Eraikuntzan, garraioan eta industrian autonomo asko galdu dira euskal lurralde guztietan azken urteetan, eta 2013a ere galeraren bidetik joan da, Euskadiko UATAE elkarteak emandako datuen arabera. Zazpiehun langile autonomo gutxiago zeuden Araba, Bizkai eta Gipuzkoan 2013an 2012an baino. 173.155 zenba daitezke hiru lurralde horietan Gizarte Segurantzan izena emanda. Abenduak, gainera, hobetu egin du urteko datua hein batean, azken hilean 299 pertsona gehiagok eman baitute izena Gizarte Segurantzan autonomoen erregimenaren barruan, aurreko hilean baino %0,2 gehiago.
Maria Jose Landaburu UATAEko idazkari nagusiaren ustez, "datua bereziki txarra da, Espainian oro har gora ari baita autonomoen zenbakia". Araba, Bizkai eta Gipuzkoan bere inguruan baino askoz gutxiago hazten ari da autonomoen zenbakia. Arabak 202 langile autonomo gutixagorekin bukatu du urtea; Gipuzkoak, 248 gutxiagorekin; eta Bizkaiak, 242 gutxiagorekin.
"Eraikuntzan, garraioan eta industrian gertatzen ari den autonomoen galera ez da ari zerbitzuetan sortzen direnekin orekatzen, eta beste hainbat lekutan bai. Hori txarra da euskal ekonomiarentzat", dio Landaburuk. Eusko Jaurlaritzari eskatu dio autonomoen bi arazo nagusiak konpontzeko, finantzaketa gabezia eta ekonomiaren pizkunde ahula.
