haien arteko buruz buruko borroka espero da, baina bada duopolioa apur dezakeenik. Horien artean daude Amanda Spratt (Mitchelton), Elisa Longo Borghini (Trek) eta Ashleigh Moolman (CCC). Hirurek badakite zer den lasterketa italiarreko podiumera igotzea. Cecilie Uttrup Ludwig (Cervelo) eta Katarzina Niewiadoma ere (Canyon) gertutik jarraitu beharrekoak dira. Eta Marianne Vos ere (CCC) ezin daiteke aipatu gabe utzi, Giroan hiru sailkapen nagusi eta 21 etapa irabazi baititu. Edonola, jada ez du garai bateko mailarik.

Ibilbide aldapatsua

Hankak ongi zukutu beharko ditu Giroa irabazi nahi duenak. Izan ere, etapa gehienek dute ibilbide hautsia, bi erlojupekoak barne. Lehen egunean zabalduko dira aurreneko tarteak, taldekako erlojupekoan, eta hurrena, hiru etapa gorabeheratsu jokatuko dira, astearteko etapa handiaren aurretik. Bakoitza bere lekuan jarriko du Gavia gainak. Ondoren, bakarkako erlojupekoa eta ibilbide bihurriko beste bi etapa izango dituzte. Eta larunbatean erabakiko da lasterketa behin betiko, Lehen Mailako Montasion. Azken eguna tramite hutsa izango da. ]]>
<![CDATA[Onenen artean onena ematera]]> https://www.berria.eus/paperekoa/2614/015/001/2019-07-04/onenen_artean_onena_ematera.htm Thu, 04 Jul 2019 00:00:00 +0200 Eñaut Agirrebengoa https://www.berria.eus/paperekoa/2614/015/001/2019-07-04/onenen_artean_onena_ematera.htm
«Egunez egun joatea da asmoa. Ea ez dudan egun txarrik. Aurre-aurrean ibiltzea gustatuko litzaidake», adierazi du Merinok. Gora begiratu eta zortzigarren postua hobetzea gustatuko litzaioke; baina, halaber, «errealista» izan nahi du. «Lortzen ez badut, ez dut erabat penatuta gelditu nahi. Postuaz harago, garrantzitsuena ondo sentitzea eta neure burua onenen alboan ikustea da». Anbizio gehiagoz mintzo da Santesteban. «Iaz, erori, eta denbora galdu nuen erlojupekoan. Hala, berriz bederatzigarren egiten edo postu hori hobetzen saiatuko naiz».

Prestakuntza lana ondo egin duen sentipenarekin iritsiko da errenteriarra. «Hasieran bizkarreko minez izan nintzen, baina gerora nahiko ondo ikusi dut neure burua. Azken asteetan altuerako entrenamenduak egin ditut Galizian. Orain, gainontzekoak nola dauden ikusi beharko da». Merinok, ordea, aho zapore mikatzagoa dauka. Ongi ekin zion denboraldiari, Valentziako Itzulian laugarren eginda, baina «kili-kolo» ibili da geroztik. Edonola ere, altueran egindako saioek mesede egingo dioten itxaropena dauka. «Ez dut nire pedal kolperik onena aurkitu, baina kontzentrazioan ondo ibili naiz, eta Espainiako Txapelketan aurrean egon nintzen. Egindako lan guztia orain islatzea espero dut».

Oso gogorra da Giroaren ibilbidea, baina euskal ziklistek ez dute kexarik. Beren ezaugarriekin bat datorrela diote. «Oroitzen dudan Girorik gogorrena izango da. Ez dago etapa erabat laurik. Gainera, bi etapa mendi oso garaietan bukatuko dira. Niretzat oso aproposa dela uste dut», azaldu du Santestebanek. Iritzi berekoa da Merino. «Oso ibilbide menditsua da, eta horrek mesede handia egingo dit. Igoera luze eta garaiak izango ditugu, eta, hain justu, horiek datozkit hobekien. Onenen gurpilari eustea gustatuko litzaidake».

Badakite min handia egingo dutela Montasiok (22 km eta %5eko pendiza) eta Gaviak (25,6 km eta %5,5). Batak 1,5 kilometrora du helmuga, eta besteak, 2,6ra. Halako luzera eta garaierarekin, triskantza gerta daiteke. Merinoren esanetan, «indar mentala» da gakoa halako igoeretan. «Wattak jaitsi eta pultsazioak igo egiten dira. Gorputza muturrera eramaten duzu». «Ez gaude ohiturik halako igoeretara. Gogorra izango da, eta ezusteko bat baino gehiago egon daiteke», gaineratu du Santestebanek.

Gipuzkoarra WNT-Rotor taldeko burua izango da, Erica Magnaldirekin batera. Merinok, berriz, bere gain hartu beharko du lidergoaren zama guztia. «Mavi Garciak eta biok izan behar genuen ardura, baina hura ez da izango azkenean, eroriko baten ondorioz. Bakarka askoz ere handiagoa da presioa, eta egoera hori kudeatu beharko dut. Ez dut nahi hori nire ahulgunea izaterik».

Ehiztarien laguntzailea

Merino eta Santestebanekin batera, Enara Lopez (Durango, Bizkaia, 1997) da Giroan lehiatuko den beste euskal herritarra. Haien aldean, oso bestelako zeregina izango du Bizkaia-Durangoko txirrindulariak: taldekideei etapak ehizatzen laguntzea. Emaitza onak lortzen saiatuko dira Nicole D'Agostin, Cristina Martinez eta Sandra Alonso, eta haientzat lan egitea egokituko zaio Lopezi. Bigarren Giroa izango du, iaz estreinakoa egin eta gero. «Eskarmentua hartu nuen, eta aurten askoz ere hobeto moldatzea espero dut. Sasoi onean nago».

Ez dio gezurrik, berriki bigarren izan baita 23 urtez azpiko errepideko Espainiako Txapelketan. «Bertako maila ezin daiteke alderatu Girokoarekin. Edonola ere, aurrean egotea espero dut, ongi kokatuta, eta ea postu onen bat lortzen dudan». Bizkaiko taldeak etapa bihurriak ditu begiz joak. Goi mendikoetan «zaila» izango omen da onenak ezustean harrapatzea. «Gaviako etapan, adibidez, pentsatzekoa da sailkapen nagusiko emakumeak egongo direla aurrean. Oso amaiera gogorra izango da, baina, era berean, egunik aproposenetakoa izango da niretzat. Gehiago sufrituko dut etapa lauetan».]]>
<![CDATA[Zauriak itxi nahian]]> https://www.berria.eus/paperekoa/1878/027/001/2019-06-14/zauriak_itxi_nahian.htm Fri, 14 Jun 2019 00:00:00 +0200 Eñaut Agirrebengoa https://www.berria.eus/paperekoa/1878/027/001/2019-06-14/zauriak_itxi_nahian.htm
Brasil azken urteetan hartutako kolpeak goxatzen ahaleginduko da. Gogorrena orain bost urte hartu zuen, berak antolaturiko Munduko Kopan. Futbolaren historiara pasatu da finalerdietan Alemaniak eman zion jipoia (1-7). Canarinha-k hamabi urte daramatza trofeorik altxatu gabe, 2007an Amerika Kopa irabazi zuenetik. Idorte handia da munduko selekziorik loriatsuenarentzat. Titek dauka piztia lokartua esnatzeko ardura. 2016an hartu zuen kargua, eta haren agindupean emaitza onak lortu ditu Brasilek: 27 garaipen, bost berdinketa eta bi porrot 34 neurketatan, 71 gol sartu eta soilik 10 jasota. Ordea, kale egin zuen egiaren tenorean, iaz, Errusian, Munduko Kopan. Final-laurdenetan kanporatu zuen Belgikak. Beraz, Titeren taldeak ezin du huts egin.

Bere izarrik distiratsuena gabe helduko dio erronkari. Hondoa jo du Neymarrek. Batetik, ustez bortxaketa bat egin duelako salatu dute; eta, bestetik, orkatilako lesio batek Amerika Kopatik at utzi du. Hala ere, kalitatea sobran du Brasilek. Neymarren lekukoa Coutinhok hartu beharko luke, Bartzelonan ematen ari den itxura hitsa alde batera utzita. Haren alboan, jogo bonito-ari gorazarre egiten saiatuko dira Firmino, Richarlison, Willian, Gabriel Jesus eta Arthur. Jokoa eraisteko ardura, berriz, Casemirok, Fernandinhok, Thiago Silvak, Maquinhosek eta Mirandak izango dute. Oso talde orekatua da. Nagusi izan beharko litzateke A multzoan; Peru, Venezuela eta Bolivia izango ditu aurkari.

Argentinak ere badu ukendu baten beharra. Brasil baino are lehorte luzeagoa ari da nozitzen: 26 urte dira azkenekoz nazioarteko txapelketa bat irabazi zuela. Zama hori, gaur-gaurkoz, Leo Messiren bizkar gainean dago. Askorentzat inoizko jokalaririk onena dena gogor kritikatu ohi dute bere herrialdean. Selekzioa garaipenerantz gidatzeko ezintasuna leporatzen diote. Beti du gainean Diego Maradonaren itzala. Zorra kitatzear izan zen 2014 Munduko Kopan, baina garaipen preziatuak finaleko luzapenean egin zion ihes Argentinari. Iaz, berriz, final-zortzirenetan esan zuen agur.

Eskuarki, Messik Bartzelonan ahaztu izan ditu Argentinarekin izandako nahigabeak. Orain, ordea, kontrako egoeran dago. Izan ere, sasoia erabat atsekabetuta bukatu du Kataluniako taldean, Espainiako Kopan eta, batik bat, Txapeldunen Ligan estropezu mingarriak izan ostean. Aringarria litzateke Amerika Kopa irabaztea. Azken bi ekitaldietan txapeldunorde izan da Argentina, finalak penaltietan galduta. Belaunaldi aldaketa baten erdian eta Luis Scaloniren esanetara helduko da aurtengora.

Uruguairen joa

Kolonbia aurkari gogorra izango da Argentinarentzat B multzoan. Lehen azterketa izango du Carlos Queirozek kolonbiarren aulkian. Eskarmentua eta gaztetasuna uztartzen dituzten jokalariak ditu. Talde oso erasokorra da, James eta Falcao ikur dituena. Defentsan, ordea, ez du hainbesteko bermerik eskaintzen. Azken bi Munduko Kopetan izan ostean, Amerika Kopan urrutira iristen saiatuko da. Argentinaz gain, Paraguai eta Qatar izango ditu aurkari ligaxkan.

Uruguai da C multzoko talderik indartsuena. Beste ezein selekziok (hamabost), eta, era berean, badu gaia garaipenen zerrendari beste ale bat gehitzeko. Oso aro egonkorra ari da bizitzen Oscar Washington Tabarezen aginduetara. Aurrealdean hirukote beldurgarria du: Luis Suarezek, Cavanik eta Stuanik osaturikoa. Golak bermaturik ditu. Atzean, berriz, eskarmentu handia du; zelai erdian falta zaion hori. Uruguairen nagusitasuna ezbaian jartzen saiatuko da Txile. Azken Munduko Koparako sailkatu ez bazen ere, ezin daiteke bazter utzi, azken bi ekitaldiak irabazi baitzituen.

Final-laurdenetarako sailkatuko dira hirugarren postuan bukatzen duten bi talde onenak. Hori nahi dute Japoniak eta Ekuadorrek C multzoan, eta Paraguaik eta Qatarrek B multzoan. A multzoan, berriz, Peru eta Venezuela Brasilen atzetik sailkatzen saiatuko dira. Boliviak ez du ia aukerarik.]]>
<![CDATA[«Ziurrenik, fitxaketa nagusiak abuztu amaieran egingo ditugu»]]> https://www.berria.eus/paperekoa/1918/024/001/2019-06-12/ziurrenik_fitxaketa_nagusiak_abuztu_amaieran_egingo_ditugu.htm Wed, 12 Jun 2019 00:00:00 +0200 Eñaut Agirrebengoa https://www.berria.eus/paperekoa/1918/024/001/2019-06-12/ziurrenik_fitxaketa_nagusiak_abuztu_amaieran_egingo_ditugu.htm
Kirol zuzendari gisa, zer aho zapore utzi dizu bukatu berri den denboraldiak?

Aho zapore ezin hobea. Hemendik hogei urtera, modu berezian oroituko dugu Osasunak 2018-2019ko denboraldian lortutakoa. Historia egin dugu: partidarik ez dugu galdu Sadarren, hamazazpi garaipen kateatu ditugu bertan, liga 87 punturekin bukatu dugu... Oso harro gaude, bai taldearen errendimendu orokorraz, bai bakoitzaren jardunaz.

Jokalariak oporretan dira jada. Zuk, ordea, galtzak bete lan izango duzu datozen asteetan.

Bai. Lan askoko garaia da. Halakoa da kirol zuzendarion lana. Gero, atseden hartzeko tarte txiki bat izaten dugu merkatua itxi osteko lehen astean; irail hasieran, alegia. Ez dugu guztiz deskonektatzen, baina, bederen, haize pixka bat hartzen dugu.

Etorkizunari eta lehiakideei aurrea hartzean datza zuen lana. Beti aurrera begira egonik, gai zarete orainaldiaz gozatzeko?

Ni saiatzen naiz. Sasoi honetan bide zoragarria egin dugu, eta azken bizpahiru asteetan ospakizun ugari eduki. Asko gozatu dut. Bizi izandako une asko ez ditut sekula ahaztuko.

Edonola, jada jarria zara datorren denboraldiari begira. Zer fasetan dago zure lana?

Aurrerapauso batzuk eman ditugu aukera jakin batzuei dagokienez, baina informazioa biltzen dihardugu batik bat. Kontuan hartu behar da Osasunak, oraintxe, indar txikia duela merkatuan. Ezin gara lehiatu Lehen Mailako taldeekin. Hortaz, itxarotea eta pazientzia izatea dagokigu.

Apiril amaieran dagoeneko garbi zegoen igoko zinetela. Horrek gauzak erraztu egin al dizkizu?

Aukera zehatzen batean bai; baina, bestela, gehiegi ere ez. Esan bezala, orain informazioa jasotzeko unea da, gerora ahalik eta mugimendurik onenak egiteko. Ziurrenik, fitxaketa nagusiak abuztu amaieran egingo ditugu.

Fitxaketa kopurua, hein batean, taldea utziko duen jokalari kopuruak baldintzatuko du. Oraingoz, lau dira: Clerc, Olabide, Ruben Garcia eta Robert Ibañez. Hutsune gehiago aurreikusten duzu?

Lehenik, Jagobarekin [Arrasate] hitz egin behar dut. Egoera batzuk garbi ditugu; baina normala denez, hori aurrez aurre jakinaraziko diegu jokalariei. Klubaren erabakien berri ez dute prentsaren bidez izango.

Xiscoren irteera ziurtzat jotzen zen, baina berriki atea ireki diozu hark Osasunan jarraitzeko aukerari.

Iragan larunbateko partidan esan zezakeen agur, beste jokalari batzuekin gertatu bezala, baina Jagobak eta biok ez genuen erabakia arinegi hartu nahi. Xiscori egoera azaldu diogu, eta dena irekita dago oraindik. Tentuz jokatu nahi dugu, erabaki zuzena hartzeko. Jokalariak ulertu du gure jokaera.

Azken egunotan aipatu da AEBetako zenbait taldek begiz jota dutela Oier. Deirik jaso duzue?

Ez. Nirekin ez da inor harremanetan jarri, behintzat.

Fitxaketei dagokienez, esan duzu merkatua zail dagoela Osasuna bezalako talde igo berri batentzat. Zenbaterainokoak dira zailtasun horiek?

Gaur-gaurkoz, eta zintzoa izanik, gauzak oso gaizki ikusten ditut. Pazientzia kontua da. Lasaitasuna izan behar dugu. Aurreko udan, azken fitxatu genituenak Juan Villar eta Ruben Garcia izan ziren, gerora funtsezkoak izan diren bi jokalari. Oraingoan ere, amaierara arte egon beharko dugu zain.

Espainiako Bigarren Mailako merkatuari erreparatzea besterik ez zaizue gelditzen?

Ez gara merkatu bakar batera mugatu behar. Gauzak asko alda daitezke, eta, orain, gure erosteko ahalmenetik kanpo dagoen jokalari bat eskuragarri izan dezakegu hilabete baten buruan. Harria zulatzen aritzea da gakoa. Hala lortu genuen Ruben Garcia etortzea. Hasieran, oso zaila zen hura ekartzea, baina harekin hitz egin genuen, eta, azkenean, posible izan zen. Azken orduko dei batekin ez zoaz inora.

Garbi dago ez duzuela diru-xahutze handirik egingo. Gastu-muga zehatzen bat jarri dizue zuzendaritzak?

Ez, oraindik kontuak onartu behar dira, eta Espainiako Futbol Liga Profesionalak taldearen kostua zehaztu behar du. Nolanahi, garbi dugu zer eginik ez dugula guk baino askoz ere ahalmen ekonomiko handiagoa duten taldeen aurka.

Zein postu indartu nahi dituzue?

Batzuk agerikoak dira. Adibidez, Clercen ordezko bat bilatu behar dugu defentsako ezker hegalerako. Erdiko defentsaren baten premia ere badugu, Unai Garcia epe luzerako baitago min hartuta. Beste postu batzuk ere indartuko ditugu. Denborarekin joango gara gauzak zehazten.

Datorren sasoirako azalberritu egingo da Osasuna, edo zaleek taldea ezagutuko dute?

Sasoi honetako oinarriaren zati bat izango du, baina kontuan hartzekoa da jada funtsezko izandako hiru jokalari joan zaizkigula. Eta Unai ez da liga hasierara iritsiko. Beraz, aldaketak izango dira.

Azken asteetan goi mailako hainbat jokalari lotu dira Osasunarekin. Ordea, zuk esan izan duzu zurrumurruak «zientzia fikziozkoak» direla.

Hala da. Eta ezinezkoak diren izenak entzuten jarraitzen dut. Barre egiteko gogoa ematen dit. Gehienak ez dira gure errealitatera apur bat ere hurbiltzen.

Berriki, Natxo Monreal eta Raul Garcia Osasunara itzultzeko aukeraz hitz egin dute hedabide batzuek. Jokalari horiek ere ezinezkoen zakuan sartzen dituzu?

Bai. Pentsaezina da jokalari horiek ekarri ahal izatea.

Fitxaketarik onena, menturaz, Ruben Garcia bueltan ekartzea izango litzateke. Badago itxaropena izateko motiborik?

Levantera itzuliko da orain, eta jokalariak zer borondate duen ikusi beharko dugu. Asko gozatu dugu berarekin, baina zaila da berriz hona ekartzea. Edonola, badakit Levantetik ateratzen bada, Osasunara itzultzeko izango dela.

Robert Ibañez ere bueltatzea nahiko zenukete?

Erosteko aukera dugu, baina guretzat ezinezkoa den kopuru baten truke. Diru hori ez dugu ordainduko, ezin dut besterik esan.

Ziur itzuliko direnak, beste talde batzuei utzi dizkiezuen jokalariak dira. Zer plan duzue haientzat?

Hori Jagobak erabakiko du. Otegiri kontratua berritu diogu. Sekulako sasoia ari da osatzen Melillarekin, eta sasoi-aurrerako itzuliko da. Nolanahi, teknikariak du azken hitza. Hamaikakoak osatzea ez da nire ardura.

Sasoi honetan garrantzi handia izan du harrobiak. Lehen Mailan eutsi egingo diozue apustuari, edo lausotu egin daiteke?

Bigarren Mailan, hemengo jokalari gehien eduki duen taldea izan gara. Eta ez dut uste hori Lehen Mailan aldatuko denik. Athletic bezalako salbuespenak kenduta, etxekoei inork ez bezala erreparatuko diegu.

Joan zen astean elkarrizketa batean adierazi zenuenez, «erabaki zailak» hartu beharko dituzue salbazioa lortzen saiatzeko. Zer erabaki dira horiek?

Hori maila guztietan gertatzen da, ez bakarrik Lehen Mailan. Egunerokoan harreman estua sortzen da jokalariekin, eta gero oso zaila izaten da norbaiti ez duela jarraitu behar esatea.

Hurrengoa hirugarren denboraldia izango duzu Osasunan. Atzera begiratuta, pozik zaude eginiko bidearekin?

Proiektu berri bat hezurmamitzeko helburuarekin iritsi nintzen. Osasunak sasoi traumatikoa izan zuen Lehen Mailan, eta taldea goitik behera eraldatu behar nuen. Harro nago egindako lanaz, bi urte geroago marka guztiak apurtu baititugu, eta, era berean, zaleei nahi zutena eman baitiegu. Orain, sekulako erronka dugu aurretik. Saskibaloian LEB ligatik NBAra pasatzea bezala da.

Hau al da kirol zuzendari gisa gehien gozarazi dizun denboraldia?

Bai, zalantzarik gabe. Sadarko bolada eromen hutsa izan da. Ez dut uste berriz halakorik sekula ikusiko dudanik. Neurketa batzuetan, banekien irabazi egingo genuela, nahiz eta gauzak okertu. Hori sentitzea sekulakoa da. Zaleek ere sentipen bera izan dute, eta Sadarren batasun giroa arnastu da. Helburu hori ere bete dugu, beraz.

Nolakoa da kirol zuzendari batentzat Osasunan lan egitea?

Oso zaila, klubaren beraren filosofiagatik. Dena asko neurtu behar da, lehiakortasuna eta harrobiaren aldeko apustua uztartuta. Oso ondo etorri zait Jagobaren laguntza, berak aspaldidanik eta gertuagotik ezagutzen baitu Osasuna.]]>
<![CDATA[Beste jauzi handi bat]]> https://www.berria.eus/paperekoa/2347/029/001/2019-06-04/beste_jauzi_handi_bat.htm Tue, 04 Jun 2019 00:00:00 +0200 Eñaut Agirrebengoa https://www.berria.eus/paperekoa/2347/029/001/2019-06-04/beste_jauzi_handi_bat.htm
Umetan, Carapazek ez zuen futbolari izan nahi, txirrindulari baizik, eta BMX urdin batera igota hazi zen, 3.000 metrotara pedalei eraginez. Andeetan dago bere jaioterria, Kolonbiako mugatik gertu. Hara joan zen 2015an, erakusleiho aproposago baten bila. Europako talde handien arreta bereganatu nahi zuen. Bada, Movistarrek jo zion atea, Lizarten sei hilabete eskas eman ondotik. Ikastun gisa iritsi zen, eta berehala konbentzitu zituen zuzendariak. Geroztik, zeresana eman du maila apaleko zenbait itzulitan: bi aldiz irabazi du Asturiasko Itzulia, bigarren izan da Route du Suden, hirugarren Gaztela eta Leongo Itzulian... Haatik, Giroa erabili du tranpolin gisa.

Iaz eman zuen lehen jauzi handia, Giroa laugarren postuan bukatuta. Horretaz landa, Montevergine di Mercoglianoko etapa irabazi zuen, eta zortzi etapatan gazterik onenaren elastikoa jantzi. Aurten, berriz, zuriz ez, arrosaz jantzi da, eta hala bukatu du Giroa. Inork ez zuen halakorik espero. Geraint Thomasek iazko Frantziako Tourrean egin bezala, ekuadortarrak taldeburu izan gabe irabazi du lasterketa. Ustez, Mikel Landarena zen aginte makila, eta Carapazi luxuzko ezkutari izatea zegokion. Ezkutuan hasi zuen lasterketa, faboritoen begiradapetik urrun; areago, hirugarren etapan matxura baten erruz 46 segundo galdu eta gero.

Alabaina, biharamunean argitara atera zen, Frascatiko helmugan gailenduta. Askorentzat, anekdotikoa izan zen garaipen hura. Etapa erabakigarrietan talde lanera makurtu beharko zuen ziklista batek jasotako pizgarria, besterik gabe. Aitzitik, egunen joanean, eszeptikoak fededun bihurtuz joan zen. Duin moldatu zen San Marinoko erlojupeko luzean -hamaikagarren izan zen, Primoz Roglicengandik 1.55era-, inork baino azkarrago igo zituen Serru aintzirako igoerako azken kilometroak, eta erakustaldi gogoangarria egin zuen Courmayeurrera bidean. San Carlon, helmugatik 27 kilometrora jo, etapa irabazi, eta maglia arrosa jantzi zuen. Gainontzeko oilarrei ia bi minutu atera zizkien.

Lehen urratsa egina zeukan, beraz. Zailena gelditzen zitzaion, ordea: lidergoari eustea, Vincenzo Nibali eta Roglicen ahaleginei aurre eginez. Esloveniarra 16. etapan utzi zuen jokoz kanpo. Mortirolon atzean utzi, eta 1.22 atera zion. Sailkapen nagusian 2.09ra zuen jada. Horrenbestez, Nibali zen lasterketa irauli zezakeen bakarra. Italiarra maisua da ezerezetik urrea ateratzen, baina zilarrarekin konformatu behar izan du, altzairuzko lider batekin topo egin duenez gero. Ahuldade zantzu bakar bat ere ez du erakutsi Carapazek, eta estutasunik gabe eutsi die aldeei. Veronako erlojupekoan, 49 segundo kendu zizkion Nibalik, eta 46 Roglicek; alta, esan beharrekoak esanda zeuden jada.

Landaren argi-ilunak

Ekuadortarra izan da indartsuena mendateetan, eta, hori gutxi balitz, babes itzela eman dio taldeak. Ezohiko anbizioa, ausardia eta adimen taktikoa izan ditu Movistarrek, eta, hala, erabat zuzendu du okerreko bidetik hasitako denboraldia. Maila ezin hobean ibili dira Carapazen laguntzaileak. Aspaldi ez bezala jardun da Jose Joaquin Rojas; ihesaldi estrategiko askotan sartu da Andrei Amador, eta une erabakigarrietan agertu dira Hector Carretero eta Antonio Pedrero. Nabarmentzekoa da horrek Mortirolon Nibali harrapatzeko eginiko lana.

Landaren jarduna ere goraipagarria izan da. Lasterketari taldeburu moduan ekin zion, baina, Carapazek lidergoa bereganatuta, otzan eta leial jokatu du. Eta, hala eta guztiz ere, podiumean sartzear izan da. Zortzi segundo eskasengatik egin dio ihes hirugarren postuak. Ez da itzuli handi bateko podiumaren atarian gelditzen den lehen aldia, 2017ko Tourrean segundo bakarra falta izan baitzitzaion. Gakoa erlojupekoetan dago. Izan ere, arabarrari denbora asko joan zaio bakarkako saioetan, azkenekoan hainbestean moldatu arren. Guztira, 4.41 galdu du Roglicekin, 3.16 Nibalirekin eta 1.13 Carapazekin.

Bestela, nahieran ibili da mendateetan. Soilik Carapaz izan da hura baino gehiago. Montoso, Serru aintzira, Mortirolo, Anterselva, Monte Avena... Igoera horietan berretsi du bueltan dela Landarik onena, azken urtean erorikoekin bizitako kalbarioaren ondotik.]]>