<![CDATA[Haritz Gallastegi | Berria.eus]]> https://www.berria.eus Bere azken artikuluak eu Tue, 14 Jul 2020 04:16:35 +0200 hourly 1 <![CDATA[Haritz Gallastegi | Berria.eus]]> https://www.berria.eus/irudiak/berriaB.png https://www.berria.eus <![CDATA[Raul beti dago prest]]> https://www.berria.eus/paperekoa/1936/023/001/2020-07-13/raul_beti_dago_prest.htm Mon, 13 Jul 2020 00:00:00 +0200 Haritz Gallastegi https://www.berria.eus/paperekoa/1936/023/001/2020-07-13/raul_beti_dago_prest.htm
Athleticentzat ez dago partida errazik. Puntuak eskuratzeko lan handia egin behar du. Baina, era berean, inoiz amore ematen ez duen talde bat da, lehiakorra oso. Raul Garciak islatzen du ondoena egun zer den Athletic. Ez da ikusgarri jokatzen duen talde bat. Zelai erditik aurrera argitasun handirik ere ez dauka. Baina Athletici irabazi egin behar zaio. Aurkariek euren momentua aprobetxatzen ez badute, ordaindu egiten dute. Atzo ere hala izan zen. Zuri-gorriek 1-2 irabazi zuten Levanteren zelaian, Raul Garciaren bi goli esker, eta bete-betean dira Europan jokatzeko lehian.

Nafarrak hartu du Aritz Adurizen lekukoa zelaian, arlo guztietan. Jada hamabost gol sartu ditu denboraldi honetan. Haren kirol ibilbideko kopururik handiena da. Atzo bi aukera izan zituen, eta bietan asmatu zituen. Lehen errematea neurketa hasi berritan egin zuen. Oskar de Marcosek eskuin hegaletik egindako erdiraketa zetorkion bezala errematatu zuen, eskuinez, penalti puntu ingurutik. Aitor Fernandezek ezin izan zuen ezer egin, nafarraren jaurtiketa indartsua izan zelako oso: 0-1.

Gol horrek konfiantza eta lasaitasuna eman zion taldeari. Aurretik jarri ondoren, baloiaren jabetza Levanteri eman, eta zain egon ziren zuri-gorriak. Ez zuten sufritu, baina bigarrena sartzeko aukerarik ere ez zuten sortu. Beroak eraginda, erritmo gutxiko lehia izan zen. Baina atsedenaldira iritsi aurretik bigarren kolpea eman zioten bizkaitarrek Levanteri. De Marcosen eta Raul Garciaren arteko elkar ulertzea erabakigarria izan zen beste behin. Arabarrak abantailarekin errematatutako pasea eman zion, eta nafarrak bi aurkariren artetik aurrera egin zuen: Aitor Fernandezen aurrean baloia patxada handiz loratu, eta bigarren gola sartu zuen (44. min).

Baina Athletici kostatu egiten zaio partidak ixtea. Zuri-gorriak ez dira kapaz sufritu gabe partidak irabazteko. Atzo ere hala izan zen. Levantek aurrera egitea erabaki zuen, eta Athletic atzean sartu zen. Levanteri kosta egiten zitzaion aukerak sortzea, baina etengabe arrisku eremuetan zebilen. Hala, lehia amaitzeko 20 minutu falta zirenean, Iñigo Martinezek ez zuen ondo egin jokoz kanpoko jokaldia. Mayoral ondoko marrara iritsi zen, eta handik golek pasea eman zion area txikian zain zegoen Bardhiri. Gol horrek urduritasuna eragin zuen zuri-gorrien artean. Baina, hala ere, Athleticek ez zuen aparteko lanik izan abantailari eusteko.]]>
<![CDATA[Atzekoen eskutik, sendo]]> https://www.berria.eus/paperekoa/1957/031/001/2020-07-05/atzekoen_eskutik_sendo.htm Sun, 05 Jul 2020 00:00:00 +0200 Haritz Gallastegi https://www.berria.eus/paperekoa/1957/031/001/2020-07-05/atzekoen_eskutik_sendo.htm
Gaizka Garitanok argi izan zuen hasieratik zer-nolako Athletic gura zuen. Eduardo Berizzoren lekukoa hartu zuenerako, bazekien zein arlotan egin behar zuen azpimarra. Talde hauskorra zen argentinarrak zuzentzen zuena. Jokoa sortzea kosta egiten zitzaion; aldiz, aurkariek gutxi behar zuten zuri-gorrien ate ingurura erraztasunez iristeko. Hori jakinda, pitzadurak konpontzeko, taldea batzea erabaki zuen. Gol gutxi sartuko zioten talde bat antolatzeari eman zion lehentasuna. Eta lortu egin du. Gol gutxi sar diezaieten, talde aproposagoa dute zuri-gorriek. Sasoi honetan 28 sartu dizkiete, eta, Real Madrilen eta Atletico Madrilen atzetik, gol gutxien sartu dioten taldea dira.

Jokalarien arteko elkartasuna da talde batek defentsako lan ona egiteko ezinbestean behar duen ezaugarria. Arlo horretan, Garitanoren jokalariak konpromiso handiko futbolariak dira. Gainera, Garitanoren dohain taktikoak ere ezagunak dira. Horrekin batera, jokalarien talentua dago. Agindutakoa zuzen egiteko ezinbestekoa da dohain onak izatea. Protagonisten ekarpenik barik ez baitago zereginik.

Garitano defentsan gehien aritzen direnen onena ari da ateratzen. Yuri Bertxitxe ezker hegaletik egiten ari den sasoia aparta da. Zarauztarrak ondo zaintzen du bere hegala, eta erasoan taldeko jokalaririk erabakigarrienetakoa da. Sarri egiten du aurrera, eta haren barneraketak zein erdiraketak zuri-gorrien jokoaren baliabide nagusietako bat dira. Arlo fisikoan zein konfiantzaz gainezka ikusten zaio, eta aurkariaren ate aurrean ere asmatu du. Sei gol sartu ditu denboraldi honetan: bi Ligan eta lau Espainiako Kopan.

Iñigo Martinezen ekarpena ere ez da gutxiagorako. Ondarroarra defentsako nagusia da. Hark agintzen du. Nortasun handiko jokalaria izateaz gain, baloia jokatuta ateratzeko gaitasuna dauka. Athleticek haren alde egin zuen apustu erraldoia, zelaian bikain arituz bueltatzen ari da. Betisen aurkako neurketan, gainera, iritsi zenetik zuen arantza bat kendu zuen: gola sartzea.

Simon ere bikain

Yeray egonkortu egin da eskuin erdiko-atzelari postuan. Nuñezi aurrea hartu dio. Kontzentrazioa eta aurkariei aurrea hartzeko gaitasuna ditu ahalmen nagusiak. Baloiarekin hobetzea falta zaio. Capak ere teknikariaren konfiantza osoa dauka. Sasoiaren lehen zati aparta egin zuen. Golak sartzeaz gain, goleko paseak ere eman zituen. Bigarren zatian gehiago kostatzen zaio eustea, baina etenaldiak mesede egin dio. Fisikoki oso indartsua da, eta neurketak egokiago aztertzen ikasi du.

Lau atzelariak gainerako taldekideen laguntzari esker egiten ari diren lana bikaina da. Oztopo handia bihurtu dira kontrarioentzat. Eta aurkaria zaindu ezin izan dutenean, Unai Simon agertu da. Atezain gaztea bikain ari da. Taldeari puntuak ematen dizkion atezaina bihurtu da. Atepean zulo ia guztiak tapatzen ditu. Horri eskerrak, Athletici oso gol gutxi sartzen dizkiote. Gaur, Real Madril liderraren aurrean ezinbestekoa izango da atzealdean fin aritzea, erasoan baliabide asko duen taldea kate motzean lotzeko. Espainiarrek 61 gol sartu dituzte sasoi honetan. Irabazita, Europarako sailkatzeko borrokan segituko du Athleticek.]]>
<![CDATA[Postu bat, eta hiru aukera]]> https://www.berria.eus/paperekoa/1996/024/001/2020-07-01/postu_bat_eta_hiru_aukera.htm Wed, 01 Jul 2020 00:00:00 +0200 Haritz Gallastegi https://www.berria.eus/paperekoa/1996/024/001/2020-07-01/postu_bat_eta_hiru_aukera.htm
Gaizka Garitanok badaki zer daukan esku artean. Ondo ezagutzen ditu taldearen bertute eta gabeziak. Eta argi dauka hiru jokalarien premia izango duela Athletic lehiakor izan dadin. Baina hirurek elkarrekin jokatzen dutenean, bik euren postutik kanpo jokatu behar dute. Ahalegin hori mesedegarria izan daiteke taldearentzat, baina kalte egingo die jokalariei; nekez emango dute barruan daukaten guztia.

Raul Garciak ahaztuta izango du erdilari aurreratu postuan jokatzea zer den. Aritz Adurizek protagonismoa galdu zuenetik, erdiko aurrelari postuan dagoen zuloa betetzen ahalegindu da. Tarteka, zelai erdiaren eskuin hegalean ere aritu da. Baina oso gutxitan betiko postuan. Horrek eragina izan du haren jokoan. Ez da aurreko sasoietan adina nabarmendu. Eta, hala ere, taldeko golegilerik onena da. 11 gol sartu ditu; gehienak penaltiz. Ondo aritzeaz gain, nortasuna eta eskarmentua dauka. Eta, horretaz gain, bere esku dagoen guztia ematen du taldearen mesedetan. Horregatik da Garitanoren konfiantzazko futbolarietako bat.

Raul Garciaren postu aldaketak Muniaini egin dio mesede. Hura da taldean sormen handiena duen futbolaria. Ez du parekorik baloia babesten eta lerro artean mugitzen. Gainera, erditik abiatuta, erakutsi du gol sen handiagoa duela. Taldeari erasoko jokoan argitasuna emate aldera, Garitanok sarri zelairatu du euskarrien aurretik. Ondo aritu da. Sasoi ona ari da osatzen, baina etenaldiaren ostean ez da aurretik adina nabarmendu. Mallorcaren aurka, ezker hegalean jarri zuen entrenatzaileak. Erdira jotzeko askatasuna izan arren, ezeroso egon zen. Ohikoa baino gutxiago izan zuen baloia, eta defentsan, sufritu egin zuen. Ez dirudi ondo hartuko duenik hegalera itzultzea.

Gaur, Valentzian

Sancetek ere nahi du Raul Garciak eta Muniainek gustuko duten postuan aritzea. Azken harribitxia da. Belauneko lesio larri batengatik ez balitz, urtebete lehenago egingo zuen debuta, baina apurka hasi da gorengo mailari neurria hartzen. Garaia da, eta, baloia oinetan duela, lerroak gainditzeko erraztasun handia du. Oraindik asko du ikasteko, baino arlo fisikoan garatzen denean, zeresana emango du. Mallorcaren aurka lehen gola sartu zuen goi mailan.

Gaur, seguruenik, hiruretako bat gutxienez aulkian geratuko da Valentzian (19:30). Athleticek gutxienez puntu bat lortu behar du lehian segitzeko. Valentziak puntu bat gehiago du, baina ez da giro klubean. Emaitza txarren ondorioz, Albert Celades entrenatzaile kargutik kendu dute, eta Salvador Gonzalez Voro-k ordezkatu du.]]>
<![CDATA[Traba egin nahi dio]]> https://www.berria.eus/paperekoa/1915/028/001/2020-06-23/traba_egin_nahi_dio.htm Tue, 23 Jun 2020 00:00:00 +0200 Haritz Gallastegi https://www.berria.eus/paperekoa/1915/028/001/2020-06-23/traba_egin_nahi_dio.htm
Hala ere, Athletic ezustea ematen ahaleginduko da. Eta Bartzelona estutzeko, ezinbestekoa izango da ondo lehiatzea. Bada, lehiakortasuna da zuri-gorrien dohain nagusia. Aspaldian hizpide da jarraitzaile zuri-gorrien artean taldeak erakusten duen joko maila. Athleticen inguruaren zati bat ez du batere erakartzen Garitanoren taldearen jokamoldeak. Joko aspergarria dela diote. Erasoko joko eskasa du. Taldearen ekarpena ontzat ematen dutenek, berriz, meritu ikaragarria ematen diote entrenatzaile derioztarra egiten ari den lanari. Hasteko. maila handiko txapelketa batean muga askorekin lehiatzen ari dela hartzen dute aintzat. Taldearen ardura hartu zuenetik Garitanori ez diote ekarri taldearen maila igo zezakeen futbolaririk, eta, hala ere, Athletic Kopako finalerako sailkatu da eta Europarako aukera eskuratzearekin amets egiten ari da.

Yuri. zigortuta

Athleticen indarra talde lana da. Defentsan maila oso ona ematen ari da, eta, horri eskerrak, aurkari gehienei aurre egiteko kapaz da. Gaur ere asmo horrekin zelairatuko da. Baina jakina da ez dela erraza izango aurkaria eustea. Bartzelona liga irabazteko lehian murgilduta dabil. Sevillaren kontra berdindu ostean, atzetik jarri da Real Madrilen kontrako borrokan. Gaur-gaurkoz, ez dauka bere esku txapelketa irabaztea. Baina irabazteko lehian denak balio du, eta epaileek Real Madrilen partidetan hartutako erabaki eztabaidagarriek sua piztu dute Bartzelonan. Hortaz, Gil Manzanoren lana lupaz aztertuko dute gaurkoan.

Zailtasunak zailtasun, lehoiek daukaten guztia eman beharko dute. Europarako sailkatzea oso zaila dago, baina ezinezkoa ez da. Bost puntu ez da langa gaindiezina. Eta, gainera, ezer jokoan egon ez arren, grina eta gosea ezin dira inoiz galdu. Athleticek ez du galdu txapelketa berrekin zenetik, baina gaur aurreko partidetan protagonismo gutxi izan duten futbolari askoren txanda izango da. Jokalariak hasi baitira nekea pilatzen. Yuri zigortuta dago, eta taldearen bizkarrezurra osatzen duten beste jokalari batzuk atseden hartuko dute, nekea erasaten hasia baita.]]>
<![CDATA[Iñigo Martinezek egin du dena]]> https://www.berria.eus/paperekoa/1983/029/001/2020-06-21/intildeigo_martinezek_egin_du_dena.htm Sun, 21 Jun 2020 00:00:00 +0200 Haritz Gallastegi https://www.berria.eus/paperekoa/1983/029/001/2020-06-21/intildeigo_martinezek_egin_du_dena.htm
Futbola talde kirola da. Jokalari bakar bat nabarmentzea gehiegi izan daiteke. Akaso ez da bidezkoa. Baina arrazoi bat edo beste tarteko, beti daude aipamen berezia merezi duten futbolariak. Bada, Iñigo Martinezek ez du inoiz ahaztuko Athleticek atzo San Mamesen Betisen kontra jokatutako neurketa. Elastiko zuri-gorria janztea erabaki zuenetik gainean zuen zama kendu zuen erdiko atzelari ondarroarrak. 85 partida behar izan ditu pisua gainetik kentzeko. Athleticekin golik ez sartzeak eragin dion buruko mina izan da, hain zuzen. Atzelari oso ona izateaz gaiz, beti erakutsi baitu golak sartzeko sena. Geldikako jokaldietan ezker oinez zein buruz errematatzeko duen gaitasuna jakinekoak dira. Baina Athleticen jokatzen duenetik ezkutuan izan ditu dohain horiek. Betisek San Mames bisitatu zuen arte. Neurketako gol bakarra sartu zuen berak. Garaipenaren gola.

Athleticen eta Betisen arteko norgehiagokak aukera gehiago izan zituen jokoa baino. Eta, hala ere, ez zen abagune askoko lehia izan. Athleticentzat hirugarren neurketa izan zen azken sei egunetan. Hala ere, taldeak gogotsu ekin zion norgehiagokari. Neurketa hasi berritan zuri-gorriek aurrean egindako presioa baliatu zuten baloia berreskuratu, eta Raul Garciak Williamsi area barrura pase ona emateko. Williams errematatzeko gertu zegoenean gainera etorri zitzaizkion bi aurkari, eta ezerezean gelditu zen ahalegina. Bigarren erasoaldian sartu zuen Athleticek hiru puntuak eman zizkion gola. Unai Lopezek behetik atera zuen area ertzeko falta bat, eta Cordobak ezker hegaletik behetik egindako erdiraketa orpoz errematatu zuen Iñigo Martinezek. Haren erremateak Bartraren oinean jo zuen, eta sareetan amaitu zuen.

Kolpea hartu zuen Betisek. Joko eta emaitza bolada eskasean dagoen taldea da, eta asko ari zaio kostatzen sortzea. Hala ere, lehen zatiaren ordu erdia bete aurretik Fekirrek aurrea hartu zion Unai Nuñezi, eta gertu izan zuen banakoa. Erdilari aurreratuak eskuinez jaurtitzeko aukera izan zuen Unai Simonen aurrean, baina ordurako, Nuñezek, bere okerra zuzendu, eta Betiseko jokalariaren jaurtiketa urruntzea lortu zuen. Lehen zatiak ez zuen askoz gehiago eman.

Athletic, bigarren gola sartu, eta partida erabakitzeko irrikaz zelairatu zen atsedenaldiaren ostean. Williamsi pase luze bat ematea nahikoa izan zen aurrelaria Joelen aurrean bakarrik agertzeko, baina atezainak ondo itxi zituen aterako bide guztiak.

Baina lehiak aurrera egin ahala, nekea agertu zen zuri-gorrien artean, eta norabide bakarrekoa zirudien neurketa joan-etorrikoa bihurtu zen. Joan etorri horretan bi taldeek izan zituzten aukera onak. Lehena, Borja Iglesiasek area txikian egindako jaurtiketa izan zen. Unai Simonek eskuin eskuarekin gelditu zuen. Ondoren, Raul Garciak langara bidali zuen korner baten ondorioz egindako burukada. Hamar minuturen faltan hautsi zen neurketa. Hasteko, Fekirrek area txikian egindako errematea ateko marran atera zuen Unai Simonek, baina aldaratzean penaltia egin zuen Iñigo Martinezek. Canalesek harmailara jaurti zuen. Luzapenean, Fekir ahalegindu zen faltaz, baina berriz bikain ibili zen Athleticeko atezaina. Eta lehia amaitzear zela, Villalibre irten berriak errematatu zuen orpoz langara.]]>
<![CDATA[«Arlo guztietan hobetu dut, baina batez ere konfiantzan»]]> https://www.berria.eus/paperekoa/1864/024/001/2020-06-20/arlo_guztietan_hobetu_dut_baina_batez_ere_konfiantzan.htm Sat, 20 Jun 2020 00:00:00 +0200 Haritz Gallastegi https://www.berria.eus/paperekoa/1864/024/001/2020-06-20/arlo_guztietan_hobetu_dut_baina_batez_ere_konfiantzan.htm
Denbora asko zeneraman jokatu barik, eta Ipuruan ukitu zenuen lehen baloia sareetara bidali zenuen. Pozik al zaude?

Konfiantza berreskuratzeko lagungarria da oso. Atletico Madrilen kontra ezin izan nuen jokatu, lesio txiki bat nuelako. Eibarren minutu batzuk jokatzeko aukera eman zidaten, eta lehen errematean asmatzeak indarra eman dit.

Zer iruditzen zaizu normaltasun berriko futbola?

Estadioetara joan eta zalerik ez ikustea arraroa da oso, ezberdina. Bestalde, aldaketa gehiago egiteko aukerak talde dinamika hobea sortzen du. Aukera gehiago ikusten ditugu, eta jokalariok aktiboago gaude. Dena dela, ezohiko egoera da, eta jakin egin behar dugu dagoenari aurre egiten.

Baldintza berezi hauetan txapelketa amaitzea ez jokatzea baino hobea dela uste duzu?

Ni neu jokatzeko gogoz nengoen. Neurri zorrotzak bete behar ditugu. Ez dut arriskurik ikusten. Babestuta gaude.

Zer ari zarete egiten ohiz kanpo futboleko baldintza berriei aurre egiteko?

Kontzentrazioa landu behar da. Lan saioak oso antzekoak dira. 40.000 jarraitzaileren aurrean jokatzetik harmailak hutsik daudela jokatzera alde handia dago. Harmailetan zaleak daudela lortzen dugun kontzentrazioa lortu behar dugu harmailak hutsik daudela. Hori izango da arrakastaren giltza.

Zale zuri-gorria fidela eta beroa da. Zuek antzemango omen duzue gehien zale gabe jokatzea.

Ez nago ados. Jarraitzaileek asko laguntzen digute, duda barik. Baina gu egoera berrira egokitzen ari gara, eta gai gara harmailak hutsik izanda lehiatzeko. Oso motibatuta zelairatzen gara.

Europarako sailkatzea duzue helburua. Aurkariak, sailkapena ikusita, gaitza dirudi. Zer iritzi duzu zuk?

Ez da egoera erraza. Baina Athletic ordezkatzen dugu, eta ez daukagu amore emateko asmorik. Gu prest gaude.

Zuretzat sasoi ona ari da izaten. Hazi egin zarela uste duzu?

Bai. Denboraldia hasi zenean jokatzeko aukera gutxi ikusten nuen. Baina sasoiak aurrera egin ahala lekua egin dut taldean. Urrats handia egin dut. Arlo guztietan ari naiz ikasten, baina, batez ere, konfiantza hartu dut. Oso pozik nago.

Konfiantzak ekarri du zure rol aldaketa?

Arrazoi nagusia konfiantza da. Konfiantzaz dagoen jokalariak ondo egiten ditu gauzak. Hala ere, argi daukat arlo askotan ari naizela hobetzen: taktikoki, teknikoki... Eguneroko lanak hobetzeko aukera ematen du.

Aritz Adurizek erretiroa hartu du. Askoren ustez zu zara haren lekukoa hartuko duen futbolaria. Zama handia da hori?

Ni ez naiz hurrengo Aritz izango. Ni Villalibre naiz. Ahalik eta Villalibre onena izaten saiatuko naiz. Baina horretarako, denbora eta konfiantza behar ditut. Egun batetik bestera ezinezkoa da norberak daukan onena erakustea. Hobetzen ari naiz.

Denbora eskatu duzu. Eta egia da erdiko aurrelari askori kosta egiten zaiela onena ematen hastea: Aduriz, Llorente... Golegileek gainerakoek baino denbora gehiago behar al duzue?

Ez dut uste gainerakoek baino denbora gehiago behar dugunik. Kontua da oso gazte garenetik eskatzen zaigula gure onena emateko. Denbora, konfiantza eta eskarmentua behar dira jokalari gisa egiteko.

Aholku asko ematen al dizkizu Adurizek?

Bai. Mugimenduak, errematatzeko teknika, erdiko atzelariengandik mantendu beharreko distantziak... Eta, apur bat makurtuta ibiltzen naizenez, gorputza zuzen eramateko eskatzen dit.

Tronpeta eskolak ondo al doaz?

Oso pozik gabiltza taldean.

Athleticeko taldekide batzuekin batera musika talde bat osatu duzu, eta sarri elkartzen zarete ensaiatzeko. Zaletasun horrek zuen arteko lotura estutu egin du?

Futbolarekin zerikusirik ez duten aktibitateak egitean indartu egin da gure arteko harremana. Gustura ari gara.

Zaleen kuttun bihurtzeko bidean zoazela dirudi.

Tronpetak famatu egin nauela ikusi dut. Jokalari batek tronpeta jotzea ez da ohikoa. Gustuko dudalako egiten dut. Lagun batek elektrotxaranga batean jotzen du, eta berarengatik hasi nintzen. Txarto jotzen dut. Jendeak uste du ondo aritzen naizela, ez duelako tronpeta ezagutzen. Ea denborarekin hobetzen dudan.

Tronpetagatik ezaguna izatetik golak sartzeagatik ezagun izatera pasatzea da hurrengo helburua?

Espero du golak sartzeagatik tronpeta jotzeagatik baino ezagunagoa izatea.

Gaur Betisek bisitatuko du San Mames. Sevillako taldean ez da giro.

Ez daude sasoi onean, ez. Baina guk berdindu egin ditugu azken partida biak, eta hiru puntuak behar ditugu.]]>
<![CDATA[Bide bertsua, era desberdina]]> https://www.berria.eus/paperekoa/1872/024/001/2020-06-17/bide_bertsua_era_desberdina.htm Wed, 17 Jun 2020 00:00:00 +0200 Haritz Gallastegi https://www.berria.eus/paperekoa/1872/024/001/2020-06-17/bide_bertsua_era_desberdina.htm , kantatu zien Gaizka Garitanok Eibarko udaletxeko balkoitik zaleei. 2014ko ekainaren 2a zen. Untzaga plaza lepo zegoen. Eibar Lehen Mailara igo zela ari ziren ospatzen. Inork inoiz amets egin ez zuena egia bihurtu zuen taldeak. Bigarren B Mailatik gorengo mailara igo zen Eibar errenkadan. 27.000 biztanle inguruko herri txiki bateko taldearen miraria izan zen. Orduan hasi zen gerora Su Ta Garrek sortutako kantuari bide eman zion aroa: Ezina Ekinez.

Eta hala jarraitzen du Eibarrek: ezinezkoa dirudiena egi bihurtuz. 2015ean, Jose Luis Mendilibarrek hartu zuen Garitanoren lekukoa Ipuruako aulkian. Batak zein besteak ohorezko lekua dute Eibar bizitzen ari den unerik gozoenean. Gaur, elkar ikusiko dute Ipuruan jokatuko den derbian.

Mendilibarren eta Garitanoren kirol ibilbideak oso antzekoak dira. Futbolari eta, batez ere, teknikari gisa. Biak dira bizkaitarrak. Biek eman zituzten lehen urratsak Lezaman. Athleticen altzoan hazitako futbolariak dira. Baina ez zuten lehen taldean tokia egitea lortu. Mendilibarri ez zioten debutatzeko aukerarik eman; Garitanok, berriz, partida bakarra jokatu zuen elastiko zuri-gorriarekin. Etxetik kanpo erakutsi behar izan zituzten euren dohainak. Mendilibarrek Bigarren Mailan eman zuen bere onena. Sestaon aritu zen zortzi urtez. Garitanok gorengo mailan jokatzea lortu zuen. Realean aritu zen hiru denboraldiz. Eibarren egindako lan onak zabaldu zizkion talde txuri-urdineko ateak.

Urrezko aroa hasi zen arte, 2004-2005 denboraldia izan baitzen Eibarren historiako onena. Lehen Mailara igotzear egon zen. Orduan egin zuten bat Garitanoren eta Mendilibarren kirol ibilbideek. Mendilibar entrenatzailea zen, eta Garitano taldeko kapitaina.

Entrenatzaile gisa ere antzeko bizipenak izan dituzte. Biak behe-behetik hasi ziren lanean. Mendilibarrek Arratian eman zituen lehen urratsak, eta Garitanok Eibarren bigarren taldea zuzendu zuen lehena. Biek dakite zer den proiektu bat hasi eta ia garatzeko astirik izan gabe maletak egin behar izatea. Era berean, inguruak asko zaindu dituzten esperientziak ere bai.

Teknikarien pareko taldeak

Bien izena lau klubetan ageri da. Athletic B zuzendu dute biek. Halaber, goragoko mailetan Athleticen, Valladoliden eta Eibarren aulkietan sentitzen dena ere ezagutu dute. Valladoliden asko maite dute Mendilibar. Haren izena duen zale talde bat ere badauka. Garitano, berriz, bota egin zuten bederatzigarren jardunaldirako. Athleticen kontrakoa gertatu zitzaien. Zaldibartarra izan zen bederatzi jardunaldi iraun zuena. Derioztarrak emaitza hobeak lortu ditu. Athletic Espainiako Kopako finalerako sailkatu du, eta beste urtebeteko kontratua izenpetu berri du. Eibarren izan dute arrakasta biek. Garitano taldea Lehen Mailara igo duen teknikaria da, eta Mendilibar inoizko emaitzarik onenak eskuratu dituen taldearen entrenatzailea da.

Gaurko derbia Ipuruan jokatuko da; biak asko maite dituzte han. Baina oso entrenatzaile ezberdinak dira. Hasteko, euren izaeran dago aldea. Mendilibar zuzena da. Burura etortzen zaiona bota egiten du. Ingurukoei gustatu edo ez, esan beharrekoa esan egiten du. Garitano zuhurragoa da. Ondo neurtzen du esan beharreko guztia. Etengabe azalpenak ematen aritu beharra da egungo futboletik gutxien gustatzen zaion kontua.

Baliteke euren izaerak zerikusi zuzena izatea entrenatzen dituzten taldeek zelaian erakusten duten jokoarekin. Mendilibarren taldeak ausartak dira,teknikaria mikrofono aurrean den gisakoa. Presioa aurrean egitea du gustuko. Aurkariaren zelaian jokatzearen aldeko apustua egiten du. Metro gutxitan jokalari asko pilatzen ditu. Horretarako, atzeko lerroa asko aurreratzen du. Apustu arriskutsua da. Ondo eginez gero, aurkaria itotzea lortzen da, baina pitzadura txiki bat nahikoa da atezaina salduta lagatzeko. Aurten aurreko denboraldietan baino gehiago ari zaio kostatzen taldeari bere jokoa azaleratzea.

Garitano zuhurragoa da. Erasora jokatzea eta kontrarioaren zain egotea tartekatzea du gustuko. Partidaren bilakaeraren eta bere taldearen unearen arabera bide bat edo bestea hartzeko agintzen du. Erritmo aldaketak egiten ditu talde zuri-gorriak. Bide bat edo bestea aukeratu, argi dago bai Garitanok, baita Mendilibarrek ere, gorengo mailan entrenatzeko gaitasuna dutela. Arrakasta oso modu ezberdinetan lor baitaiteke.

Gaurko neurketari begira, Mendilibarrek uste du «psikologikoki indartsuen dagoen taldeak» lortuko duela garaipena. «Guk asko dugu jokoan. Joko zuzeneko partida izango da». Gonzalo Escalante berreskuratuko du, eta litekeena da igandean jokatu zen Jose Angel eta Enrich hasieratik aritzea.

Neurketa «gogorra eta lehiatua» espero du Garitanok. «Ezin diegu zelai erdian egiten duten jokoa egiten utzi». Hamaikakoaz galdetuta, adierazi zuen ez duela taldea guztiz aldatuko.]]>
<![CDATA[Zelaitik zaleen bihotzera]]> https://www.berria.eus/paperekoa/1927/023/001/2020-05-21/zelaitik_zaleen_bihotzera.htm Thu, 21 May 2020 00:00:00 +0200 Haritz Gallastegi https://www.berria.eus/paperekoa/1927/023/001/2020-05-21/zelaitik_zaleen_bihotzera.htm ohar baten bidez jakinarazi du aurreratu egin behar izan duela erretiroa. Denboraldi amaieran izango zela jakina zen, koronabirusaren pandemiak uzten bazuen, behintzat. Baina lehenago izango da. Ez du beste aukerarik izan. Aldakan duen arazo larriak ez dio zelaian agur esaten uzten. Berandu baino lehen ebakuntza egingo diote minduta duen aldakan, protesi bat jarri eta bizimodu «normala»egiteko. Gorputzak nahikoa dela esan dio 39 urterekin. Aurkari guztien gainetik bi edo hiru segundo egoteko aukera ematen zion gorputzak atseden hartzeko eskatu dio, hain zuzen ere.

Adurizek ez du zelaian esango agur. Ez da agurtuko euren jainko bihurtu duten San Mameseko zaleen txalo artean. Halaber, ez du aukerarik izango Realaren kontra jokatu beharreko Espainiako Kopako finalean aritzeko. Beraz, ez da izango amestutako adioa. Baina Athleticeko ikur bihurtuta hartuko du erretiroa, eta etxekoen nahiz aurkarien miresmen eta errespetuarekin. «Horrelakoa da kirolari profesional baten bizitza. Baina ez kezkatu niregatik; izango dugu agur esateko unea».

Donostiarra erreferente izan da Athleticen. Liderra. Milaka jarraitzaileren ispilu izateko gauza asko erakutsi behar dira zelaian zein kanpoan. Hasteko, konpromisoa. Adurizek kolore zuri-gorriei erakutsi dien lotura eta maitasuna ezin dira zalantzan jarri. Athleticek hiru aldiz jo zuen haren atea, eta hiruretan baiezkoa jaso zuen. Lehenengo aldiz, gurasoen etxea utzi eta talde zuri-gorriko beheko mailetan jokatzeko deitu ziotenean. Bigarrengoan, Valladoliden zegoen eta Athletici laguntzera bueltatu zen, mailari eusteko ahaleginean larri baitzegoen. Hirugarrengoan, Valentzian jokalari garrantzitsua zela, Josu Urrutiaren eskaerari baietz esan zionean. Lau urte lehenago, bere gogoaren kontra, Fernando Garcia Makua presidente ohiak Aduriz Mallorcari saldu zion. Baina ez zuen kontuan hartu.



Nortasun handiko jokalaria da. Odol berokoa. Oldarkorra delako izan dute gustuko entrenatzaileek. Inoiz ez da kikildu, eta hori estimatu dute jokatu duen talde guztietan. Athleticen ez eze, Valladoliden, Mallorcan eta Valentzian ere asko maite dute. Beroa izan da zelaian, eta zuzena kanpoan. Pentsatzen duena esaten baitu, aurrean dagoenari gustatu edo ez. Jokalari askok beste alde batera begiratzen duten egoeretan aurpegia eman du. Kazetariekin ika-mika handiak izan ditu. Baina beti aurrez-aurrekoak. Ez du beste inor bidali bere haserrearen berri ematera.

Baina Adurizek arrastoa utzi baldin badu, futbolari gisa izan duen mailagatik izan da. Talde bat asko maite duten futbolariak, edota nortasun handikoak, asko daude. Baina gutxi dira klub bat gorenera eramateko gai direnak. Bada, Aduriz buru Athleticek lortu duena nekez emango diote klubari hurrengo urteetan haren lekukoa hartuko duten futbolariek. Izan ere, gainerako taldekideen laguntzaz, kapaz izan zen Llorente, Javi Martinez eta Ander Herrera galdu zuen taldea onenen artean mantentzeko. Marcelo Bielsaren ondorengo Athleticen zutabe nagusia izan da. Tarte horretan ohiko bihurtu zen Athleticen ezohikoa dena: lau denboraldiz jarraian Europarako sailkatzea. Horrez gain, Espainiako Kopako bi finaletan izan da -bat galdu eta bestea ez da jokatu-, eta titulu bat ere irabazi zuen: Espainiako Superkopa.

Adurizek 30 urte bete ondoren lortu du aipatutako guztia, erdiko aurrelarien gainbehera hasten den sasoian. Orduan eman du bere onena. 142 gol sartu ditu adin hori gainditu ondoren. Guztira 172 sartu ditu elastiko zuri-gorriarekin. Athleticen historiako seigarren golegile onena da. Gol asko dira. Era guztietakoak, gainera: eskuinez, ezkerrez eta, batez ere, buruarekin. Eskarmentuak eman dion patxadari esker, jokalari bikaina bihurtu da. Urteekin burua hotz mantendu eta erabaki onak hartzen ikasi du.

Gol ahaztezinak

Eta hobekuntza prozesu horretan gau magikoak izan ditu. Superkopako finalean lau gol sartu zizkion Bartzelonari -hiru joanekoan eta bestea itzulikoan-. Genki bost egin zizkion Europa Ligan. Olympique Marseillari, berriz, gol ikusgarria egin zion Velodrome estadioan, ia zelai erditik. Valladolidi penaltiz hanka geldian sartutako gola aurrez inoiz ikusi gabe zegoen gorengo mailan. Aparta izan zen. Eta azken hegaldia San Mamesen egin du denboraldion, Bartzelonaren kontra. Azken minutuan, atzerako artaziarekin, garaipenaren gola sartu zuen. Ter Stegenek ez du inoiz ahaztuko. 20 zenbakiak 2020ko maiatzaren 20an esan du agur.]]>
<![CDATA[«Ez dut gozatuko finalaz guztiok bizitzen ez badugu»]]> https://www.berria.eus/paperekoa/1918/023/001/2020-04-12/ez_dut_gozatuko_finalaz_guztiok_bizitzen_ez_badugu.htm Sun, 12 Apr 2020 00:00:00 +0200 Haritz Gallastegi https://www.berria.eus/paperekoa/1918/023/001/2020-04-12/ez_dut_gozatuko_finalaz_guztiok_bizitzen_ez_badugu.htm
Ondo moldatzen zara konfinamenduan?

Ez dut kexatzeko arrazoirik. Gure etxean gauza asko egiteko aukera dugu. Beste etxe askotan ez dute guk dugun aukera. Hala ere, egoera guztiontzat da larria.

Zer egiten duzu egunak luzeegiak izan ez daitezen?

Egunak ez zaizkit batere luzeak egiten. Zeregin dezente daukat: goizean, gosaltzen dudan bitartean, bideoak egiten ditut urteak betetzen dituzten lagunak zoriontzeko; ondoren, eguneko lehen lan saioa egiten dut; bazkalostean, etxekoekin egoteko aprobetxatzen dut; ondoren, bigarren entrenamendua egiten dut; eta eguna borobiltzeko, afaria prestatu eta telesail bat ikusten dut emaztearekin. Uste dut lehen baino denbora gutxiago daukadala.

Zer sumatzen duzu faltan?

Futbolean jokatzea. Nire ogibidea izateaz gain, zaletasun nagusia ere bada. Oso gustuko dut taldekideekin entrenatzea eta lehiatzea. Bestalde, familiartekoez eta lagunez ere sarri oroitzen naiz.

Pentsatu al duzu etxetik ateratzean zer egingo duzun?

Argi daukat: gurasoekin elkartuko naiz, eta besarkada erraldoi bat emango diet. Gainerako familiartekoekin eta lagunekin ere gauza bera egiteko asmoa daukat.

Koronabirusaren krisiak zerbait ikasteko balioko al du?

Bai. Uste dut bi arlotan aurrerapauso handia emango dugula. Batetik, daukaguna askoz gehiago baloratzen ikasiko dugu: ikusezinak, kritikak... garrantzi gutxi duten kontuak baztertu eta bizitzaz gozatzen ikasteko aukera paregabea daukagu. Ahaztu egiten zaigu zorte handikoak garela. Bestetik, uste dut aurrerantzean osasunari lehentasuna emango diogula. Osasunik gabe ez dugu beste ezer.

Ez duzu uste krisi hau pasatzean bizitako larrialdi egoera ahaztu eta lehengora itzuliko garenik?

Denetik egongo da. Batzuek larrialdiaren aurretik baino gutxiago zainduko dute bere burua. Bizi egin behar dela pentsatuko dute, eta astakeria handiak egin. Nik, ordea, bestelako ikuspuntua daukat. Uste dut bizitzaz gozatzeko ezinbestekoak direla osasuna eta elikadura zaintzea. Zainduz gero, hobeto biziko zara. Osasunak laguntzen badigu, hobeto biziko gara. Bizitzako urte batzuk gaixorik pasatzea ez da aukera ona.

Osasunari eta elikadurari garrantzi handia ematen diozu. Duela hiru urte atzeman zizuten gaitz batekin lotura zuzena dauka ardura horrek?

Neurri batean, bai. Lehendik ere garrantzi handia ematen nion, baina argi dago hori mugarri izan zela. Orban bat neukan bizkarrean, eta espezialista batengana jo nuen. Orbana kendu eta aztertu zutenean melanoma zela atzeman zuten. Hau da, garatuz gero, ondorio oso kaltegarriak ekarriko zizkidan. Gisa horretako orbanak kanporantz hazi beharrean gorputzaren barrualdera garatzen dira. Badaezpadako neurria izan zen, eta zortea izan nuen. Horrelako gaitzak ez garatzeko, oso garrantzitsua da osasuna, elikadura, ariketa fisikoa eta atsedena zaintzea.

Taldekideen artean harremanari eusten al diozue?

Bai. Whatsapp taldea dugu, eta egunero izaten dugu elkarren berri. Egoera aztertzen dugu, eta nola lagun dezakegun erabaki. Horrez gain, talde guztietan agertzen diren umorezko bideoak-eta ez dira falta.

Athleticeko emakumezkoen taldean, bideo deiari esker, batera eta aldi berean osatzen dute lan saioa. Zuek nola egiten duzue?

Guk prestatzaile fisikoekin daukagu harremana. Eurek agindutakoa egiten dugu. Goiz eta arratsaldez entrenatzen gara. Egiten dugunaren berri emateaz gain, nola sentitzen garen esaten diegu; guztiaren berri dute. Ondo zaintzen gaituzte. Igandeetan atseden hartzen dugu.

Geratzen diren partidak jokatu egin behar direla uste duzu?

Lehentasuna, osasuna da. Gainerako guztia bigarren mailan dago. Osasunean adituak direnen iritzia aintzat hartu eta horren arabera hartu beharko dira erabakiak.

Futbola kontaktu kirola da. Elkar kutsatzeak erraza dirudi. Kezka eragiten al dizu horrek?

Ez dut itzuleraz askorik pentsatu. Argi dut kontu hau ez dela egun batetik bestera konponduko, eta hasieran kostatu egingo zaigula egoera berrira egokitzea. Arraro samarra izango da kalera itzultzea.

Osasuna da lehentasuna. Futbolari batek hiru egunetik behin sarri jokatzea osasuna al da? Hau da, partida batetik bestera gutxienez 72 orduko tartea izatea neurri egokia dela uste duzu?

Osasuna lehenesten dut, baina taldean bizi dudan egoera aintzat hartuta, hiru egunetik behin jokatuz gero, uste dut gehiago arituko nintzela [kar-kar].

Alemaniako talde batzuk hasi dira entrenatzen. Herrialde bakoitzak egoera ezberdina bizi du, eta neurriak ere ez dira berberak.

Osasun krisi honek irauten duen bitartean batasuna eskatuko nuke. Nik ez dakit zein herrialde ari den asmatzen hartzen ari den neurriekin. Osasun kontuetan ez naiz aditua. Ez daukagu nahikoa informazio. Beraz, zuhurrak izan behar dugu. Futbolean ohikoa da ezjakintasunez hitz egitea. Ez nuke akats hori egin gura.

Koronabirusak mundua hankaz gora jarri ez balu, ate joka legoke Espainiako Kopako finala.

Sare sozialetan Kopako finala aipatu zidaten atzo [herenegun] eta erabat ahaztua nuela konturatu nintzen. Pentsa nola dauden gauzak. Nik egoera hau irauliko dugun unea baino ez daukat buruan. Besterik ez. Herritar askoren bizitza dago jokoan. Beste guztiak ez du asko balio.

Harmailak hutsik dauden final bat jokatzeak ba al dauka zentzurik?

Finalera guztiok iritsi gara, ez bakarrik jokalariak. Beraz, guztiok gozatu behar dugu finalaz. Neurketak ez ditugu jokalariok bakarrik jokatzen. Jarraitzaileen ekarpena ezinbestekoa da. Kopako finala guztiok bizitzen ez badugu, nik ez dut gozatuko.

Athleticek finala irabaziko balu, akaso ezin izango zen inor ibaiertzera gerturatu taldeari harrera egitera. Ez luke ez buru ez hanka izango.

Ez dauka zentzurik.

Eta liga amaitu eta diru galerak ahalik eta txikienak izateko ateak itxita jokatzearen alde zaude?

Nik ez dut azken erabakia hartu behar. Eta, gainera, ez dut nahikoa informazio. Ez dakit ateak itxita jokatzeak edo ez jokatzeak zein ondorio ekarriko lituzkeen. Hortaz, gurago dut zuhurra izan.

Klub batzuk hasi dira neurriak hartzen. Batzuetan, enplegua aldi baterako erregulatzeko txostena aurkeztu dute, eta beste batzuetan zuzendaritzak eta jokalariek soldata murrizketak adostu dituzte. Athleticek ez du berririk eman. Soldata jaisteko eskatu al dizue zuzendaritzak?

Kluba guztion gainetik dago. Athleticek beharra badauka, jokalariok premia horretara egokituko gara. Athleticek diru premia badauka, jokalariok onartu egin beharko dugu. Jokalari guztiok Athleticen zaleak gara.

Jokalarien eta zuzendaritzaren arteko harremana ona al da?

Oso ona da. Beharren bat daukagunean ez dugu arazorik eurengana jotzeko.

Jokalariok gizartearen jomugan zaudela sentitzen duzue? Zuen erabakiak lupaz aztertzen direla uste duzu?

Ulergarria ere bada. Diru asko dago futbolean. Futbolariak, gainera, ezagunak gara. Beste arlo batzuetan ere diru asko irabazten dute, baina ez dira horren ezagunak.

Futbolariok irabazten duzuen dirua medikuek eta ikerlariek merezi dutela entzuten da orain; hau da, eurak direla gizarte honetan ezinbestekoak. Zer pentsatzen duzu horrelako gauzak entzuten dituzunean?

Futbolarion soldatak ez dira gizartearentzat dugun garrantziaren neurri berekoak. Medikuak eta beste hainbat profesional gu baino askoz beharrezkoak dira. Lehen ere bagenekien hori. Kontua da jokalarion soldatak futbolak sortzen duen neurrikoak direla. Eta gainerako arlo guztietan ere horrela da. Zorionekoak gara.

Osakidetzak zein beste erakunde batzuek osasun krisi honetan Athletic osatzen duzuenok erakutsi duzuen elkartasuna nabarmendu gura izan dute. Ari zarete zuen ekarpena egiten.

Athletic klub ezberdina da,eta horrelako egoeretan erakutsi egiten du. Ez daukat beste ezer esateko.

Kirol arloari erreparatuta, pentsatzekoa da ez zaudela pozik orain arte egin duzun denboraldiarekin, ezta?

Argi dago ezetz. Futbolariok jokatzeko egiten dugu lan. Gainera, ondo nago. Nik une latzak pasatu nituenean ulertu nuen ez neukala lekurik taldean. Ez nengoen sasoian, eta burua ere ez neukan behar zen moduan. Kontua da egun ondo nagoela, eta ez jokatzeak min ematen dit. Faltan sumatzen dut astero jokatzea. Athleticera itzuli aurreko bi urte eta erdian ikaragarri gozatu nuen, eta orain ez nago gustura.

Alavesen oso ondo aritu zinen. Gasteizen egindako lanak zabaldu zizkizun etxera itzultzeko ateak. Zer behar duzu taldean pisu handiagoa izateko?

Futbolean aukerak irabazi egin behar dira. Inork ez du ezer oparitzen. Lehiakortasun handia dago. Alaveseko Ibai astero zelaian egoten zen. Batzuetan ondo aritzen zen, eta beste batzuetan eskasago, baina asko jokatzen zuen. Norberak duen maila erakusteko ezinbestekoa da segida izatea zelaian. Konfiantza ematen du. Ez naiz kapaz izan jarraitutasun hori lortzeko. Lanean jarraituko dut.

Neguko merkatuan, Espanyolera joateko asmoa izan zenuen, baina Gaizka Garitanok atea itxi zizun. Ez zintuen galdu gura. Aurrera begira asmo bera duzu?

Kontua da orain ez dakigula zer gertatuko den. Beraz, zaila da etorkizuneko planak egitea. Athleticen jokatzea gustatuko litzaidake.

Azaroan, 31 urte beteko dituzu. Egun, adin ona da kirol profesionalean aritzeko. Luzaroan jarraitzeko asmoa daukazu?

Ez dut erretiroa buruan. 24 urte nituenean baino indar handiagoa daukat. Asko zaintzen dut neure burua, eta uste dut ondo jokatu dezakedala. Futbolean jarraitzea baino ez daukat buruan.

Zer lortu gura duzu futbolean?

Athleticeko hamaikakoan lekua izatea eta elastiko zuri-gorriarekin txapelketa bat irabaztea. Taldean garrantzitsua izanda gabarra ateratzea da ametsa.

Erretiroa hartzean, aulkira pasatuko al zara?

Bai. Ez dakit futbola utzi bezain laster hasiko naizen entrenatzaile lanetan, baina teknikari izateko asmoa dut. Egun, faltan sumatzen dut entrenatzaile lana.

Zuk zuzendutako talde batean izango al zenuke tokirik?

Baietz esango dizut [kar-kar]). Konfiantza izan behar da norberaren buruan. Bestela, ez dago zereginik.

Besteak beste, Unai Simon, Unai Vencedor eta Oihan Sancet iritsi dira taldera. Haiekin eta behetik datozenekin lasai egon daitezke zaleak?

Athleticek jokalari onak ditu, baina gazteekin konfiantza eta pazientzia izan behar da. Laportek edo Muniainek igo bezain laster erakutsi zuten maila oso ona, baina hori oso futbolari gutxik egin dezakete. Gazteak egokitu egin behar dira gorengo mailara.

Zein mezu bidaliko zenieke elkarrizketa irakurtzen ari direnei?

Hasteko, eskerrak emango nizkieke arduraz jokatzeagatik. Bestalde, egoera larri hau ere gaindituko dugula esan gura diet. Aurki egongo gara elkarrekin daukagun guztiarekin gozatuz.]]>
<![CDATA[Laugarren aukera da]]> https://www.berria.eus/paperekoa/1934/018/001/2020-03-15/laugarren_aukera_da.htm Sun, 15 Mar 2020 00:00:00 +0100 Haritz Gallastegi https://www.berria.eus/paperekoa/1934/018/001/2020-03-15/laugarren_aukera_da.htm
Baina ondo dagoena aldatzeko arrazoi handirik ez dago, baldin eta berriek dagoena nabarmen hobetzen ez baldin badute. Ez da Vesgaren kasua. Erdilaria talde jokalari ona da, eta langilea. Goiko jokoa ondo menderatzen du, eta, aukera duenean, aurrera egitea du gustuko. Baina ez da futbolari ezberdina. Ez da postua bermatua duten jokalari ordezkaezin horietakoa. Haren jokoa gustuko ez dutenek futbolari motela eta hotza dela diote. Taldean dauden euskarrien artean bat gehiago dela, alegia. Beraz, jakinekoa zen ez zuela erraza izango taldean leku bat izatea.

Hala, asko kostatu zaio egun bizi duen egoera gozora iristea. Isilean sufritu behar izan du. Ligaren lehen herenean denbora gehiago pasatu zuen harmailetan, berdegunean baino. Garitanoren aginduetara debuta egiteko ia hiru hilabete itxaron behar izan zuen. Celtaren kontrako neurketan izan zen, Balaidosen. Ahazteko moduko partida izan zen. Bigarren aukera hilabete eskas beranduago eman zioten. Orduan ere etxetik kanpo. Vila-Realen etxean. Zeramikaren zelaiko lehia ere ez zen zuri-gorrien neurketarik osoena izan, eta jakinekoa da zer gertatzen den entrenatzaileak aldaketak egin eta taldeak erantzuten ez duenean: lehengora itzultzen dela.

Baina Vesgaren izaera eta amore ematea ez datoz bat. Euskarriak beharrean jarraitu zuen, eta hirugarren aukera balekoa izan zela esan daiteke. Athleticek Santiago Bernabeun jokatutako lehian aldatu zen euskarriaren egoera. Garitanok hiru erdiko atzelarirekin zelairatzea erabaki zuen. Joko sistema horrekin, eta aurrean goi mailako talde indartsua zegoela aintzat hartuta, beste aukera bat eman zion arabarrari. Atzeko lerroa gehiago babestuta, erosoago aritu zen Vesga. Garitano konforme geratu zen haren ekarpenarekin, eta ordutik ona partida gehienak jokatu ditu. Egonkortu egin da hasierako hamaikakoan. Egun, Vesgak hasieratik ez jokatzea litzateke albistea.

Dani Garciaren bikotea

Garitanoren Athleticen Dani Garciak bermatutako dauka postu bat hamaikakoan. Entrenatzailearen konfiantzazko jokalaria da. Haren alboan aritzeko sormen gehien zuten futbolarien aldeko apustua egin zuen sasoi hasieran teknikariak. Unai Lopezen eta Beñaten arteko lehia gazteak irabazi zuen. Baloia jokatzeko duen erraztasunaz gain, orain arte erakutsi gabeko grinarekin aritu zen donostiarra. Hasierako indarra galdu egin duela dirudi, ordea. Luze egiten ari zaio denboraldia. Min hartuta egoteak ere ez dio lagundu.

Kontuak kontu, San Joseri eta Vesgari ere eman die jokatzeko aukera Garitanok. Vencedor gaztea ere ari da burua erakusten, baina oraindik apur bat itxaron beharko duela dirudi. Kontuak kontu, azkenerako Vesgak aurrea hartu die taldekide guztiei. Azken hilabete bietan bera izan da ezker euskarria. 26 urterekin Athleticen egonkortzeko bidean dela dirudi. Izan ere, Vesgaren kirol ibilbidea ez da erraza izan. Leganesen utzita jokatu aurretik Sportingen ere aritu behar izan zen.

Bi egonaldiak aberasgarriak izan dira jokalarientzat. Gaur-gaurkoz bera da teknika zuri-gorrien apustua euskarrian jokatzen, baina auskalo zer geratzen den lehia itzultzean.]]>
<![CDATA[Ilusioa dute indar]]> https://www.berria.eus/paperekoa/1958/036/001/2020-03-08/ilusioa_dute_indar.htm Sun, 08 Mar 2020 00:00:00 +0100 Haritz Gallastegi https://www.berria.eus/paperekoa/1958/036/001/2020-03-08/ilusioa_dute_indar.htm
Baina Athleticentzat ez da ona etengabe apirilaren 18ko partidari begira egotea. Gaizka Garitanok berak argi utzi zuen atzo hori, Valladoliden aurkako lehiaren atariko agerraldian. «Lehentasuna liga da. Oker geundeke Kopan pentsatuko bagenu. Jokalariei argi utzi diet».

Finalera baldintza onetan iristeko, ezinbestekoa izango da asteburuero ligan lan ona egitea. Gaur izango dute horretarako lehen aukera, Valladoliden. Garaipenek ematen duten konfiantza baino indar handiagorik ez dago datozen erronkei aurre egiteko. Gainera, emaitza bolada txarraren ondoren, Athleticek puntuak bildu behar ditu, bide onean doala ziurtatzeko.

Ligan, beraz, lanean segitu behar du. Talde zuri-gorria sailkapenaren erdialdean dago egun. Gauzak nola dauden aintzat hartuta, erdibidean geratzeko arriskua dauka. Gora begiratuz gero, Europako postuak gura baino gehiago urrundu zaizkio. Beraz, onenen artera itzuli gura badu, sasoiaren azken txanpa ikusgarria egin beharko du. Bestalde, sei onenen artean sailkatzeko borrokan egongo den talde multzoarekin bat egiteko ahalmenik ez badu, denboraldia arazo barik amaitzea izan beharko litzateke helburua. Ildo horretan, Vila-realen kontra eskuratutako garaipenak arnasa eman dio. Jaisteko postuetan dauden taldeak urrun daude, baina orain arte eskuratutako puntuekin ez luke nahikoa izango mailari eusteko. Bistan da Athleticek arrazoi asko dituela Valladoliden kontra gogotsu zelairatzeko.

Etxean hiru garaipen

Aste barruan intentsitate eta presio handiko norgehiagoka jokatu izanak kalte egin diezaioke. Athleticen dohain nagusia intentsitatea da. Talde langilea da, eta fin egon behar du aurkariak estu hartzeko. Hau da, indarrak lagundu egin behar dio. Valladolidek badaki hori. Pentsatzekoa da, zaleen babesarekin, hasieratik ahaleginduko dela Athletic estu hartzen. Izan ere, Sergio Gonzalezen taldeak puntu premia dauka. Talde zuri-gorriak baino bost puntu gutxiago ditu. Beraz, jaisteko postuekiko alde ona dauka, baina, pare bat neurketatan kale egiten badu, mailari eusteko borrokan dauden taldeen multzoan sartuko litzateke. Etxeko partidetan talde lehiakorra da Valladolid. Bi neurketa baino ez ditu galdu Zorrillan. Baina hirutan atera da soilik garaile.

Athleticen inguruan, Garitanok erabiliko duen jokamoldea da zalantza nagusia. Etxetik kanpo erdiko hiru atzelarirekin jokatzeko ohitura hartu du, baina ez da oso eraginkorra izan. Zelai erdia indartuta, talde orekatuagoa dela dirudi. Bestalde, jokalari batzuei freskotasun falta nabari zaie. Aukera ona izan daiteke Yeray, Raul Garcia, Yuri eta halako jokalariei atseden emateko.

VALLADOLID-ATHLETIC
Valladolid Masip; Moyano, Olivas, Salissu, Carnero; Plano, Joaquin, Alcaraz. Toni Villa; Sandro eta Enes Unal.
Athletic. Unai Simon; Lekue, Nuñez, Iñigo, Yuri; Dani Garcia, Unai Lopez; Ibai, Muniain, Cordoba; eta Williams.
Epailea. Munuera Montero. Lekua. Jose Zorrilla (15.000 ikusle).
Ordua. 14:00etan (Gol).]]>
<![CDATA[«Prest eta ilusioz gaude erronkari aurre egiteko»]]> https://www.berria.eus/paperekoa/1897/024/002/2020-03-05/prest_eta_ilusioz_gaude_erronkari_aurre_egiteko.htm Thu, 05 Mar 2020 00:00:00 +0100 Haritz Gallastegi https://www.berria.eus/paperekoa/1897/024/002/2020-03-05/prest_eta_ilusioz_gaude_erronkari_aurre_egiteko.htm
Iritsi da eguna. Espainiako Kopako final baterako sailkatzeko aukera duzue berriz ere, Granadan. Nolako partida izango da?

Oso gaitza. Granada talde igo berria da, baina oso ondo ari da lehiatzen. Denboraldiko ezusteko nagusia dela uste dut. Etxean talde indartsua da. Sufritu egin beharko dugu, baina taldea gogotsu dago. Partida irabazteko asmoarekin zelairatuko gara.

Joanekoan 1-0 irabazi zenuten. Emaitza ona edo oso ona da?

Aurkaria behartuko duen emaitza da. Kanporaketa ez dago erabakita, baina berdinketa guztiak gure aldekoak dira. Lasai gaude alde horretatik.

Gol bat sartzea da helburua?

Gol bat sartzen badugu, aurkariak gutxienez hiru sartu beharko ditu. Defentsan sendoak gara. Beraz, gol bat sartzeak asko emango liguke.

Garrantzitsua izan al da Vila- Real mendean hartu, eta emaitza bolada txarrari amaiera ematea, Granadari konfiantzaz aurre egin ahal izateko?

Bai. Garaipen guztiek ematen dute indarra. Ligako emaitzak ez ziren onak. Arnasa hartu dugu. Taldeak eskertu du.

Lasai zaudete, beraz, gaurkoa bezalako norgehiagoka garrantzitsu bati heltzeko?

Bai. Partidak jokatu eta jokatu eta garaipena eskuratzeko kapaz ez izateak eragina dauka jokalariengan. Hala ere, taldeak ondo egin du lan. Egoera iraultzeko kapaz ginela sinetsita geunden.

Goren mailan lehiatzea da futbolari guztien helburua. Baina behin hori ohiko bihurtzen denean, beste kontu batzuekin egiten duzue amets. Athleticeko jokalari batentzat Kopako final bat jokatzea izan daiteke horietako bat. Zer sentitzen da hori hain gertu izanda?

Granadaren kontrako neurketa oso garrantzitsua da. Final bat jokatzeko aukera eskuratzea gaitza da oso. Bilbok eta inguruak argi erakutsi digute zein garrantzitsua den gaurko partida. Jokalariok ere badakigu zer dagoen jokoan. Prest eta ilusioz gaude erronkari aurre egiteko.

Zure kirol ibilbideko lehen finalaren atarian zaude. Gaztea zara, baina akaso ez duzu izango antzeko partida bat jokatzeko aukerarik.

Pozgarria da horrelako egoera batean egotea. Ilusioa daukat. Sevillako finala jokatzeko gogoa daukat. Etorkizunean gisa honetako norgehiagoka gehiago jokatzeko itxaropena ere badut.

2009tik hona Athleticek final dezente jokatu ditu: Espainiako Kopako hiru eta Europa Ligako beste bat. Bizkaitarra izanda, gertutik kasu egingo zenien haietako batzuk, ezta?

Bucarestekoa da gehien gogoratzen dudana. Harmailan egon nintzen taldea bultzatuz. Finala amaitu zenean, negar dezente egin nuen zelaira begira. Athleticek Espainiako Superkopa irabazi du azken urteotan, baina gainerako finalak galdu egin ditu. Gure esku dagoen guztia egingo du berriz ere txapelketa bat irabazteko aukera izateko.

Gainera, aurten, ez daude ez Bartzelona, ez Reala Madril, ezta Atletico Madril. Horrek irabazteko aukera handiagoa ematen dizue?.

Aukera moduan ikusten dugu. Indarra ematen du.]]>
<![CDATA[Sinetsi egiten du]]> https://www.berria.eus/paperekoa/1876/024/001/2020-03-05/sinetsi_egiten_du.htm Thu, 05 Mar 2020 00:00:00 +0100 Haritz Gallastegi https://www.berria.eus/paperekoa/1876/024/001/2020-03-05/sinetsi_egiten_du.htm
Granadaren aurkako gaurko finalerdietako itzulikoak ilusio handia sortu du. Taldearen ligako jardunean eragin zuzena izan du. Athletic ez da gai izan bi lehiaketetan neurria emateko. Gaizka Garitanok Koparen aldeko apustua egin du, eta ligan ordaindu egin du. Jarraitzaileek, berriz, ez dute beste ezer buruan. Pentsa, gaurko partida ikusteko ia 4.000 sarrera eskari izan zituen Ibaiganek. Neurketa aste barruan eta Granadan jokatuta ere, bazkide askok izan dute neurketa bertatik bertara ikusteko interesa. Bazkide ez diren asko ere aritu dira sarrerak lortu guran. Gehienak etxean geratuko dira. Izan ere, Granadan ere ez baitute beste konturik. Hiria taldearen koloreekin jantzi dute gaurko egunerako. Taldeari harrera beroa prestatu diote autobusa Los Carmensera iristen denerako. Harmailak gainezka egongo dira.

Beraz, Athleticek presiopean jokatuko du. Granadak babes handia izango du. Baina Athleticek emaitza ona lortu zuen joanekoan. Zuri-gorriek gol baten errenta dute, eta, San Mamesen golik sartu ez zietenez, berdinketak ez eze gol batengatik galdutako ia edozein emaitzak ere balio die. Beraz, gol bat sartzeak asko emango lioke Garitanoren taldeari.

Dani Garcia gabe

Granada talde lehiakorra da. Gogorra. Indar handiarekin jokatzen du, eta hasieratik estutuko du. Athleticek sufritu egin beharko du. Prest dago horretarako, baina Dani Garciaren ekarpenaren falta sumatuko du, txartelengatik zigortuta baitago. Euskarria ezinbestekoa da defentsako lan sendoa egiteko. Gainera, bolada gozoan dago. Mikel San Josek ordezkatuko duela dirudi. Bestalde, litekeena da zuri-gorriek hiru erdiko atzelarirekin aritzea. Williamsek, Yurik eta Iñigo Martinezek txartela ikusiz gero, eta Athletic finalerako sailkatuko balitz, ez lukete finala jokatuko. Granadan Soldado dago zigortuta.

GRANADA-ATHLETIC
Granada. Rui Silva; Victor Diaz, German, Duarte, Neva; Herrera, Gonalons, Foulquier, Puertas; Machis eta Carlos.
Athletic. Unai Simon; Capa, Yeray, Nuñez, Iñigo; Yuri; San Jose, Vesga; Muniain, Raul Garcia eta Williams.
Epailea. Del Cerro Grande.
Lekua. Los Carmenes (19.336 ikusle)..
Ordua.21:00 (Cuatro)..]]>
<![CDATA[Athleticek garaipena behar du konfiantza berreskuratzeko]]> https://www.berria.eus/paperekoa/1968/031/002/2020-03-01/athleticek_garaipena_behar_du_konfiantza_berreskuratzeko.htm Sun, 01 Mar 2020 00:00:00 +0100 Haritz Gallastegi https://www.berria.eus/paperekoa/1968/031/002/2020-03-01/athleticek_garaipena_behar_du_konfiantza_berreskuratzeko.htm
Gaur-gaurkoz, datorren ostegunean Granadaren kontra jokatu beharreko Kopako finalerdietako itzulikoak dauka lehentasuna. Beste final bat jokatzeko aukera lortzeak baretuko luke egoera. Hala ere, gaur ligan irabaztea oso garrantzitsua da zuri-gorrientzat. Batetik, lehenbailehen aldatu behar delako taldearen joera. Ligan goiko postuak nahi baino gehiago urrundu dira, eta ezkortasunean jarraitzeak behera begira jar lezake taldea. Bestalde, Kopako lehiari aurre egiteko garrantzitsua da konfiantza berreskuratzen lagunduko duen partida bat jokatzea. Athleticeko jokalariak jota baitaude une honetan. Ez dute garaipenaren biderik aurkitzen. Egun, lehiakor izatea ez da nahikoa zuri-gorrientzat. Aurkariek baino askoz gehiago egin behar dute irabazteko.

Vila-Real ez da kontrario erraza izango. Gauzak ondo egiten ari den taldea da. Talentu faltarik ez dauka, gainera. Lerro guztietan ditu futbolari onak, baina, batez ere, erasoko jokalarien abiadura eta gol sena dira taldearen indargune. Gerard Morenok eta neguko merkatuan fitxatutako Paco Alcacerrek gutxi behar izaten dute aurkariaren atea zulatzeko. Hain zuzen ere, Athletici falta zaiona dauka aurkariak. Vila-Real Europarako sailkatzea eskuratzeko borrokan ari da. Bi puntura baino ez dauka helburua. Bestalde, Gaizka Garitanok ez du gaurko neurketarako dituen asmoen berri eman.

ATHLETIC-VILA-REAL
Athletic. Simon; Capa, Yeray, Nuñez, Iñigo; Yuri; Dani Garcia, Unai Lopez; Muniain, Williams eta Raul Garcia.
Vila-real. Asenjo; Ruben Peña, Albiol, Pau Torres, Alberto Moreno; Trigueros, Iborra, Cazorla; Moi Gomez, Gerard Moreno, eta Alcacer.
Epailea. Medie Jimenez.
Lekua. San Mames (53.289 ikusle).
Ordua. 14:00 (Gol)]]>
<![CDATA[Ahaztu egin zaio irabazten]]> https://www.berria.eus/paperekoa/1996/021/001/2020-02-28/ahaztu_egin_zaio_irabazten.htm Fri, 28 Feb 2020 00:00:00 +0100 Haritz Gallastegi https://www.berria.eus/paperekoa/1996/021/001/2020-02-28/ahaztu_egin_zaio_irabazten.htm
JUANJO VALENCIA Athleticeko jokalari ohia

«Gaizka Garitano lan ona egiten ari da»

Zazpi urtez zaindu zuen Athleticen atea Juanjo Valenciak. Ondo daki nola pentsatzen duten Athleticeko jokalariek. Uste du ez dela federik galdu behar. «Emaitza bolada txarra da, baina ez dut uste taldea txarto dagoenik. Eskuratu dituen puntuak baino gehiago irabazteko maila erakutsi du. Dinamika aldatzeko lan egin behar da, baina taldeak aurrera egingo du». Begi bistakoa da Athletic eta bere ingurua lasai ez daudela. «Emaitzak txarrak direnean, ordea, ez da urduri jartzea komeni. Futbola joko bat da. Batzuetan, asko eginda sari txikia lortzen da, eta, beste batzuetan, gutxi eginda emaitza bikaina da. Athletic irabazteko nahikoa egiten ari da. Beraz, taldea babestea ezinbestekoa da».

Taldearen ibilbidea oso kritikatu ari da izaten: hiru erdiko atzelariko jokamoldeak eraginkor izateari utzi diola, jokalariak nekatuta daudela, ate aurrean gabezia handiak dituen taldea dela... Aurrera egiteko ingurukoen bultzada ezinbestekoa dela uste du, haatik, Valenciak. «Jokalariari eragin egiten dio. Sentitu egiten du. Egindako lana emaitzetan islatzen ez denean, min egiten du. Horrelako egoeretan ezin da etsi». Baina jokalarien aldean, presio handia entrenatzaileak du. Bada, Valenciak ez du uste Gaizka Garitanoren lana ezbaian jarri behar denik. «Entrenatzaileak emaitzen mende daude. Baina Gaizkak sinesgarritasun handia duela iritzi diot. Lan ona egiten ari da. Ezin dugu konfiantza galdu».

ISMAEL URZAIZ Athleticeko jokalari ohia

«Taldeak erasoko jokoa hobetu behar du»

Athleticek azken hamarkadetan izan duen golegile onenetakoa da Ismael Urzaiz. Taldeari irabazten lagundu zioten makina bat gol sartu zuen. Hain zuen ere, hori da egungo Athleticek duen gaitz nagusietako bat: gol sena duen futbolari bat falta zaio. Gainera, hurrengo urteetan taldeak gabezia horrekin bizi beharko duela dio. «Azken sasoietan Adurizek izan du golak sartzeko ardura. Arlo horretan berari esker eutsi dio taldeak. Gisa horretako jokalariei esker, oso ondo ez jokatuta ere, irabazi egiten da. Orain, ondo jokatu behar da. Jakina zen Adurizen ostean lehortea egongo zela».

Sormen arazoak ikusten dizkio taldeari. «Ondo jokatzen duen taldeak irabazi egiten du. Athletic oso gol gutxi jasotzen duen taldea da. Hori oinarri oso ona da. Lan hori abiapuntu hartuta, aukerak sortzea izan behar da helburua. Eta hori ondo jokatuta lortzen da. Athleticek hobeto joka dezake».

Garitano ez du «kolokan» ikusten, baina ligan lasai aritzeko, eta, batez ere, Kopako itzulikoari indartsu aurre egiteko, etzi Vila-Real mendean hartzea ezinbestekoa dela azpimarratu du. «Irabazi ezean konfiantza gutxiagorekin egingo dio aurre Kopari. Egoera horretan Granadak gol bat sartzeak min handia egin diezaioke taldeari». Urzaizek uste du Kopari arreta handia jartzeak ekarri duela ligako bolada txarra.

KOIKILI LERTXUNDI Athleticeko jokalari ohia

«Ligan lauko defentsara itzuliko nintzateke»

Zuri-gorrien partida guztiak ikusten ditu Koikili Lertxundik. Haren ustez, Athleticek joko ausartagoaren eta erasokorragoaren alde egin izanak kalte egin dio. «Arduratzeko egoera da. Baina taldearen ibilbidea aztertzeko orduan, emaitzez gain, beste hainbat gauza hartu behar dira kontuan. Athleticek irabazten zuenean, jokoa kritikatzen zuten. Orain, aldiz, erasoan aukera gehiago sortzen ditu, baina emaitzak txarragoak dira. Horrelakoa da futbola», esan du, «Zaleak eskatzen zuenari eman dio erantzuna Garitanok. Ezin zaio taldearen bolada txarraren ardura guztia aurpegiratu», gaineratu du.

Koikili lauko defentsara itzuliko litzateke ligan. Muniain sormen lanetan jarri, eta Williams hegalean aritu denetan izan da eraginkor Athletic. «Iñakiri asko kostatzen zaio golak sartzea, eta hori garesti ordaintzen du taldeak». Halaber, Valenciak eskatu gisara, Koikilik ere taldearekin bat egiteko eskatu die jarraitzaileei. «Athleticek garaipena behar du bolada txarra amaitu, eta autoestimua berreskuratzeko. Alde horretatik, zaleek bultza egiteko ordua da. Taldeak haien babesa behar du. Sasoiko une erabakigarria da. Aurrera egin ezean, egoera nahasteko arriskua dago».]]>
<![CDATA[Lana pilatu zaio]]> https://www.berria.eus/paperekoa/1872/024/001/2020-02-21/lana_pilatu_zaio.htm Fri, 21 Feb 2020 00:00:00 +0100 Haritz Gallastegi https://www.berria.eus/paperekoa/1872/024/001/2020-02-21/lana_pilatu_zaio.htm
Baina ligan izan duen beherakada ere zeresana ematen ari da. Bolada oso txarrean murgildu da Athletic: bederatzi partida daramatza irabazi barik. Jokoan egon diren azken 27 puntuetatik bost baino ez ditu eskuratu. Hala ere, sailkapenaren erdialdean dago: hamargarren da. Gora begiratuta, Europarako sailkatzeko aukerak ihes egin diola dirudi. Amildegira begiratuz gero, berriz, hamar punturen aldea izateak lasaitasuna ematen du. Athletic erdibidean geratu da: ez gora, ez behera.

Kontua da oraindik hiru hilabete geratzen direla liga amaitzeko, eta lanean jarraitu behar duela. Dinamika txarretik lehenbailehen irtetea ezinbestekoa da jokalariek konfiantza berreskura dezaten, galtzen ohitzen diren taldeei asko kostatzen baitzaie egoera iraultzea. Martxoaren 5ean Granadan (Espainia) jokatuko duen Kopako finalerdietako itzulikoari aurre egiteko ere lagunduko dio ligan irabazteak.

EMAITZA BOLADA TXARRA

Athleticek abendu hasieratik darama ligan irabazi barik. San Mamesen Granada 2-0 mendean hartu zuenetik bost partida berdindu ditu, eta lau galdu; azken hirurak, jarraian. Ordutik, ligako talderik txarrena da. Emaitzak eskasak dira. Beraz, normala da entrenatzailea eta jokalariak kezkatuta egotea.

Ia hiru hilabete irabazi barik daraman talde batek gabezia bat baino gehiago izan behar du, baina, ibilbide oker honetan, Athleticek ez du iparra galdu. Talde gisa funtzionatu du. Gehienetan ondo lehiatu da, eta, neurketa askotan, lortu duen uzta baino gehiago merezi izan du. Hala ere, futbolean alde handia dago merezi izatearen eta lortzearen artean. Emaitza txarrek lotura zuzena dute taldeak dituen pitzadurekin. Athleticen kasuan, nekea eta eraginkortasunik eza dira emaitza txarren arrazoi nagusiak. Zuri-gorrien jokoan garrantzi handia duten zenbait futbolarik erregai gutxi dute. Raul Garciak eta Yeray Alvarezek atsedena behar dute galdutako freskotasuna berreskuratzeko. Yuri Berchiche, berriz, minez ari da jokatzen.

Bestalde, jakinekoa da Athleticek zer arazo dituen golak sartzeko. Aurkari ia guztiek baino aukera gehiago eta garbiagoak sortu behar izaten ditu etekina lortzeko. Ondorioz, garesti ordaintzen ditu defentsan egindako akatsak. Hori gutxi ez, eta Asier Villalibrek min hartu du, eta zenbait astez egongo da jokatu gabe.

JOKALARIEN KUDEAKETA, EZBAIAN

Ez da ikerketa sakonik egin behar Gaizka Garitanok gustuko dituen jokalarien zerrenda egiteko. Jokalari bakoitzak jokatu duen minutu kopurua begiratzea nahikoa da bi talde nagusi daudela ikusteko. Bederatzi jokalarik 2.000 minutu inguru pilatu dituzte ligan. Hau da, zigorrik edo lesiorik ezean, beti daude hamaikakoan. Gainerako futbolariek teknikariaren konfiantza dutenek utzitako hondarrak jokatu dituzte.

Gutxi jokatu dutenen zerrenda luzea da. Batetik, Garitanok erakutsi du ez dela aldaketak egitearen zalea. Bestetik, agerikoa da teknikariak alde handia ikusten duela ohiko titularren eta gainerako futbolarien artean. Ez du federik taldean urte asko daramatzaten futbolariengan, eta bigarren taldetik igo dituen gazteei gorengo mailan lehiatzeko apur bat falta zaiela dirudi. Arrazoi bat edo beste tarteko, aldaketak egitea egokitu denean, taldeak ez du behar den moduan funtzionatu. Entrenatzailearen mesedetan, esan beharra dago taldearen ardura hartu zuenetik klubak ez diola ekarri lehiakortasuna handitu dezakeen inor.

INDARRA GALDU DU SAN MAMESEN

Garitanok taldearen ardura hartu zuenetik, talde lana eta San Mames izan dira Athleticen gorakadaren giltza nagusiak. Joan den denboraldian ez zuen partidarik galdu etxean, eta, Valentziak zuri-gorrien bolada ona eten zuen arte, bide beretik segitu du sasoi honetan. Guztira hamazazpi partida errenkadan egin zituen galdu gabe. Baina, ordutik, gauzak aldatu egin dira. Aurkariek neurria hartu diote talde zuri-gorriari. Athletici lehen baino askoz gehiago ari zaio kostatzen San Mamesen irabaztea. Horrek isla izan du sailkapenean. Hamabostean behin jarraitzaileen babes handia izan arren -harmailek oso itxura ona izaten dute-, gotorleku izateari utzi dio. San Mamesen jokatutako azken lau norgehiagokatan bi puntu baino ez ditu lortu. Lau partida horietan gol bakarra sartu du, penaltiz.

GARITANO DA KLUBAREN APUSTU NAGUSIA

Garitano Athleticen aulkian esertzen denetik izan den emaitza boladarik kaskarrenean murgilduta dago talde zuri-gorria. Halere, Ibaiganen begi onez ikusten dute Garitanoren eta haren lantaldearen ekarpena. Ez da harritzekoa: lan ona egiten ari dira. Athletic zulotik atera zuten aurreko denboraldian, eta sasoi honetan oso ondo lehiatu da lehen erdian. Azken emaitza txarrek aldendu egin dute Europako borrokatik, baina Kopan bizirik dago. Taldea lehiakor izaten ari da. Ezin zaio askoz gehiago eskatu. Garitanok jarraitzea merezi du.]]>
<![CDATA[Erasora, baina itsutu barik]]> https://www.berria.eus/paperekoa/1877/024/001/2020-02-12/erasora_baina_itsutu_barik.htm Wed, 12 Feb 2020 00:00:00 +0100 Haritz Gallastegi https://www.berria.eus/paperekoa/1877/024/001/2020-02-12/erasora_baina_itsutu_barik.htm
Athleticeko jokalariek itzal handiko elastiko batek daukan zama daramate gainean. Jarraitzaileen ahotan sarri egon ohi da gabarra ateratzeko dagoen premia. Azken hamarkadan aukera hori ezerezean utzi duen Bartzelona lehiatik kanpo dagoela kontuan hartuta, are ozenago entzuten da desio hori. Athleticeko zalea, berez, baikorra delako. Baina zelaian bestelakoak izango dira gauzak. Granada ez da Bartzelona. Alde handia dago bi taldeen artean, arlo guztietan. Hala ere, argi dago Espainiako taldea kanporatzea ez dela batere samurra izango. Aurkari lehiakor eta deserosoa da. Kontrarioari aukera gutxi ematen dio. Sasoi honetan San Mamesen, Espainiako Ligan elkarren aurka jokatu zuten lehia da horren erakusle. Athleticek 2-0 irabazi zuen, baina arazo handiak izan zituen erasoko jokoa garatzeko. Granadak kate motzean lotu zizkion bere indargune guztiak. Gaur ere antzeko kontrarioa espero dute zuri-gorriek.

Granadak oztopo asko jarriko dizkio Athletici. Horregatik, ezinbestekoa izango da buruarekin aritzea. Lehen partida etxean jokatzeak ez du esan gura kanporaketa gaur erabakita uzten ahalegindu behar denik. Athletic ausartegi zelairatzen bada, garesti ordainduko du. Presaka jokatzeak kalte egingo dio. Granada zuri-gorrien zain egongo da. Beraz, Gaizka Garitanok entrenatutako taldea garaipena eskuratzen ahalegindu behar da, baina defentsan zulorik utzi barik. Irabazteak izan behar du helburua, baina golik ez jasotzeak asko balio du. Granada San Mamesen lan ona egiteko kapaz den moduan, Athletic gai delako itzulikoan Granada bere etxean estu hartzeko.

Yuri eta Raul Garcia, prest

Kontzentrazioa ez galtzea izango da gaurko neurketako giltzetako bat. Horrekin batera, zuri-gorriek azken hilabetean pilatutako nekeak ere ardura sortzen du. Athleticeko jokalari asko erregai gutxirekin daude. Freskotasuna falta zaie. Eta bete-betean ez dagoenean, Athleticek asko galtzen du. Defentsako talde lan onarekin batera, jokalarien konpromisoa da taldearen bertute nagusia. Talentu aldetik justu antzean dabil —Granada ez dabil sobera—, beraz, aurkaria mendean hartzeko ezinbestekoa da jokalariak sasoi betean egotea. Athletic Ligan ari da ordaintzen Kopan egiten ari den ahalegina.

«Asteburura larri iritsi ginen [Kopako] luzapenaren ondorioz, eta batzuek atseden bat behar dute», esan zuen atzo Garitanok, Lezaman eman zuen prentsaurrekoan. Hala ere, Deriokoak argi du finalerdietaraino iritsita Koparen garrantzia zer-nolakoa den orain: «Daukagun aukerarik argiena da, eta horren bila joan behar dugu. Lau talde baino ez gaude, eta oso lan ona egin dugu txapelketa horretan». Garitanok ez du uste Athletic faborito denik, ezta horrek garrantzirik duenik ere. «Bartzelona faboritoa zen, eta irabazi egin genion», esan du final-laurdenei buruz. «Partida hau prestatu behar da, irabazten saiatu, eta han [Granadan] erabakiko da».

Garitanok futbolari guztiak zelairatzeko aukera izango du. Raul Garcia eta Yuri Berchiche kili-kolo daude, baina arriskatu egin dute. Hau da momentua horretarako. Bestalde, Garitanok ez du aurreratu zein izango den atezaina. Lau edo bost atzelarirekin jokatuko duen ere ez du esan. Argi dagoen gauza apurrenetako bat da Aritz Aduriz zelairatzen bada Kopan San Mamesen jokatuko duen azken partida izango dela. Berriz agertu zenetik, txukun aritu da aurrelaria.

ATHLETIC-GRANADA

Athletic. Unai Simon; Capa, Yeray Alvarez, Unai Nuñez, Iñigo Martinez,Yuri; Dani Garcia, Vesga; Munian, Raul Garcia eta Williams.

Granada. Aaron; Victor Diaz, Vallejo, Domingos Duarte, Foulquier; Gonalons, Yan Eteki, Yangel Herrera, Vadillo, Antonio Puertas; eta Soldado

Epailea. Hernandez Hernandez.

Lekua. San Mames (53.300 ikusle).

Ordua. 21:00etan (Cuatro).]]>
<![CDATA[Gau gogoangarri baten bila]]> https://www.berria.eus/paperekoa/1872/019/001/2020-02-06/gau_gogoangarri_baten_bila.htm Thu, 06 Feb 2020 00:00:00 +0100 Haritz Gallastegi https://www.berria.eus/paperekoa/1872/019/001/2020-02-06/gau_gogoangarri_baten_bila.htm
Lezaman hazitako eskuin hegaleko erdilari fina izan zen Eskurza. Athleticen nabarmendu zen, eta, ondoren, Johan Cruyffek bere proiektuan parte hartzeko egin zion eskaintza onartu zuen. Beraz, Trapagako (Bizkaia) jokalari ohiak ondo baino hobeto ezagutzen ditu bai Athletic, bai Bartzelona. Ez talde bat ez bestea ez daude sasoiko garairik gozoenean. Bartzelona partidak aurrera ateratzen ari da, baina zailtasun handiekin. Oraindik ez du barneratu Quique Setienek eskatutakoa. Aurreko sasoietan baino talde hauskorragoa dela dirudi. Athletic, berriz, ondo lehiatu da, baina garaipenak lortu ezinik ari da aspaldian. Zazpi norgehiagoka daramatza erreskadan ligan irabazi barik, eta Kopako azken bi kanporaketak penaltietan irabazi ditu.

Bada, Eskurzak ez dio aparteko garrantzirik eman taldeek orain arte egin dutenari. Ez du uste samurragoa izango denik egungo Bartzelona mendean hartzea. «Errazagoa? Futbola barrutik bizi izan dugunok argi daukagu alderatzeak egiteak ez duela ezertarako balio. Taldeen dinamikek ez dute ezertarako balio. Badirudi bi taldeak ez dabiltzala fin, baina emaitzek erakusten duten baino hobeto ari direla uste dut». Hori gutxi ez, eta neurketa bizia eta erakargarria aurreikusten du. «Bartzelonak dohain handiak ditu. Arrisku handiko aurkaria da. Baina Athleticek bere jokoa egiteko aukera izango du. Neurketa irekia izango da. Ikusgarria. Futbola gustuko duenarentzat lehia polita izango da».

Talde zuri-gorriaren jarraitzaileei ez die axola Bartzelonan gertatzen denak. Haien buruko min bakarra Athletic da. Azken emaitza txarrek egonezina eragin dute. Europako trena aldentzen ari da, eta jakinekoa da gaitza izango dela Kopan aurrera egitea. Bada, Eskurzak bolada txar hori baliatu du teknikariak egiten ari diren lan bikaina nabarmentzeko. «Athletic egiten ari dena ez da nahikoa baloratzen. Taldearen inguruan ezkortasun handiegia dagoela uste dut. Gaizka Garitanori eta bere lantaldeari oroitarri bat egin beharko genieke, taldearen ardura hartu zutenetik egin duten guztiarengatik. Athleticek gauzak argi ditu. Intentsitate handiarekin zelairatzen da. Azkena, Getaferen aurkakako norgehiagoka, orban txiki bat baino ez da. Gainerako neurketetan oso ondo lehiatu da».

Bide batez, futbolean amaigabea dirudien eztabaidaren gainean jarri zuen azpimarra. Athletic zer den eta egungo futbolean lehiakor izateko bidea zein izan behar den gogoratzea komeni dela uste du Eskurzak, eta ahoan bilorik gabe mintzatu da. «Athleticek ez duela ezertara jokatzen? Baina, zer da futbolean ondo jokatzea? Guk ez dugu inoiz Bartzelonak edo Manchester Cityk egiten duten jokoa egin. Uste hori gelditu egin behar da. Taldearentzat kaltegarria da. Athleticen zutabe nagusiak borroka eta lehiakortasuna dira. Hori aintzat hartzen ez badugu, arazoak izango ditugu».

San Mamesen, giro bikaina

Bartzelonaren bisitak ikusmin handia sortu du zale zuri-gorrien artean. Sarrera arruntak berehala saldu ziren. Garestienak baino ez dira geratzen eskuragarri. Ondorioz, bazkideek erantzunez gero, inoizko itxurarik onena izango du San Mamesek. Taldeari bultza egiteko garaia da. «Horrelako egunetan, Athletic osatzen duten alde guztiek bat egiten dute, sinesteko irabaztea ez dela ezinezkoa».

Athleticen jarraitzaileak baikorrak dira. Beti izan dute izaera hori. Jokalariek ez dituzte gauzak horren argi ikusten, ordea. Normala da: berdegunean sufritzen da gehien. Baina gaur jokalari guztiak egongo dira hasierako hamaikakoan zelairatzeko irrikaz. Athleticen atean Unai Simon egongo da; Herrerin zigortuta dago. Defentsan, Capa eta Yuri kili-kolo dabiltza, baina jokatu egingo dute. Eta, zelai erditik aurrera, ezker hegala da Garitanoren kezka nagusia. Dituen aukeretatik bat ere ez da haren gustukoa.

ATHLETIC-BARTZELONA

Athletic. Unai Simon; Capa, Yeray, Iñigo, Yuri; Dani Garcia, Unai Lopez; Williams, Muniain, Lekue, eta Raul Garcia.

Bartzelona. Ter Stegen; Semedo, Pique, Lenglet, Alba; Busquets, Rakitic, De Jong; Messi, Griezmann, eta Ansu Fati.

Epailea. Martinez Munuera.

Lekua. San Mames (53.289 ikusle).

Ordua. 21:00 (Cuatro).]]>
<![CDATA[Golik gabe, ezin ametsa bete]]> https://www.berria.eus/paperekoa/2005/020/002/2020-02-02/golik_gabe_ezin_ametsa_bete.htm Sun, 02 Feb 2020 00:00:00 +0100 Haritz Gallastegi https://www.berria.eus/paperekoa/2005/020/002/2020-02-02/golik_gabe_ezin_ametsa_bete.htm
WILLIAMS, JOMUGAN

Gaizka Garitanok gehiago eskatu zion Iñaki Williamsi Espanyolen kontrako partida amaitutakoan, eta aurrelariak Espainiako Kopan Teneriferi bi gol sartuta erantzun zion. Hala ere, Williams ez da ate aurrean argitasuna duen futbolaria. Patxada eta ikasten ez den hori falta zaizkio. Gola sartzeko aukera asko sortu behar ditu bat asmatzeko. Kontua da sarri askotan berak sortzen dituela aukera horiek. Ez dauka beste inoren beharrik. Athleticen, ahalmen hori daukan bakarra da. Horregatik da erreferentzia. Hala ere, Athleticeko erdiko aurrelari jokatzeko, bizkarrez jokatzen ikasi behar du. Bestalde, errematea landu behar du. Hobetu dezake. Orain arte, lau gol sartu ditu ligan.

VILLALIBRE, ESPERANTZA

Garitanori kosta egin zaio Asier Villalibreri aukera ematea. Sasoi hasieran, laugarren aurrelaria zen. Bada, egun bigarren edo hirugarren aukera da. Gernikarrak baliatu egin ditu eman dizkioten aukerak. Bizkarrez egin beharreko jokoa menperatzeaz gain, bi oinekin errematatzeko erraztasuna dauka. Ez du bitan pentsatzen. Kopan gol bi sartu ditu, eta ligan bat. Pazientzia izan behar da harekin, baina, ondo eramanez gero, jokalari baligarria izango da Athleticentzat. Goren mailako jokalaria izan daitekeela erakusten hasia da.

RAUL GARCIA, EDOZERTARAKO

Raul Garcia talde jokalaria da. Beti jartzen du taldea beraren interesen aurretik. Sasoi honetan, esaterako, askotan jokatu du erdiko aurrelari postuan, bere dohainak azaltzeko egokiena ez den postuan. Bera aurrean jarri eta Williams hegalera bidalita, Athletic hobeto aritzen da erasoan, etxean. Bestalde, ez da ahaztea komeni adinean aurrera doala (33 urte ditu), eta denbora askoan jokatuz gero, haren gorputzak nabari dezakeela. Azken jardunaldietan, ez dabil bere onena ematen, baina, hala ere, taldeko golegilerik onena da: sei gol sartu ditu. Bi oinekin zein buruarekin, errematatzaile ona da. Taldeko gazteek maisu ona dute Lezaman ate aurrean egin behar diren gauzak ikasteko.

MUNIAIN, WILLIAMS BEZALA

Erdilari aurreratu oso on bat izar bihurtzeko, gola behar da. Bada, Iker Muniainen gabezia nagusia area inguruan duen muga da. Bistan da erdilari bati ezin zaiola erdiko aurrelari batek izan behar duen gol sena eskatu, baina iruindarrak badauka gabezia. Sormen handiko futbolaria da. Asko ari zaio ematen Athletici. Baina kosta egiten zaio golak sartzea. Lau sartu ditu denboraldion.

BESTEEK, AUKERA GUTXI

Ibai Gomezek, Iñigo Cordobak, Kenan Kodrok eta Aritz Adurizek ez diote asko eman taldeari. Adurizen kasuan, ezin izan duelako. Min hartuta egon da -Getaferen aurkako gaurko partidarako deialdian dago, baita Unai Simon ere-. Gainera, bere ibilbideko azken pausoak ari da ematen. Baina itzal luzea du oso. Ispilu bat da erdiko aurrelari izan gura duten gazteentzat. Kosta egingo da hura ordezkatzea. Ibai Gomezi, Cordobari eta Kodrori, berriz, gehiago eskatu behar zaie.]]>
<![CDATA[Ez du hamaikagarrena izan nahi]]> https://www.berria.eus/paperekoa/2000/026/001/2020-01-28/ez_du_hamaikagarrena_izan_nahi.htm Tue, 28 Jan 2020 00:00:00 +0100 Haritz Gallastegi https://www.berria.eus/paperekoa/2000/026/001/2020-01-28/ez_du_hamaikagarrena_izan_nahi.htm
Bide batez, gaur izango duten erronkaren zailtasuna nabarmentzeko, alderaketa bat egin zuen. «Lehen Mailako talde baten kontra etxean lehiatzeak edo Bigarren Mailako talde baten kontra kanpoan jokatzeak antzeko zailtasuna dute». Punta-puntako taldeak alderaketa horretatik kanpo utzi zituen, noski.

Zuri-gorriek, gainera, ondo gogoan dute aurreko astean Elxen gertatu zena. Barruan iltzatua dute. Hanka eta erdi Kopatik kanpo izan zuten. Bada, gaurko lehiak antzekotasun handiak ditu. Tenerife, Elx bezala, Bigarren Mailako taldea da. Hasiera batean, mailaz igotzeko osatutako taldea da. Baina Bigarren Maila luzea eta gogorra da. Dozena bat taldek izaten dute sasoi hasieran helburu bera, eta denentzat ez dago lekurik. Talde asko, helburua aldentzen ari dela ikusita, nahastu egiten dira. Dinamika txarrean sartzen dira, eta amildegira gerturatzen dira. Tenerife dago egoera horretan. Puntu batera ditu jaisteko postuak. Sufritzen ari da. Hala ere, kapaz da gorengo mailako talde bat kanporatzeko: Valladolidekin egin bezala.

Ligan erakusten ari dena baino askoz gehiago egiteko gai da gaurko aurkaria. Garitanoren arabera, Elxen antzeko ezaugarriak dituen talde bat izango dutela aurrean. «Tenerifek irletako taldeek izan ohi dituzten ezaugarriak ditu. Baloiari tratu ona ematen dio. Elxen tankerako taldea da. Teknikoki jokalari onak ditu. Aurkaria ezagutzen dugu. Valladolid kanpoan utzi berri du. Lehia parekatua izango da».

Zuri-gorriak sufritzeko prest daude. Kopan interes handia jarri dute hasieratik. Gogoz daude. Gainera, badakite orain arteko joko maila erakusten badute irabazi egingo dutela. «Ondo prestatu dugu kanporaketa. Gogotsu gaude». Baina ez da lehia erraza izango. Tenerifek ia ez du aukerarik Kopa irabazteko, baina Athletic mendean hartu eta Real Madril edo Bartzelonaren kontra jokatzeko aukerak ikaragarri erakartzen ditu jokalariak eta ingurua. Denboraldia salbatzeko era bat izan daiteke.

Aldaketa gutxi

Horrelakorik gerta ez dadin ahal duen hamaikakorik lehiakorrena zelairatuko du Athleticek. Azken bi asteetan ia partida osoak jokatu dituzten futbolariak dira Garitanoren ardura: Capak, Iñigo Martinezek eta Williamsek nekea dute pilatua. Baina haiek kentzea ere ez da erraza teknikariarentzat. Zutabe garrantzitsuak dira. Hortaz, Garitanok eurekin berba egin beharko du azken erabakia hartu aurretik. Hala ere, inork ez dezala iraultzarik espero. Ez da mementoa. Asko dago jokoan. Ohikoetatik Unai Simon da deialditik kanpo geratu den bakarra. Atezaina osatu da, baina oraindik ez dago sasoi betean.

TENERIFE-ATHLETIC

Tenerife. Ortola; Moore, Carlos Ruiz, Sipcic, Lasure; Undabarrena, Alonso; Suso, Luis Milla, Elliot eta Joselu.

Athletic. Herrerin; Lekue, Yeray Iñigo,Yuri; Dani Garcia; Unai Lopez; Raul Garcia, Muniain, Ibai eta Villalibre.

Epailea. Gonzalez Fuertes.

Lekua. Heliodoro Rodriguez Lopez (22.824 ikusle).

Ordua. 21:00 (Dazn).]]>